1 Timuthi 6 - Ngudradreadrekadhane Ka Sisiu 魯凱語聖經

¹ Ku asasiakawlu, lri musakene ki tawkini, amani lu ikai ku arakai kikai si tulilisi ku nagane ki Twaumase si sabulrwane nai.

² Alaiyasi ka sinzia ku tawki, ku sasiakawlu madha ngukaikai ku takaretesanane ikai ki Twaumase si tudrekase liniane, aru kisamulaalringa pasikai, asi lwiyane kwini kiapasikai si kaesai ku umawmase amani kudra kadalame lini ka sinzia. Kusu bulrwa ki umawmase si pasapukwane kikai laawngane:

Kaika patengane ka sabulrwane si patengane ka satacekecekelane

³ Alaiyasi ikai ku pasalraelrelre kikai kaika patengane ka kakudhane, kai mamamwa ku kiatulrepenge ka hukuingi ki Tamatamata ka Yesu Kirisitu si tukakudhane nai,

⁴ amani ku ngiatatwabelenge ngitatwadrau, ki kiasaalru ka kadrwa ku thingale. Kikai miyaiya kaika umawmase athingalane ka madalame kidrikisi ara vaga, la kadalame ikai ki pacase siasilape ku tapasalrivane, la ngwalai si daedarepe ku pathalrane ku rivwane, ku atulilisiane, ku akalalavarane,

⁵ si kudra kaimadringelrese ku kidremedreme si waulrawnga ku patengane ku sabulrwane ku umawmase lri ngwalai si ka takirivurivuanenga. Ikai ki kidremedreme lini, ku akisuswane lrawlrawdru ki asatacekecekelanane sikakathane!

⁶ Unu, ku umawmase lu thingale makakelrete iya, ku akisuswane tengane ka lri pakaesai iniane.

⁷ Ku takelaneta kai kawmasane, kadrwa ku niilukane ku manemane, lai makadulruta iluku ku manemane patwalai kawmasane katwase?

⁸ Sana ikai ku akaneaneta, ikai ku asimadhaneta, makakeelrete.

⁹ Kudra la pasana satacekecekelane yai twaverevere mwadringi ki akilrilrigilane, kiapwalra ki la kadrwa ku thingalane si yakai ku atulisiane ka murikaiyane ki kidremedreme, lukabilrilinga lri tara urenere si kamudu.

¹⁰ Ku marau ku tacekecekelane yai tatwaladhane ki sanaka ngialisiane. Yakai ku laumawmase ku ngwalai ki ravane ki lapaisu si katwase kidaili ki kadalranane ki takisuswane, la kipakwalrialrialri, si kasuburu ku kidremedreme.

Sabulrwane ki Timuthi

¹¹ Ala kusu yai, amanisu ku kiatukucingalre kiarakai ki Twaumase, la kidaila kilakikai patuelre. Kipasilapa ki pacengecenge ka kakudhane, ki mwasakene paluludu ki Twaumase, ki salrwane, ki sakialibake, ki sakiadiadili, si sulrapelane.

¹² Ikai ki amakalrwalrumalane ki takisuswane pakaelrea ku puku lailai, ngipapasikai akaci si malra ku palralrawthu ku niake; ngwalai kai ku takidawlanesu ki Twaumase, si icucubungu ki takaalra dredredreele ka umawmase putaluvaivai pelaela kudra mathariri ka takisuswane.

¹³ Ku patengatengane, ku Yesu Kirisitu sa icucubungu ki Puntiu Pilatu pelaelaela, mialri kathariri ku tapelaelane. Ikai cucubungu ki wabaai ku niake ki sanaka manemane ka Twaumase si icucubungu ki Yesu, lri pelaelaku muswane;

¹⁴ Pakaelrea ku kidremedremesu, kakadrwa ku akitakaiyane kikaelaela la paluluda ku takidrekasanesu, pakela ku autaluvaivadhane ki Tamatamata ka Yesu Kirisitu ku vai.

¹⁵ Ku Twaumase lri ikai kudra ki tautakelananenga ka vai si paathingalane iniane, ku Twaumase yai lri kidrengedrengere, tangeangea ka Twaumase, talialalai ki sanaka talialalai, Tamatama ki sanaka tamataama.

¹⁶ Kathaane ku kai lri kalisi kai lri kamudu. Yakai ki kaika amaka dethane ki umawmase ka ledra, kadrwa ku umawmase ku wadrelenga iniane, laka kadrwa ku lri dulru drele iniane. Ku kiwsakenane si palralrawthu ku aerecane ku puku ani papia iniane patuelre! Amingi.

¹⁷ Papia kwidra la maesaesai ikai kawmasane ku umawmase, pakipapawlringava liniane ku kaika angikalrilrigwane lini. Ku asidramane madha satalutalu pikai ki kaika amakasudralrwalrwane ka tacekecekelane, satalwa kudra ki wabaai pangiradhekane pakisupilri mitane ka Twaumase.

¹⁸ Drekasa liniane ku apiane ku mathariri, la pilria ku lamathariri ku awngane, si katwabake baai ki matiakukuru, sana ikai ku aparalubane la paralubu.

¹⁹ Laka miyaiya kai, kwi lalasu amani ku ngiapapasikaikai rubu ku tacekecekelane, pasikai lubibilrili cegecege ku makeecenge ku karwalai, ka maka gemegeme kudra patengane ka niake.

²⁰ Timuthi! Pudriadringadha pangimia kudra tarumarasu ku takisudralrwanesu. Mwabere madu kudra la kai mwasakene ki Twaumase ka kadrwa ku paluludane ku takawrivane si kudra lrigilane niyane ka kai mamamwa ki kakudhane ka nimadrikidrikisane ka vaga.

²¹ Yakai ku laumawmase ku piakainga nai kikai lrigilane amia, ngwalai kai la amuli ku apapiane ki takisuswane. Ku Twaumase ani baai numiane ku migemi!