1 Tisaruniki 5 - Ngudradreadrekadhane Ka Sisiu 魯凱語聖經

Padulru ku akidredresengane ki Tamatama ku akelane ngusela

¹ Laretesane, pangukai kikai ku lrika angimiane ku vai, kaika ara tigamiane pelaela numiane,

² asi lwiyane ngiathathingale numi, ku akelane ngusela ki Tamatama ku vai lri mia ki tarakupawpa ikai ki maungu pangitutuluku kainganai.

³ Lu iyaiya kai makanaelre, “Kai matumane masulivaliivate patuelre” iya, ku amatikurwane lri pangitutuluku kela, mararaamau ki lri tulalake ka ababai lu kiangeange si lri padaalrunga tulalake. Kwi lalasu kai lri maka ubere lutuumane.

⁴ Ai, laretesane, kai numi yakai ki kadradridrimitane panianiake, kudra vai kai lri ngimia ki tarakupa pangitutuluku kela.

⁵ Swakai numi ki ledra makanaelre, ka swakai ki vaiyane. Kaita ka swakai ki maungu, la kaita ka yakai ki dradrimitane panianianiake.

⁶ Lakamani, takai ngimia ki palrapalra kasipepelrenge ereke, takipapawlringalringau padulru.

⁷ Ku wapece ku umawmase yakai ki maungu apece, ku mabubusuku yakai ki maungu kabusuku.

⁸ Kuta ka swakainga ki vaiyane, tangipapadulru. Lri tusapaidringaneta ki tuku arakai ku salrwane si sakialibake, la sitalrupunu ku sasiadradrama ki akipalribulane.

⁹ Ku Twaumase kai wapilri mitane ku akipathavunganeta iniane, ani kipalribulu amia mitane ngukai ki Tamatama ka Yesu Kirisitu.

¹⁰ Ku Kirisitu pasiakai mitane pacai, pakai mitane, adravane ka wapacainga ka panianianiake, lu kelanga ngusela, lri dulru makanaelre tupapalra iniane panianiake.

¹¹ Lakamani, mapasapukupukwana, maparaluralubu, mia ku tapiapiane numi kaiasasane.

Bibiilrilinga ku sapasapukwanane

¹² Laretesane, kiatubi nai numiane, twakucingalre madu kudra la yakai numiane kwalrialri kaungu, kudra la pilri ki Tamatama si kela bulrubulru numiane ku umawmase.

¹³ Ngwalai ku apasikaiyane ki awngane lini, arakaiya ku madraadrawnga ku usakenane si sakialibake pangibilri liniane. Lukamani numi la mialria makadawdawdalrwa taelre.

¹⁴ Laretesane, lri bulru nai numiane, maelaela madu ku masalrai ku umawmase, si pasapukwane ku masulri ku umawmase, la arake ku twaramuru ku umawmase, si arakai ku sakiadiadili ku kidremedreme pangibilri sanaka umawmase.

¹⁵ Dradreela, sanaka aneanenga madha arakaikai ku ngilisianane pangibilri ki ngialisiane, katamakakalikalithana, si kidremedreme papia ku akatharirane amuesadhane ki palrapalra.

¹⁶ La kirararagadha,

¹⁷ la inulrinulri apalralrawthu,

¹⁸ adravane ikai ki ngitwatumane la tara kiaseasene. Ki kikai yai kelrete ki Twaumase ka kidremedremeini pasikai numiane ka swakainga ki Yesu Kirisitu ka laumawmase.

¹⁹ Madha ruthuruthuku ku awngane ki Siri;

²⁰ madha sidrekadrekase ku kawaungu ki tarapelaelaela ku hukuingi.

²¹ Pudriadringadha makadreele sanaka maneemanenga, la pikai ku mathariri,

²² la cilri kudra sanaka maliisi ku kakudhane patuelre.

²³ Ku amani ku wabaai mitane ku sulivatane ka Twaumase ani pakabula numiane pakitulrepenge, si palakebe ki abake, kidremedreme, si kinawmasane numi, lu kelanga ngusela ku Tamatama ka Yesu Kirisituta lani kitulrepenge, si kakadrwa ku tangilisianane.

²⁴ Kudra wapilri numiane ka Twaumase patengatengane ka asudralrwalrwane, lri tara pangimia ki kikai.

²⁵ Laretesane, pasikaiya naiane inulri.

²⁶ Arakaiya ku bulane matubarengerengerane si papia ki laretesane mwadringadrengai numi iya.

²⁷ Lri pangukaiyaku ku nagane ki Tamatama drekase numiane, papianga ki laretesaneta silrigu kikai tigami.

²⁸ Ku Tamatamata ka Yesu Kirisitu ani baai ku migemi numiane!