2 Kurintu 10 - Ngudradreadrekadhane Ka Sisiu 魯凱語聖經

Ku Pawru pasiakai ki awngane kidrikisi ku vaga

¹ Kwaku ka Pawru lri pasapukwanaku numiane. Masulrapele amia numi nakwane lu ikaiyaku taelre numiane, maelathe la iya numi nakwane lu kainaku ikai taelre numiane; kikaiasasane lri arakaiyaku ku sulrapelane si sakialibake ki Kirisitu kitubi numiane:

² Ku murikaili anikai ngilisiane ku vagali lu mwa ku numiane, lri tara dulrwaku akucaeme puvaga kwidra ki wapwapwale pangwa kawmasamasane ku tatumanane lini amiamia naiane ku umawmase.

³ Unu panianianiaketa ikai kawmasane, ai kai kidrikidrikisita kikaruburu kaika twalai ki ngwakawmasane ka kidremedreme.

⁴ Ku sakikaruburaneta ku adreme kaika ngwakawmasane, amani ku puku ki Twaumase ku adreme, lri dulru buruku kabebetethe ku makeecenge ku kepale ki takwapingane. Lri burukuta patuelre ku nitavuvulrucane ka sadrikisane ka vaga,

⁵ la pawkadrulu patuelre kudra watelenge ki palrapalra ku athingalane ki Twaumase sanaka ngiakamiane ka vaga. Lri tara maalrata ku takidremedremane ki sanaka aneane, si papasalaladha ki Kirisitu.

⁶ Pakela ku akitulrepengane numi pasalaladha, ala lri pathavungu nai kudra la kai pasalaladha ku umawmase.

⁷ Kunumi yai ngwabebeelenge numi drele ki lamanemane. Alaiyasi ikai ku umawmase ku swakaiyaku ki Kirisitu amia, kwini lasu lri kidremeedremeana tupela, kwi lasu ku takaswakaiyanane ki Kirisitu, kuta la mialrita ka swakai ki Kirisitu.

⁸ Ku baai ki Tamatama ku kingidri ngukai ki awngane yai abulrwane tuumawmase numiane, kaika atulisiane kabebetethe numiane; lakamani, adravane pasilribataku ku tikiane drengedrengere kikai kingidri ki awngane, lri kainaku kainu.

⁹ Kai tatigamianeli kikai wakukukuludru nai numiane madha iyaiya.

¹⁰ Yakai ku amia kai, “Kai Pawru lu tigami, pakialringau kakecenge si la kakawlukulu, ai ku takaumawmasaneini athingalane turamuru ka kadrwa ku puku, la akulisi ku vaga!”

¹¹ Ku amia kai kawriva ku umawmase ani thingale, lu kai nai ikai numiane kwini yai, ku taiyane ikai ki tigami, si lu mwanga numiane kwini ku lrika apiane yai mararamau.

¹² Laikisumaali kai nai wathuru kitilibi kikalrumale kudra la ngiatatusaniange ku umawmase. Kwi lalasu tengatengane ka kadrwa ku pulringalringau, ngiamamalra ku leketeini si ngilalekete, si ngipapakilekelekete!

¹³ La kunai, ku ngilralrigu nai kai nai lri ngipaparamuru palribate kudra ki taalikaiyane, ka giase ki Twaumase si baai naiane kudra tangukaiyane; kikai tangukaiyane paelre ku takaungane ikai numiane.

¹⁴ Kudra yakainga numi kikai adringi, lu baai nai numiane kai hukuingi ki Kirisitu, kaika nipasilribatane ki pagisane.

¹⁵ Papianga kudra tali latadre ki takelretane naiane, kudra tulrepengenga ki palrapalra ku awngane kai nai wathuru ngilralrigu. Kathane ku adilane ki salrwane numi ku sidramadrama nai, ku lrika adulrwane nai ikai adringi kudra nikelretane ki Twaumase si pacungucungulu paruswadrau ikai numiane kudra awngane.

¹⁶ Lukamiyaiya kai, lri dulru nai malra kikai hukuingi si pelaela padaruru ki talidrumane, la kai arakai kudra tatulrepenganenga ki palrapalra si ngilralrigu.

¹⁷ Mararamau ku taiyane ki Sisiu, “Aneane ku lri ngilralrigu, lri kamani ku walrigu ku takaungane ki Tamatama!”

¹⁸ Asi lwiyane, ku patengatengane ka alrigwane amani kwidra drengedrengere ki Tamatama ku umawmase, kaika amani kwidra tara ngibabusabusabusu ku umawmase.