1 Tisaruniki 1 - Ngudradreadrekadhane Ka Sisiu 魯凱語聖經

¹ Kunaku ka Pawru, taelreaku ki Silra si Timuthi tigami ki swa Tisaruniki kiwkai, ka sinzia ki Tama ka Twaumase si Tamatama ka Yesu Kirisitu. Anu makitu tarumara makanaelre ku migemi si sulivatane!

Tapanianianiakane si salrwane ki swa Tisaruniki

² Tapasikaikaiyane nai numiane makanaelre kiaseasene ki Twaumase ikai ki inulri kai reteretege matikai numiane,

³ ikai cucubungu ki Tama ka Twaumase ngulringau ku tapangimiane numi ku takisuswane, arakai ku sakialialibake numi kwalri kaungu, si ka takakeceengane sidrama papia ki Tamatamata ka Yesu Kirisitu.

⁴ Laretesane, wathingale nai ki Twaumase ka kialibake numiane ka wapilri numiane.

⁵ Kai baai nai kikai hukuingi numiane, kaika ara vaga sikakathane, satalu ku puku ki Siri, si singikai ki sakiapawteatenga ki hukuingi. Wathingale numi makanaelre ku tangimiane ku tapanianianiakane nai sa ikai nai numiane kwini, ani muesai amia nai numiane patuelre.

⁶ Twalralrau numi naiane, si mialri twalralrau ki Tamatama; adravane sa kipadradresenge numi ku sapapacai, yakai numi ki baai ki Siri ku sakiararagai si tarumara kai hukuingi.

⁷ Lakamani, amaninga numi ku takitwalravane ki sinzia ki swa Makidunia si swa Akaia makanaelre.

⁸ Ku hukuingi ki Tamatama kaika kathaane ku ta twaladhane numiane katwase pasivavagai. Mialri ku salrwane numi ki Twaumase, la daarurunga Makidunia si Akaia, si ki ngwadadaili ki ngwadadethe ki lacekele ki matikaikai, ku patengatengane nai kai nai kingikalralenga matikai.

⁹ Mapeaelaelaela matikaikai makanaelre: Sakela nai lrikape numiane kwidra, ku tapangimiane numi pasudalru naiane, si ku tapangimiane numi cilri kwidra ki samiamiange, si papia numi ki Twaumase, la pasikainga kikai ki panianianiake ka patengatengane ka Twaumase,

¹⁰ la sidramadrama ki Lalakeini ka Yesu Kirisitu twalai belenge si mulebe. Kikai Yesu amani kwidra pasiela ki Twaumase patwalai ki wapacai, amani ku pakiadaili mitane ku naika akelane ku sakaelaelane ki Twaumase.