2 Kurintu 2 - Ngudradreadrekadhane Ka Sisiu 魯凱語聖經

¹ Lakamani ku kidremedremeli, lubibilrili lu lrikapaku numiane kainaku lri pakwalringa numiane.

² Alaiyasi pakwalriaku ku kidremedreme numi, lai ka aneane ku lri pakiragai nakwane? Kathane numi ka ngwalai ki sakiadremedreme nakwane ka lri maka dulru pakiragai nakwane.

³ Lakamani, ku pacaseli kudra tigami si baai numiane, pakai kudra lu mwangaku numiane, kudra naika pakiaragai nakwane ku umawmase amani lu ngibaalrelringa pakwalri nakwane. Mialriaku kasalru ku akiragadhaneli ka akiragadhane numi makanaelre.

⁴ Kiangeangeange kai kidremedremeli si takualralreselrese tigami numiane, nau pakwalri pakidremedreme kainaku ka amia, ani thingale ka mathalradhaku numiane makanaelre amiaku!

Pacepe ki pasalriu ka umawmase

⁵ Lu mia kwini, alaiyasi ikai ku umawmase ku pakiangeange ku kidremedreme ki palrapalra, kwi lasu kai pakiangeange ki kidremedremeli, pakiangeange ki kidremedreme numi makanaelre, lri ikai ku yakai numiane ku la kiangeange ku kidremedreme. Lu iyaku kai kawriva, kainaku palraingi pakiarubwane ki miyaiya kai ku umawmase.

⁶ Makakelretenga ku takikaelaelaneini ki mapapangale.

⁷ Nai pacepe numi iniane, si pasapukwane sasa iniane, amani lu pasilribate kipakwalri ku kidremedreme si kasulringa.

⁸ Lakamani, lri pasapukwanaku numiane pathingala iniane, kunumi laka twakapatengatengane numi ka kialibake iniane.

⁹ Kudra tigamingali ku paswalala numiane, ku pacugane pakai ku athingalaneli numiane lu lri maka dulru numi kikilrialringau lu lri palraingi numi pasalaladha nakwane patuelre.

¹⁰ Lu pacepe numi ki aneane, lri paacepaku ki aneane. Alaiyasi ikai ku pacepeli, atalingikaiyanaku ki Kirisitu pasikai numiane pacepe,

¹¹ amani luka silrialribate numiane ku Satange, asi lwiyane wathingale nai turamuru ku salrilrigilane ki Satange.

Ku katelrelrege ku kidremedreme ki Pawru

¹² Sa mwaku Terua pelaela ku hukuingi ki Kirisitu, ku Tamatama pasiakainga nakwane muelebe ku lrawlrawdru ki akaungane.

¹³ Ai, ngwalai ku kaika tadrelaneli ki retesaneta ka Titu, kai kidremedremeli matelrege turamuru. La kipusawnga naku ki swakai kwini, si katwase mwa ka Makidunia.

Satalu ki Kirisitu si pamalebe

¹⁴ Ai, maelanenga ki Twaumase! Asi lwiyane tasangilukane mitane, kuta ka ravase ki Kirisitu la maka dulruta kipaelre si kiibu ki takwaputaritariri kela ka Kirisitu. La arakai mitane si papia kidruanga sabulu kudra ngwalai ku tathingalane ki Kirisitu si ikai ku sangulremane.

¹⁵ Maru amaningata kudra patarumara ki Kirisitu baai ki Twaumase ka sangwalreme, salraelre ikai kwidra ki kinawmasane ki kiapalribulu si lri kamudu ka umawmase.

¹⁶ Papia kwidra ki la lri kamudunga ka umawmase, kikai tasabalriane akabalrithi sangubaalre ka wapacai; papia kwidra ki kiapalribulunga ka umawmase, kikai tasabalriane lai akabalrithi ka apanianianiake ku tasangulremane. Aneane ku lri dulru siamece kikai maadrau turamuru ka awngane?

¹⁷ Kuta kaita ngiamia ki takalra ka laumawmase, malra ku hukuingi ki Twaumase si tusiwbai kilangalangai; asi lwiyane ku Twaumase siakawlu mitane, la maka ikaita cucubungu iniane sakai ku takasasiakawlaneta ki Kirisitu si ka patengatengane pelaelaela ku hukuingi.