2 Kurintu 1 - Ngudradreadrekadhane Ka Sisiu 魯凱語聖經

¹ Kunaku ka Pawru, ka pangwakaiyaku ku kidremedreme ki Twaumase si anisikawlane ki Yesu Kirisitu. Tadrusa nai ki retesaneta ka Timuthi si tigami baai ki yakai Kurintu cekele ka kiwkai ki Twaumase si yakai Akaia makanaelre ka lasinzia.

² Ku migemi si sulivatane ki Tamaita ka Twaumase si Tamatama ka Yesu Kirisitu ani baai numiane.

Ku Pawru kiaseasene ki Twaumase

³ Maelanenga ki Twaumase ka Tama ki Tamatamata ka Yesu Kirisitu! Mathalrai ka yabelenge ka Tama, laka tatwaladhane sanaka sasasaane.

⁴ Ikai ki la akwalrianeta, wasasa mitane, la maka dulruta arakai ku baai ki Twaumase mitane ku sasasane, si katwase sasa ki kiapadradresenge ki la akwalriane ku umawmase.

⁵ Mia ku tatupapalraneta ki Kirisitu kipakwalri ku makaalra. Maiyalrita lri pangukaita ki Kirisitu si tarumara ku makaalra ku akisasane.

⁶ Alaiyasi kipadradresenge nai ku akwalriane, kwini yai pakai ku lrika akisasane numi, si kipalribulu; alaiyasi kisasanga nai, lri mialri numi kisasa, si sapukwane kiadili ku kipadradresenge nai ka akwalriane.

⁷ Ku salrwane nai numiane kai ngiavelevele; wathingale nai, ku takisapalrane numi ku sakwalrialri nai, lri mialri numi kisupilri ku takisasane nai.

⁸ Laretesane, ana thiingale amia nai numiane, ku paswalala ikai Asia sa kipadradresenge nai ku akwalriane. Kudra wadrepete ikai ki kinawmasane nai ku amece matelrege turamuru, adravane ka apanianiakane kadrwanga ku asidramane.

⁹ Lu kidremedreme nai lri kipapacainga nai. Kudra ngimiyaiya kai wathingale nai ka kaika amaka dulrwanenga ngisasudralru, kathane ku pasiaela ki wapacai ka Twaumase ku asudralrwane.

^10-11 Kai lasu napatwalai ki matiaukuludru ka apacadhane palribulu mitane, lukabibilrili lai palribulwana; sana arakai numi ku inulri numi paralubu naiane, masalru nai kai Twaumase lubibilrili lri palribulwana. Lukamiyaiya kai, takaalra ku umawmase ku pasiakaikai naiane inulri, ala dulru nai kisubulrubulru, lai lri tara ikaai ku takalra ku umawmase ku pasiakaikai naiane kiaseasene ki Twaumase.

Twapela ku kikakeini ku Pawru

¹² Ku ngilralrigulrigu nai, kikai tapathingalane pelaela ki mathaithariri ka kidremedreme nai: Amani ku takaumawmasane nai ikai kai kawmasane, inilringa kudra tamangangimianeta, kiamaililuku kudra baai ki Twaumase ku bulane si nipasingikidremedremane, ala kilakikai migemi ki Twaumase ka puku, kaika ngwakai ki lrigilane ki kawmasane.

^13-14 Ku pacase nai si baai numiane, pakeakeela ku lrika adulrwane numi silrigu, ku adulrwane numi thingale. Kikai asasane ku thingale numi taingeangeaneana, mwarikaiyaku ku athingalane numi patuelre lubibilrili. Luka miyaiya kai, ikai kudra ki akelane ngusela ki Tamatama ka Yesu ku vai, lri lrigu numi naiane, mia ku talrigwane nai numiane.

¹⁵ Kudra yakainga ku salrwane ka miyaiya kai, wakikakaku ku apaswalane papia numiane lrikape, lanu aru kadrau ku akiragadhane.

¹⁶ Lu papiaku Makidunia, lri paswalaku ngukakai numiane kwini, lu siwlriwlringa naku lai mwa naku ngusela ngusivale, lanu paralubu nakwane papia Yuda.

¹⁷ Kikai kikake kai, aneane kulri kawriariva twadreadrekase iya nakwane? Kai kikakeli ki kikai bekace ka ngwalai ki ngipapakaesadhaneli, ka apapiyaiyaiya, ka unu iyaiya si ini iyaiya?

¹⁸ Lri papiaku ki patengatengane ka Twaumase si kawriva, ku tapuvaganeli kaika “Unu” si la kai ka “Ini”.

¹⁹ Asi lwiyane kudra pelaelaela nai ki Silra si Timuthi pangukai ki Lalake ki Twaumase ka Yesu Kirisitu kaika amani kudra “Unu” si laka “Ini”. Ngiabalre, kwi lasu amani kudra “Unu” ki Twaumase.

²⁰ Ku palrainginga ki Twaumase yakainga ki kinawmasane ki Kirisitu patuelre a “Unu”. Lakamani, satalu nai ku taiyaneini “Amingi” iya, si lrigu ki Twaumase.

²¹ Ku Twaumase papia mitane kiketekete, ku tacekecekelaneta lu ikai adringi ki Kirisitu; wamalra mitane pakitukudha,

²² la puhange patuthingale pikai ki kinawmasaneta ku hangeini, si patarumara pulebe ki Siri pikai ki kidremedremeta, tusapelaelane ku pasikaikai mitane padulru sanaka maneemane.

²³ Kiatubiaku ki Twaumase ku apasikaiyane nakwane siwmi; alaiyasi kadraedrangelraku, lri pathavungu nakwane. Ku kalrithetheli si kai mwa Kurintu pasiakaiyaku numiane.

²⁴ Kai nai ka lri drekase ku akasalrwane numi ku manemane, asi lwiyane kwi salrwane numi mapapedrengenga. Ngiabaalrelringa nai kamani kulri ka ataelreaneta kaungu maparawralubu, pakai ku akiragadhane numi.