2 Kurintu 5 - Ngudradreadrekadhane Ka Sisiu 魯凱語聖經

¹ Wathingaleta, alaiyasi burukunga kai taikaiyaneta kai kawmasane kai balrawbau ka daane, ku Twaumase lri baai mitane belenge ku daane, ka amanini ka twadaane, lrika palralrawthu ikai.

² Wadadangeta kaiasasane, si sidramadrama ku amwane mudaane kudra daane subelebelenge, mia ki sialaimai;

³ lu silaimainga, kai nai ka vilralralrakanenga ku kinawmasane.

⁴ Kai taikaiyaneta kai kawmasane ki balrawbau ka daane, mia ki watukudru ku matelrege ku amece si dadange; kikai ani mwalra sarare kikai swa kawmasanane ka kinawmasane kaika amia, ani malra silaimai kai swakaiyane subelebelenge ku kinawmasane amia, lani pawbalrithi ku niake kudra ki lri tara kalisi pacai.

⁵ Ku Twaumase ngiakakamani padulru ku lrika asudalepane nai kikai ki akabalrithane; la malra ki Siri si baai mitane, tusapatalwane.

⁶ Lakamani, tasueteane kai garangane kai galremegemane nai. Wathingale nai, sana ikaiyana nai kai ki kinawmasane adringi, wadailiana nai ku pasikai padulru mitane ki Tamatama ku taikaiyane.

⁷ Asi lwiyane kai panianianiake nai arakai nai ku salrwane, kai nai ka arakai ki adredrelane ka kawmasane.

⁸ Tasueteane kai garangane kai galremegemane nai, ka nai palraingi nai katwase kai ki kinawmasane kawmasane, si taelre ki Tamatama.

⁹ Ku makuciacingalre yai, adravane ikai nai adringi ki swa kawmasanane ka kinawmasane, ku sialaimai ku swa subelebelenganane ku kinawmasane, lri pakiragai nai makanaelre ki Tamatama.

¹⁰ Asi lwiyane lri tara acegecege nai icucubungu ki Kirisitu makanaelre, si kisaibange iniane. Sanaka aneanenga lri singikai ku kakwakudhaneini saikai kawmasane, ku mathariri ku ngialisiane, amani ku lri malra ku akipangibilriane.

Sakai ki Kirisitu si makakadalru ki Twaumase

¹¹ Kudra wathingalenga nai ku apangimiane usakene si ukuludru ki Tamatama, lakamani ku arakai nai kikai bulru pasapukwane ki umawmase. Ku Twaumase wathingale ku tangimiamiane nai nguelre; anatumane la mialri numi patwalai ki kidremedreme thingale nakwane amiaku.

¹² Kai nai ka tatupelana ngipapelaela iya papia numiane, pakai nai ku athingalane numi ikai ku tatakaiyane si sakai naiane ngilralrigu, la nai ikai ku vaga numi tubalre kudra ki twakucingalre ki belenge, si kai tukucingalre ku kakwakudhane ki takaumawmasane.

¹³ Alaiyasi ka patengane nai ka amamama, ngwalai nai ki Twaumase; alaiyasi ka pwalringalringau nai amani nai numiane.

¹⁴ Ku sakialibake ki Kirisitu amaninga ku wavelevelevele naiane, asi lwiyane wathingale nai, ku tangeangea ku umawmase pasiakai ki laumawmase pacai, maru wapacainga kwini laumawmase.

¹⁵ Kai lasu pasiakai ki laumawmase pacai ku kaika angipapasikaiyane lini kudra ki panianianiakeana, lri pasikai panianiake kwidra ki atalingikaiyane liniane pacai si la sielane panianiake ka Kirisitu.

¹⁶ Lakamani, twalai kikai kai nai lri sitangadranenga ku tulekete ki umawmase si lekete ki umawmase. Adravane ka nasiatangadrane nai ku tulekete ki umawmase si drele ki Kirisitu, kikainga kai nai lri pianga kikai.

¹⁷ Adravane ka naaneanenga, sana ikai ku niake ki Kirisitu amani ku kiabekace kitubavanenga ka umawmase; ku supilri ngialribatenga, ku bavane la kelanga.

¹⁸ Kikai patuelre tapiane ki Twaumase; pangwakai ki Kirisitu la dulru nai kikadalru ki Twaumase, la baai naiane ku awngane ki makakadalru ka hukuingi.

¹⁹ Ku pelaelaela nai ku hukuingi amani kai: Ku Twaumase pangwakai ki Kirisitu si cegecege ku amakakadalrwane. Kai lri dungudungunga ku pasalrivane lini, si la malra baai sudralrunga naiane ku tamakadawdalrwaneini ki umawmase ku hukuingi.

²⁰ Ngwalai kikai, amaninga nai ku nipawkalrivilane kisikawlu ki Kirisitu. Ku Twaumase amani ka pangwakai naiane si pasapukwane numiane: Ngiatalingikaiyane nai ki Kirisitu kitubi numiane, ku Twaumase ani pakabalrithi numiane, lanu dulru kikadalru iniane.

²¹ Ku Kirisitu kadrwa ku pasalrivane, ai ngwalai mitane, ku Twaumase la pasiamece ku pasalrivaneta iniane, la maka sataluta iniane si dulru makakathariri ki Twaumase.