2 Kurintu 4 - Ngudradreadrekadhane Ka Sisiu 魯凱語聖經

Yadilrungane ka tinukucingalrane ka lawbubulu

¹ Kai Twaumase kudra makalithinga mitane, la baai mitane kikai awngane, la kai nai kasulri.

² Wacilri nai patuelre ku kulrungane ka akiarubwanane ka kakwakudhane, si kai pia ku alrilrigilane ka kakwakudhane, la kai pangwathathili makawli swacenge ku vaga ki Twaumase. Ikai cucubungu ki Twaumase, pwataluvaivai nai pathingalane ku patengane ka sabulrwane, si arakai kai tangivelevelane nai putaluvaivai pathingale kudra takidremedremane ki sanaka umawmasenga.

³ Alaiyasi ka makucingalre pulringalringau kai pelaelaela nai kai hukuingi, amani kwidra kathane ku papiapia ki akamudane ku umawmase ka kai lri maka pulringalringau.

⁴ Kilakikai umawmase kai masalru, asi lwiyane kikai Satange pakabuti liniane, la kai maka drelenga ku ledra ki hukuingi; kikai hukuingi yai patharukai ki lrigu ki Kirisitu, kai Kirisitu laka tangimiamiane ki Twaumase.

⁵ Ku pelaelaela nai kai nai ngiapapasikai, peaelaelaela nai sikakathane ki “Tamatama ka Yesu Kirisitu.” Ngwalai ki Yesu, asasiakawlu nai numiane.

⁶ Kudra amani ku kawariva iya kai “Ani ikai ku ledra twalai kadradridrimitane kainganai paledra” ka Twaumase, ka amani kudra arakai ku ledra paledra ki kidremedreme nai ka Twaumase; pathingale naiane kudra paledraini pikai ki lringau ki Yesu Kirisitu ka ledra.

⁷ Ai, kunai ka piakai kikai tinukucingalrane ka lawbubulu ki Twaumase mararaamau nai ki langudidilrungu, kikai yai sapelaelane kai abebeelengenga ka puku yai Twaumasane, kaika puku nai.

⁸ Kiapadradresenge nai ku makaelaela ku akipakwalriane, ai kai nai kiatuthiri; taikaiyane ku thekelrane, ai kai nai masulri.

⁹ Takalra ku badha, ai tara yakaai ku talragi nai; takibakebaakane nai, ai kai nai wapacapacai.

¹⁰ Kikai lri kalisi kai kinawmasane nai tamailukane nai ku pacai ki Yesu, pakai ku athingalane ku niake ki Yesu ka mialri ikai ki kinawmasane nai.

¹¹ Kai taikawmasanane nai, tangwalaadhane nai ki Yesu si palraingi kisanu pacai, pakai ku athingalanane ku niakeini ikai naiane ka lri tara kalisi ka kinawmasane.

¹² Kikai amia kikai, taicucubungane naiane kai apacadhane, la ngwalai numi kai si tarumara ku niake.

¹³ Kai Sisiu amia kai, “Masalrwaku, lakamani ku pelaelaelali.” Sakai ki miyaiya kai ki salrwane, masalru nai, lakamani ku pelaelaela nai.

¹⁴ Wathingale nai, kudra pasiaelane ki Tamatama ka Yesu ka Twaumase lri tara pakarededele naiane ki Yesu sielane, si lai lri ililuku naiane si kunumi karededele mucucubungu iniane.

¹⁵ Kikai patuelre pasiakai numiane; ku Twaumase ku pwalebenga ku migemi makakai ki takaalra ka umawmase, la lrika takaakalra ku umawmase ku patarwamara ku kiaseasenane si lrigu ki Twaumase.

Satalu ku salrwane si panianianiake

¹⁶ Ngwalai kikai, kai nai masulrisulri. Adravane aru turamuramuru kai kinawmasane nai, kikai abake nai arwa ka bavaavanelringa lukakaiyaiya.

¹⁷ Kai kipadradresedresenge nai kai lri padaalru ka akwalriane lri mailukulringa ku kadrwa ku pakiramavane ka palralrawlrawthu ka lrigu.

¹⁸ Kai nai makalithi ku adredrelane ka lamanemane, makalithi nai ku kai adredrelane ku lamanemane. Ku adredrelane yai yasasane; ku kai adredrelane yai lrika palralrawthu.