2 Kurintu 11 - Ngudradreadrekadhane Ka Sisiu 魯凱語聖經

Pawru si kaika patengane ka nisikawlane

¹ Anatumane la kiadili numi pacepe nakwane, adravane ka patengane ikai ku tikiane ku kakulrunguli, masalrwaku ka lri dulru numi pacepe!

² Ku dalamaneli numiane pakela ki pathalra, mararaamau ku tapangimiane ki Twaumase numiane. Asi lwiyane mia numi ki mabula ka tawvailekete, lri pakitusiasilanganaku numiane baai ki tangea ka taelrelre, ka amani ku Kirisitu.

³ Ai amani lu kipangilisiane kwi kidremedreme numi, si cilri ku tasalikavaevane arakai ku bulane kilibake ki Kirisitu, mia ki Iva kilrilrigili ki sulrau.

⁴ Asi lwiyane lu pangilralraingi numi kudra ki umawmase kela pelaelaela ku maelane ka Yesu, ka kaika amani kwidra pelaelaela nai, la kiriimu numi kiadili pacepe; yakai ku maelane ka ri si maelane ka hukuingi, makakaela kudra pelaelaela nai numiane, la mialri numi kiragai tarumara!

⁵ Masalrwaku kadrwa ku kaika tadulrwaneli kiramau kudra sabebelengenga numiane ka “Lanisikawlane”!

⁶ Alau kainaku ka malrigili kawriva, ai ikai ki thingalane kainaku ka makukulrungu ki palrapalra; kikai, yakaiyaku ki makaelaela ki awngane padrelenga numiane.

⁷ Lu pelaelaelaku numiane ku hukuingi ki Twaumase, kainaku wamalrana ku manemane numiane; ngiatatwalebeaku, pakai ku apabelengane numiane. Bekace ka pasalrivaneli kikai?

⁸ Lu ikaiyaku numiane kawaungu, yakai ku drumane ka kiwkai ku patarwamaramara ku sarakaiyaneli; miakau wavuthanga naku ki drumane ka kiwkai kainganai pasikai numiane.

⁹ Lu ikaiyaku taelre numiane, adravane ikai ku urikaili, kainaku kiatubiana ku akiparalubane numiane. Ku urikaili patuelre baai kudra ki twalai Makidunia ku laretesaneta. Ku siaswalane miyaiya kai, lubibilrili laika miyaiya kai. Lri kainaku aamece numiane lutuumane!

¹⁰ Lri dulrwaku sakai ki yakai ki kidremedremeli ka patengane ka sabulrwane ki Kirisitu kawriva, ku ngitatwadrawli lri kimapelaela salraelre Akaia.

¹¹ Anau iya kikai? Bekacaku ka kai madalame numiane? Ku Twaumase wathingale, ka madalamaku numiane!

¹² Lri pacungulaku kikai awnganeli kai, pakai ku kaika adulrwane ngitatwadrau kudra “Lanisikawlane” niyaiyane, ka mararamau kai piapia nai amiamia naiane.

¹³ Kikai laumawmase kaika patengane ka nisikawlane; kai lalasu, madraedrangelre ka nisikawlane, matavuvulrucu ku kakwakudhane, ngiakasasiakawkawlane ki Kirisitu.

¹⁴ Ku patengatengane kaika akasamaliane, adravane kai Satange wadulru ngisasubusubu si aledra ka sasiakawlu belenge!

¹⁵ Lakamani kai Satange lu kipabalrithi ngipapangiraeragelane amadringelrese ka sasiakawlu, ki kai mialri ka kadrwa ku akasamaliane. Ku lrika angimiane lini lubibilrili lri tara mamamua ki kakwakudhane lini.

Takipadradresengane ki Pawru ku akwalriane

¹⁶ Lri pelanaku kawriva: Ku aneaneane kai lri maka tumakulrungu nakwane. Alaiyasi lri tumakulrungu numi nakwane, pwa tumakulrungu nakwane, lanau aru ngitatwadradrawana.

¹⁷ Kikai iyaiyali kikai vaga kwini kaika taiyane ki Tamatama nakwane; lu iyaku kai ngitatwadrau maru amaningaku kwidra makulrungu ka wabusabusabusu.

¹⁸ Kikai takalranga kai arakai kai ngwakawmasane dradrarane, alu kamaniaku asalu dradraranaku.

¹⁹ Yadrepele numi ka talrilrigili, la dulru numi kiadili pacepe ki makulrungu!

²⁰ Adravane ka aneane ku twaduri numiane, ku waravase ribici numiane, ku twalilisi numiane, ku twadreadrekase numiane, ku wacamilrigi numiane, wadulru numi kiadili pacepe.

²¹ Ala nau iya ku matikiarubwane ka vaga, ku miyaiya kikai, kadrwa ku garangane nai katwase pia. Ai, alaiyasi ikai ku umawmase ku wathuru kagagarange ngitatwadrau ikai ki manemanenga, ala nau iyaku makulrungu ka vaga, lri mialriaku ka thadalrane ikai ku garangane.

²² Kwi lalasu swa Hiburu? Mialriaku. Kwi lalasu swa Iseraylri? Mialriaku. Kwi lalasu lagagane ki Aberahame? Mialriaku.

²³ Kwi lalasu sasiakawlu ki Kirisitu? Lu paramurane kawriva, ala amaanilringaku! Makwalrialri kai awnganeli, ku tasanguthane kiemenge makaakalra, si kai telrai kilrumai, laka makaakalra ku tamwaneli ku sapapacai.

²⁴ Kialrumainga naku kingilrimale ki swa Yuda, lu lrumai sangu vale la singikai ki kakudhane kingi 39;

²⁵ La kilrumainga naku kiara ukudru kingitulrulu ki swa Ruma, kiara lrenegengaku kidukulru kingivale ki umawmase, la kingitulrulu kipakwalri ikai ki laveke, si kingivale makavale kavakavakavange ikai ki acilai.

²⁶ Kai tamubababadhananeli, ngialribatenga naku ku matiwkuludrane ki telebe, si sadre, yakai ku twalai ki swa Yuda si sakamaelanane ka umawmase ku la sapapacai, yakai ku sapapacai ikai ki maadrau ka cekele, ku sapapacai ikai ki ubulane, sapapacai ikai ki laveke, si sapapacai twalai kudra ki ngiakaretetetesanane.

²⁷ Ikai ki awnganeli la ikai ku akwalriane, kai telrai taleare, kiadili ki silravane, pakakadrwa ku akaneane, kadrwa ku nataikaiyanenga, kadrwa ku sakabungane ki kinawmasane ku laimai.

²⁸ La kaika kathane kai, makalithianaku ku awngane ki lakiwkai, mia ki amece ka matelrege ka wadrepete ki kinawmasaneli lukakaiyaiya.

²⁹ Aneane ku twaramuru, si la kainaku turamuru? Aneane ku pasalriu, si la kainaku kakalithi kipakwalri?

³⁰ Alaiyasi lri tara ngitatwadravaku, maesaesai ngitatwadravaku kudra la yakai nakwane utaluvaivai ku turamuraneli.

³¹ Ku Tama ka Twaumase ki Tamatamata ka Yesu amani ku lrika palralrawlrawthu kidrengedrengere; wathingale ka kainaku madraedrangelre.

³² Sa ikaiyaku Damasekuse, ku umawmase ka mabelenge ki kwapingi ki talialalai ka Arita siakawlu ki tarakadrekadrenge ka kwapingi si pakadrenge sanaka lrawlrawdru ki cekele, lri pwalra nakwane.

³³ Ai yakai ku umawmase ku arakai ku karadrare si patwalai ki lribange ki raedre ki kepale pulrailrai pulebe nakwane, la maka muberaku iniane.