1 Tisaruniki 4 - Ngudradreadrekadhane Ka Sisiu 魯凱語聖經

Ku drengedrengere kiragai ki Twaumase ku sikace

¹ Kikai bibiilrilinga, laretesane, patwalainga numi naiane twalralrau ku apangimiane ikai ki tapanianianiakane kikiragai ki Twaumase, ku patengatengane, paiyaiya numi patuelre kikai, kaiasasane, lri pangukai nai ku nagane ki Tamatama ka Yesu pasapukwane numiane, si kitubi numiane tara aru kisamula.

² Wathingale numi, pangwakai nai ki Tamatama ka Yesu ku bulru nai numiane luka manemane.

³ Ku kidremedreme ki Twaumase yai ani kabula amia numiane, si kakadrwa ku ngwakai ki apasalrivane ki sawvalai si ababai.

⁴ Kunumi makanaelre thingala patupapalra ki mabula ka mamamwa ku tapangimiane si ngiraruthuku ku kinawmasane,

⁵ kaika asingikaiyane ku samurikaikai ki kinawmasane, mia ki kai wathingale ki Twaumase ka maelane ku takisuswane ka sinzia.

⁶ Ikai ki miyaiya kikai, madha ikaikai ku kaika kakudhane ku tapangilisianane ki laretesane ku tapaasipunane iniane. Amianga nai numiane, si pakipapawlringau numiane: Ku Tamatama lri tara pathavungu kudra la pasalriu kikai ku umawmase.

⁷ Ku pilri ki Twaumase mitane, ani ikai ki wacapange ki sawvalai ki ababai ku tapanianiakane kai amia, ani alrivilrivi amia mitane.

⁸ Lakamani kudra malrase kikai ki sabulrwane, kaika malrase ki umawmase, malrasenga kudra ki wabaai ku Siri numiane ka Twaumase.

⁹ Ku ngwakai ki akilibakane ki retesane, kainaku lri ara tigami mapelaela numiane, ku Twaumase wabulrunga numiane ku apangimiane numi makilibalibake,

¹⁰ Kunumi laka pangiamianga numi kikai sabulrwane papia palraelre ki swa Makidunia ki laretesane. Ai lri parwakaiyanaku pasapukwane numiane aru kisamula,

¹¹ ngikakidremedrema kakecenge si kisamula kaungu, ku sacekecekelanesu, mia ku tabulrubulrwane nai numiane kunadruma,

¹² lanu kiusakene ki kaiyana kiasusu ki Twaumase, lanu kai sudralru ki palrapalra ku saarakaiyane cekecekele.

Ku Tamatama lri kela ngusela

¹³ Laretesane, pangukai ki wapacainga ku umawmase, anatumane la thingale amia nai numiane, amani lu katelrege numi, mia kwidra ki kadrwa ku sidramadrama ku umawmase.

¹⁴ Masalruta ki Yesu ka wapacai si sielane, lakamani, kasalrwa ki Twaumase kudra la masalru ki Yesu si pacainga ku umawmase lri miya kipaelre ki Yesu karedeedele kiluku.

¹⁵ Kaiasasane lri singikai nai ku sabulrwane ki Tamatama si pelaela numiane: Kuta ka panianianiakeana luka tanguselane ki Tamatama ulebe ku vai, kai lri aswala ki wapacainga ku laumawmase madradresenge ki Tamatama.

¹⁶ Asi lwiyane, ku drekase ki Tamatama sana pulebe, ku kiacapili ki sasiakawlu belenge sana tawtau, ku rapa ki Twaumase sana elrange, ku Tamatama lri twalai belenge mulebe, kudra lamasalru ki Kirisitu si pacainga ku umawmase lri aswala siela,

¹⁷ lai pacungulu, kuta ka la panianianiakeana ka umawmase lai ikaita taelre liniane si kiiluku pwa ki ememe, ikai belenge lai madredresengeta ki Tamatama. Twalainga kwini, laika apalralrawthungata taelre ki Tamatama.

¹⁸ Lakamani, arakaiya kikai miyaiya kikai vaga masasasa.