2 Kurintu 12 - Ngudradreadrekadhane Ka Sisiu 魯凱語聖經

Ku Pawru wadrele ki maburusi si kipathingale

¹ Adravane ka kadrwa ku akaesadhane lu ngitatwadravane, ai lri tara ngitatwadravaku. Kikai lri iyaku ku tabaadhane nakwane ki Tamatama ku maburusi si sapathingalane.

² Wathingalaku yakai ku tangea ku Kirisite, saka paswalala lri ikainga ku tinara 14 ka caili kiapusubelebelenge pusabebeelengenga (kainaku wathingale luka kinawmasaneini ka mwabelenge, luka wadrele ku maburusi, kainaku wathingale, kathane ku Twaumase ku wathingale.)

³ Nau peelana, kikai umawmase kiamalra pubelenge mwa ki cekele ki Twaumase (luka kinawmasaneini ka mwabelenge, luka maburusi, kunaku mialriaku kaithingale, kathane ku Twaumase ka wathingale.)

⁴ Ikai kwini, kialalra ku kaika amaka aravagane pelaela, kaika amaka dulrwane arakai ku ngudui pangialrau ki manemane.

⁵ Lri ngwaladhaku kai ki umawmase si ngitatwadrau; ai kathane ku patharwakai ki turamuraneli, kainaku lri ngitatwadrau.

⁶ Ku patengatengane, lu ngitatwadravaku kaika ngiamakulrungu, asi lwiyane kai taiyaneli patengane ka vaga. Ai kainaku lri ngitatwadrau, asi lwiyane kainaku madalame lu ikai ku umawmase ku wamalra nakwane parwabelenge, si palribate ku tadrelaneini ku takilalraneini ikai ki kinawmasaneli.

⁷ Pakai ku kaika amalraneli ku makalra ku mwakalrivili ku sapathingalane si ngwalai ngitatwadrau, yakai kai taingeane ka caemane kai tangeangeangane ikai ki kinawmasaneli, mia ki sasiakawlu ki Satange ka wacwicwiki nakwane pakiangeange, ku kaika angikalrilrigwaneli.

⁸ Ngwalai kikai, kingitulrulunga naku kitubi ki Tamatama pamwalra kikai ceneke,

⁹ ai ku Tamatama twabalre nakwane, “Sana ikai muswane ku migemili makakelrete; asi lwiyane kai pukuli ikai ki taturamuranesu athingalane ka sapupukuanenga.” Ngwalai kikai, la pawkalrivilaku kadalame ngitatwadrau kai turamuraneli, ku lrika athingalaneli ala ka palribulribulu nakwane ku puku ki Kirisitu.

¹⁰ Ngwalai ki Kirisitu, kiaragadhaku kiadili tarumara ku turamurane, ku akisidrekasane, ku akipakwalriane, ku kucingalrane, si akikabebetethane; asi lwiyane luka amaninga ku taturamuraneli, amani kwini ku tasapukwanane.

Ku Pawru makalithi ki Kurintu kiwkai

¹¹ Ngiamianga naku ki makulrungu ka umawmase, ka amani numi ka wavutha nakwane angimiyaiya kai. Naika wadrengedrengere numi nakwane. Adravane ka kainaku ka sapatumatumane, kadrwa ku kaika taaswalaneli kudra ki “Lanipawkalrivilane ka nisikawlane”.

¹² Ikai numiane, arakaiyaku ku makaelaela ku sakiadiadili, la pangukaiyaku ki matiasamali ka awngane, ka maelane ku puku, si pinangu Twaumasane ka puku pelaela numiane ala ka nisikawlanaku.

¹³ Kaika kathane ku kaika tapakwalrianeanali numiane, ku takimarasikaikaiyane yainu ku kaika takiramavane numi ki drumane ka kiwkai? Amani kikai ku kaika taaparamaramavaneli, paceepangaili.

¹⁴ Kikai yai padulrudulrwaku ku saka ngusitulrulu lrikape numiane, kainaku lri pakwalri numiane, asi lwiyane amani numi kudra urikaikaili, kaika paisu numi. Ku patengatengane, ku lalalake kai lri cukingi pasikai ki marudrawdrange, amanilringa ku marudrawdrange ku lri cukingi pasikai ki lalalake.

¹⁵ Pakai ku aparalubane numiane, mwabangalraku baai ku pakaikaili patuelre, adravane kai kinawmasaneli. Bekace lu aru kilibakaku numiane, aru kabekelane ku akikilibakaneli numiane?

¹⁶ Lumia kwini, ngiathathingale numi, kadrwana ku tapakwalrianeli numiane; ai yakaiyana ku umawmase ku amia kai, arakai ku drangelrane tavuvulrucu, pakai ku arakaikaikaiyane mitane amiamia nakwane.

¹⁷ Yakainga ku sikawluli pamwa numiane si lrilrigili numiane?

¹⁸ Pasapukwanaku ki Titu mwa lrikape numiane, ku drumane ku laretesane la patupapalraku iniane. Ku Titu walrilrigilinga numiane pakai ku akaesadhaneini? Ku tapiane nai kaika mararaamau ku takidremedremane? Ku tapudrapalane nai kaika thadalrane?

¹⁹ Lu kidremedreme numi mia nai kau ngiapapasikaikai kawriva, ku patengatengane kaika miyaiya kwini! Ikai cucubungu ki Twaumase amia nai ku iya kwini taiyane ki Kirisitu naiane sikakathane. Laretesane! Ku piapia nai patuelre apadilane numiane.

²⁰ Mwakuludraku lu mwaku drele numiane, si kai mamamwa ku sidramadramali; si lu drele numi nakwane, la kai mamamwa ku sidramadrama numi. La ukuludraku drele ku rivwane, pathalrane, ngikamianane, ngipapakaesadhane, twalilisi, ngiapalapalai ka vaga, wadradrarane, si wavangavange tulilisi.

²¹ La mukuludraku lu kelangaku ngusela, ku Twaumaseli lri malra nakwane picucubungu numiane pakiarubwane; lai lri tara kwalri kai kidremedremeli si tubi ngwalai kwidra ki lapasalriu ku siaswalane, wacapange ki sawvalai ki ababai, pangialralraingi turamuru ki kinawmasane, pakeela kai kadrwana ku tangitatupelane.