2 Kurintu 3 - Ngudradreadrekadhane Ka Sisiu 魯凱語聖經

Sasiakawlu ki bavane ka sakiketeketane

¹ Ngiatatu abelebelenge nai? Bekace nai ngialrawnga ki laumawmase baai numiane ku sasiwkadhane naiane ku pacase?

² Amani numi ku sasiwkadhane naiane ka pacase, wapacase pikai ki kidremedreme nai, si pathingale makanaelre, silrigu pakilalalra makanaelre.

³ Athingalane, ku Kirisitu ngiapapacase kikai tigami, la kamani nai ka padaruru satedre. Kikai tigami kaika niarakaiyane ku inki pacase pikai ki lrenege, arakai ku Ri ki palralrawthane panianiake ka Twaumase pacase pikai ki kidremedreme ki umawmase.

⁴ Kai taiyane nai kai, asi lwiyane pangwakai nai ki Kirisitu si ikai ku miyaiya kai ku salrwane nai ki Twaumase.

⁵ Kikai kaika amia kai, arakai nai ku puku nai pia kikai awngane; kai puku nai twalai ki Twaumase.

⁶ Amani ku pasapukwane naiane asasiakawlu ki bavane ka sakiketeketane; kikai sakiketeketane kaika pacase ka hulrice, amani ku sakiketeketane ka Siri. Ku pacase ka hulrice mailuku ku apacadhane, ai ku Siri wabaai ku niake.

⁷ Kikai hulrice, nipangupacekane pacase pikai ki lrenege, sapelaelaela yai, ku lrigu ki Twaumase mwataluvaivai. Unu ku tapaledrane ki lringau ki Musi ku lrigu arwa akabalribaalrithi, ai kudra ledra maiyana sapukwane, lakamani ku kaika dulru drele iniane ki swa Iseraylri. Alaiyasi maka mailuku ku lrigu kudra papacai ki umawmase ka hulrice,

⁸ lu mia kwini, ku puku ki Siri kai lri maka maikaikaai ku lrigu?

⁹ Alaiyasi mailuku ku lrigu ku puku ku atupasalrivanane, kudra peaelaela kadrwa ku pasalrivane ki umawmase iya ka puku lri mailuku ku madradrau ku lrigu!

¹⁰ Ku patengatengane, lri dulruta iya kai, kai yakainga kai malealedra ka lrigu, ku nathelare kunadruma akabalrithinga kadradrimiti.

¹¹ Alaiyasi kudra arwa akabalribalrithi la ikaiyana ku lrigu, kudra apalralrawthane ikai lri tara ka madraadrau ku lrigu.

¹² Asi lwiyane yakai ku miyaiya kai ku sidramane, yakai kai kadrwa ku lri kilekete ka garanganeta.

¹³ Kaita ka maiya ki Musi, lri tara maalra ku hankaci si paidringi ki lringauini, ku kaika amakadrelane ki swa Iseraylri kudra arwa akabalribalrithi ku ledra.

¹⁴ Ai ku thingalane ki kidremedreme lini kiacelrepenga. Pakela kaikameane, kai lalasu lu silrigulrigu ki la supilri ka Sisiu, arakaiyana ku thadalrane ka hankaci tamenge ki kidremedreme. Asi lwiyane kathane lu kiparaisi ki Kirisitu ku umawmase, kikai hankaci ala lri katwase.

¹⁵ Adravane kaikameane, kwi lalasu lu silrigu ku hulrice ki Musi, kwidra hankaci wataamengeana ki kidremedreme lini.

¹⁶ Ai, mia ki taiyane ki Sisiu, “Ku Musi sa mucucubungu ki Tamatama, kudra hankaci ki lringauini kiamwalra cilri.”

¹⁷ Kikai “Tamatama” taiyane amani ki Siri. Ku taikaiyane ki Ri ki Tamatama, ikai kwini yakai ku angilralraingane.

¹⁸ Kuta arakaita makanaelre ku kadrwa ku satamengane ki lringau pathingalane ku lrigu ki Tamatama; kudra twalai ki Tamatama ka Siri ku putaluvaivai kai ki lrigu pakabalrithi mitane, la maka ngimiata ku tangimianeini, ikai ku malealedra ku lrigu.