1 Tisaruniki 2 - Ngudradreadrekadhane Ka Sisiu 魯凱語聖經

Takipuawnganane ki Pawru ikai Tisaruniki

¹ Laretesane, ngiathathingale numi, ku takelane nai lrikape numiane kakadrwa ku taasipunane numi.

² Wathingale numi, sa kai nai mwana kwini numiane, ikai Pilripi kiatulilisi nai, si kitusinalrelreme. Ai, ku Twaumaseta wabaai naiane ku garangane, la kai nai ukuludru sanaka maneemane ku watelenge, la pelaela nai numiane ku hukuingini.

³ Kai pasapukupukwane nai kaika twalai ki kai lri maka ngimia ka kidredredreme, si kai kamani kwidra kai mathariri ku tagathimane, la kai kamani kudra kisanu lrilrigili ki umawmase.

⁴ Ngiabaalrelringa kamani, ku Twaumase wapilri naiane, si sudralru ku apelaelane ku hukuingi. La kamani, ku kawriva nai kudra iyaiya naiane ku vaga sikakathane. Nai kikadalame ki umawmase kai nai amia, kiatubi nai sikakathane ku akiragadhane kudra ki amani ku wadrele ki kidremedremeta ka Twaumase.

⁵ Wathingale numi, kai nai kawarivana numiane ku talravai ku vaga, la kakadrwa ku sekete nai ku ravane; kikai yai ku Twaumase lri dulru tengane iya naiane.

⁶ Nai kidrengedrengere kai nai amia kinaneanenga kai nai kiatubi numiane, kai nai kiatubi ki drumane ka umawmase.

⁷ Kunai ka kiasikawlu ki Kirisitu yakai ku puku nai kitubi ku ausakenane numi, ai saikai nai numiane, masulrapele nai numiane, mia ki tina ka pathuthuthu ki lalalake.

⁸ Ngwalai ku akilibakane nai numiane, kai nai ka pakiasupilri ku twalai ki Twaumase ku hukuingi sikakathane, adravane kikai niake nai lri dulru nai baai numiane, asi lwiyane amani numi ku kathalrai nai!

⁹ Laretesane lri tara pulringawana numi, ku tatungimiyaiyane nai kisamula kaungu ki vaiyane ki maungu, pakai ku lu pelaelaela nai numiane ku hukuingi ki Twaumase, ku lri kaika akwalriane numi siamece.

¹⁰ Papia numiane ka lasinzia, ku vaga nai si kakwakudhane yai mabula, madringelrese, kadrwa ku pwalane. Kikai, kunumi si Twaumase lri dulru numi patengane iya.

¹¹ Wathingale numi, ku tapangimiane nai numiane makanaelre, mia ki tama ku tapangimiane ki lalalakeini.

¹² Pasapukwane nai numiane, wasasa nai numiane, kai nai watelrai pasapukwane numiane ku aikaiyane numi ki tapanianiakane kikiragai ki Twaumase, amani ku wadawlu numiane kainganai kisupilri ku pukuini si lriguini.

¹³ Takiaseaseaseenane nai ki Twaumase, asi lwiyane ku pelaelaela nai ku hukuingi, kialalranga numi, la tarumaranga numi, si kai numi kirimu tarwamarata ku hukuingi ki umawmase iya, tarwamarata ku patengatengane ka twalai ki Twaumase ka hukuingi amia numi, asi lwiyane ku Twaumase yakai numiane ka masalrunga ka umawmase kawaungu.

¹⁴ Laretesane, ku takipadradresengane numi ka lakiwkai ki Twaumase, ka amani ku lasinzia ki Yesu Kirisitu. Yakai numi ki sakacekele numi kitulilisi, mialri lini ka twalai ki sakacekeleini ka swa Yuda kitulilisi.

¹⁵ Kwidra la swa Yuda papacai ki Tamatama ka Yesu si layuginsia, la tusinalrelreme naiane. Kai lalasu pasalriu ki Twaumase, la kitubadha sanaka umawmase!

¹⁶ Kai lalasu la pakela ki watelenge ku apapiane nai ki sakamaelanane ka umawmase pelaela kudra lri palribulu ki sakamaelanane ka umawmase ka hukuingi. Miyaiya kai, kai lalasu kai waretege ku arubwane ku pasalrivane lini, kiatwalrawnga ki ngialisiane, ku sakaelaelane ki Twaumase mwalebenga mwa liniane.

Ku Pawru apia nguselana lrikape mwa kiwkai Tisaruniki

¹⁷ Laretesane, kai takidailane nai numiane kaika atarathainwane, kinawmasane sikakathane ku madadailita, kai kidremedreme nai kadrwana ku takidailane numiane. Mabarengere nai numiane turamuru, si apia dreleana nai numiane turamuru!

¹⁸ Apia mwana nai numiane kwini! Kwaku ka Pawru kaika angusivavaalane ku apisiwlrili drele numiane, ai ku Satange watelenge naiane.

¹⁹ Kunumi amani ku sidrama nai, ku sakiaragai nai. Lu kelanga ngusela ku Tamatama ka Yesu, ku adradrarane nai ku pagamucu kai numi kamaani?

²⁰ Kunumi amani numi ku lrigu nai ku sakiaragai nai!