1 Tisaruniki 3 - Ngudradreadrekadhane Ka Sisiu 魯凱語聖經

¹ Lakamani, kai nai lri maka ukalavanga, kiadremedremenga nai ku pacungulu ikai Athenese.

² La sikawlu nai ki retesane nai ka Timuthi mwa numiane kwini, amani ku papapalra nai kaungu pasikai ki Twaumase pelaela ku hukuingi ki Kirisitu. Ku tangadrane ki tasikawlane nai iniane yai, lri pakakecenge si paralubu ki salrwane numi,

³ lani kai ikai numiane ku ngwalai ki takihakegadhane si aru turamuru. Wathingale numi, kikai akihakegadhane amani ku atara ngukakaiyaneta.

⁴ Sa ikai nai taelre numiane, paswalanga nai pelaela numiane ku lrika akihakegadhane nai. Kaiasasane ku tangimiane si sakaiyana ngimia ku takidremedremane nai mamamwa, kikai yai thingalenga numi.

⁵ Lakamani, ku sikawluli ki Timuthi kainaku lri maka mukalavanga. Ku sikawluli iniane, pakai ku athingalane ku salrwane numi luka ngitwatumane. Kainaku masalru ki Akema ka walrilrigilinga numiane si kakadrwa ku vai ku takaungane nai!

⁶ Kaiasasane, wakelanga kai Timuthi twalai numiane; si matikiragai ku mailukuini ku ngwakai ki salrwane numi si sakialibake. Amia kai takabarengeerane numi naiane, si apikikawriva naiane, mararaamau nai ku sapiakikawriva nai numiane.

⁷ Lakamani, laretesane ikai nai patuelre ki akwalriane, ngwalai nai ki salrwane numi si kipasapukwane.

⁸ Alaiyasi kapapedrenge ku salrwane numi ki Tamatama, lri dulru nai aseasanenga.

⁹ Kunai lri dulru nai pasikai numiane kiaseasene ki Twaumase. Kiaseasene nai iniane, asi lwiyane pakiararagai numi naiane icucubungu iniane.

¹⁰ Piavai nai pimaungu kitubi iniane, ku lrika adulrwane nai katwase drele numiane, si drima pangulwadhane ku urikai numi ikai ki salrwane.

¹¹ Ku Twaumase ka Tamaita si Tamatamata ka Yesu ani kamani ku swadalrane, la nai dulru mwa numiane kwini.

¹² Ku Tamatama ani pikai numiane ku amakilibalibakane si akilibakane sanaka umawmase ku kidremedreme, la adiadili lukakaiyaiya, mia kudra kilibakane nai numiane.

¹³ Lukamiyaiya kai, lri pakapapedrenge ku takidremedremane numi, lu mutakelanenga ku vai ki Tamatamata ka Yesu si lasinziaini, lri dulru ikai cucubungu ki Tamaita ka Twaumase kabula, kakadrwanga ku takapwalane. Amingi!