2 Kurintu 13 - Ngudradreadrekadhane Ka Sisiu 魯凱語聖經

Pakiapapawlringau si twabarengerane

¹ Kikai lrika saka ngusitulrululi kela lrikape numiane. Kai Sisiu amianga kai, “Sanaka wakukusu lu tadrusa tatulru ku wasiwmi pasudalepe si pelaela ki umawmase lri maka acegeecege.”

² Papia kwidra napasalriu ku siaswalane, si kudra ladrumane ku umawmase, sa saka ngusipusaleli kela lrikape numiane pakiapapawlringaungaku; kikainga la kainaku ikainga numiane kwini, si pelana pakipapawlringau numiane: Lubibilrili lu mwaku kwini, lri kainaku pacepenga liniane.

³ Lri ikai ku sapathingalane ku urikai numi ku sapelaelane ala ka pangwakai nakwane ku Kirisitu kawriva. Lu bilri numiane ku Kirisitu kaika twaramuru; ngiabalre kamani, ku taikaiyane numiane athingalane ku pukuini.

⁴ Adravane saikai ki taturamuraneini si kikedrekedre pacai ikai belenge ki ziwzika; ai, satalu ku puku ki Twaumase kwi lasu panianianiakeana. Lu kiparaisita iniane, lri mialri atwaramuru; ai ngwalai ku akaesadhane numi, lri sataluta ku puku ki Twaumase si tupapalra iniane panianiake.

⁵ Kunumi ngidradrela, la ngikakilrialringava, luka ara salrwane numi panianianiake. Kathane lu kai numi maka kikilrialringau, naika wathingale numi ki Yesu Kirisitu ka yakai adringi ki niake numi.

⁶ Anathiingale amiaku numiane, kai nai kamani kwidra kai maka kiakilrialringau.

⁷ Kiatubi nai ki Twaumase, ku kaika apiane numi sanaka ngialisiane; kikai kaika pakai ku aputaluvaivadhane lrigu ku tadulrwane nai ngilribate ku takikituthiathingalane nai, pakai ku lrika apikaiyane numi ku makalecege ku kakwakudhane, adravane ngwalai kwidra si kitumalebenga nai.

⁸ Lri kai nai pia ku awngane ku kiaecebe ki patengane ka sabulrwane lutumane, lrika palribulu nai ki patengane ka sabulrwane sikakathane.

⁹ Lu turamuru nai la sapukwane numi, amani ku akiragadhane nai. Ku kitubitubi nai, amani ku lrika akitulrepengane numi.

¹⁰ Ngwalai kai, saikaiyanaku adaaili ki talidrumane wapacasaku kikai tigami, pakai lu kidrelenga ku numiane, la kai arakainga ku kibaaili ki Tamatama ku puku ki awngane si pakilringau kaelaela numiane. Ku baai nakwane ki Tamatama ku puku ki awngane yai apadilane numiane, kaika apaturamurane numiane.

¹¹ Bibiilrilinga, laretesane, lri tara madredresengeta lukabibilrili. Anu kisamulamula ku akitulrepengane ka umawmase. Si tarumara kai tapasapukwananeli; la karededela makanaelre ku kidremedreme, taelre si makathaithaithariri. Ku sakialibake si amani ka wabaai ku sulivatane ka Twaumase ani tapalra numiane!

¹² Kunumi arakaiya ku bulane matubarengerengerane si mwadringadringai numi maiyaiya! Mwadringadringai numi amiamia makanaelre kai lasinzia!

¹³ Ku migemi ki Tamatama ka Yesu Kirisitu, sakialibake ki Twaumase, sapayelrelreane ki Siri, ani ikai tapalra numiane makanaelre!