2 Kurintu 6 - Ngudradreadrekadhane Ka Sisiu 魯凱語聖經

¹ Papalra nai ki Twaumase kaungu, lri pasapukwane nai numiane: Kudra tarwamaranga numi ku migemi ki Twaumase, madha pakawlrawlrau kikai migemi.

² Asi lwiyane amia kai ku Twaumase: Ikai saka tatarumaramaraneana, lri kilalra ku muswane; ikai ki tapalribulribulane ka vai, lri paralubaku muswane. Kilalra! Kaiasasane amani ku tatarumaramarane ku migemi ki Twaumase ka vai! Kaikameane amani ku tapalribulane ki Twaumase ka vai!

³ Kai nai lri ubangalre lu tulilisi kawriva ki awngane nai ku palrapalra, lakamani kai nai lri vangavange sanaka aneanenga.

⁴ Pakai ku apathingalane nai ikai ki sanaka manemanenga ala ka sasiakawlu nai ki Twaumase, kiaadili nai ki lasapapacai, matikurwane, akwalriane.

⁵ Nakialrumainga nai, kiemenge, kivangavange kitulilisi ki umawmase; kiapakwalri nai, kai kasipelrepelrenge, si ubaisi.

⁶ Arakai nai ku bulane ka kidremedreme, thingalane, kiadilane kilibakane patuelre, la aru satalu nai ki Siri, ka patengane ku sakialibake,

⁷ ku hukuingi ki patengane ka sabulrwane, si maadrau ka puku ki Twaumase, si pathingalane ka sasiakawlu nai ki Twaumase. Siaadreme nai ku dringelresane, si kikaruburu ki badha, si la ngipapalakebe.

⁸ Kiausakene nai, la kitusinalreme nai; kiakaelaela nai, la kidrengedrengere nai. Tara kadraedraedrangelre amia naiane ku laumawmase, ku patengatengane ku kawriva nai yai tengatengane ka vaga;

⁹ mia nai kau kaika sapatumatumane kai kipulringalringau, ala ka kiamathingathingale nai ki sanaka umawmase; wapacainga amia naiane, laka panianianiake nai katharithariri. Kiapathavungu nai, ai kai nai kiapapacai;

¹⁰ matelrelrege nai ku kidremedreme, ai taikaiyane ku akiragadhane; mia ki matiakuru nai, ai pakaesai nai ki takaalra ka umawmase; miakau kadrwa ku manemane ku pikai nai, ala ka pakayakai nai, sanaka maneemane.

¹¹ Swa Kurintu ka latalragilragi, papia numiane, twakapatengane nai kawriva.

¹² Kai nai kamani ku ngwasutiki ku takidremedremane, amani numi ku ngwasutiki ku takidremedremane.

¹³ Lu kawrivaku numiane, miaku ki kawariva ki lalakeli; paruswadrava kwi kidremedreme numi, arakaiya ku tapangimiane nai pasudalru numiane si pasudalru naiane.

Ngilalakeba ku kaika akivelevelane numi ki maelane ku takisuswane

¹⁴ Madha kirederedelane ku awngane ki kai masalru ka umawmase. Kai numi lri maka mababaca liniane ku vaeva ku babacane. Ku pacengecenge si ngialisiane pikakwa mapaparalubu? Ku ledra si dradrimitane ala dulru maikai?

¹⁵ Ku Kirisitu si Satange ala dulru madradrekase? Ku masalru ki Tamatama si kai masalru ki Tamatama ku umawmase manemane ku tamararamavane?

¹⁶ Ku daane ki Twaumase si samiamiange pikakwa tara acegecege? Amanita ku mabula ka daane ki palralrawlrawthu ka Twaumase. Mia ku taiyane ki Twaumase kai: Lri taelreaku ki umawmaseli, si ikai liniane masasawlriwlri. Lri a Twaumasaku liniane; lai aumawmase nakwane.

¹⁷ Ngwalai kai ku Tamatama la iya kai: Kunumi yai katwasa liniane, twaladha liniane kainganai kitukudha, madha kisaelaela ku kaika mabula ku lamanemane, la nau tarumara numiane.

¹⁸ Lri a Tamaku numiane; lai ka lalalakeli numiane. Kikai vaga yai amaniaku ka sapupukuanenga ka Tamatama ka amia.