1 Timuthi 5 - Ngudradreadrekadhane Ka Sisiu 魯凱語聖經

Sikiningi papia ki sinzia

¹ Madha kaelaelaela ki tarudrawdrange; pasapukwana iniane mia lu pasapukuanesu ki tamasu. Papia ki yacengecenge pangialrava ki betakanesu;

² papia ki tarudrawdrange ka ababai pangialrau ku tapangimianesu ki tinasu, papia ki yacengecenge ka ababai sikidremedrema ku mabula ku kidremedreme, mia ku tapangimianesu ki betakanesu ka ababai.

³ Usakena ki walibakane si kai karudrangenga ka ababai.

⁴ Alaiyasi ikai ku lalalake si lagagane ki walibakane ka ababai, kilakikai lavavalake lri paswalana kicawcakwane itavanane ku apangimiane musakene ki marudrawdrange, si pangibilri ki marudrawdrange si ki latumu si lakaingu, asi lwiyane ki kikai kadalame ki Twaumase.

⁵ Ku yacengecenge ka walibakane ka tengane ka kadrwa ku asudralrwane, kathane ki Twaumase ku sudralru, pivaiyane pimaungu inulrinulri, kitubi ku akiparalubane.

⁶ Pangukai ki pasana ngilralrailraingi ku akiragadhane ku walibakane ka ababai, adravane panianianiake, ku patengatengane wapacainga.

⁷ Kusu pangimia kikai bulru liniane, amani lu kikawriariva.

⁸ Alaiyasi ikai ku umawmase ku kai siarapale ki retetesane, inilringa ki lawacekecekeleini, amani ku wacilri ki takisuswane, ka ngililisianeana ki kai kiasusu ka umawmase.

⁹ Pangukai ki walibakane ka ababai ku akipacasane, luka tara manemelenga ku caili papubebelenge pacaasa; kwini lalisu luka kingivavale karudrange,

¹⁰ si luka mathaariri ku takimatikaiyane, ka maru amaaninga kudra ngiathingale lapu si bulru ki lalalake, pasudalru ki singiadaili ka badhabadha, patawdrapale ki sinzia, pakubulu ki kiapadradresenge ku akwalriane ka umawmase, si pakaelre ku puku pia ku makaelaela ku mathariri ka awngane.

¹¹ Ngukai ki walibakane ka yacengecenge, kai lri kipacase, asi lwiyane kai lalisu apiakiwpapalangeana, si apikarudrangeana, la kidailinga ki Kirisitu,

¹² kai pangiamianga ku takiketeketaneini sakapathagilane, la ngwalai si pasalriu.

¹³ Kai lalisu la twalrawnga pasawlra ku vai, si mudaane sanaka lrawlrawdru. Ku kamalilisi lini yai, savagane si raeratenge sanaka maneemane, la kawriva ku kaika aiyaiyane ku vaga.

¹⁴ Lakamani, maesaesai lu pela karudrange ku walibakane ka yacengecenge, si tulalalake lapwana ki lalalake, marasikai ki tacekecekelane, ku kiaecebe mitane ku umawmase lani kakadrwa ku atakaiyane tulilisi.

¹⁵ Asi lwiyane yakainga ku la walibakane ku akabalrithinga ku takidremedremane kudra ki sakapathagilane, si katwasenga tupapalra ki Satange.

¹⁶ Alaiyasi ikai ki daane ki ababai ka kiasusunga ku walibakane ka ababai, lri kamani ku makalithi liniane, madha babaai ki swa kiwkai pasiamece, laka miyaiya kai, kai swa kiwkai ala lri dulru marasikai kudra ki la kadrwa ku tasatalwane ku walibakane ka ababai.

¹⁷ Ka malrigili sangilililuku ka laciwru, inilringa kudra kiasamula ikai ki peaelaela ku vaga ki Twaumase si abubulrwane, lri malra ku nidrimane ku pakalreva.

¹⁸ Asi lwiyane ikai ki Sisiu amia kai, “Ku lwange lu ilrailrathe ku kinitalekane, kaidu watametamenge ku ngudwini”; la iyana kai, “Kudra tarakawaungu lu kipawlrawlrau tangimiamiane.”

¹⁹ Alaiyasi ikai ku nihukukane ki ciwru, sana kai ikai ku tadrusa tatulru ku peaelaela ku umawmase, madha kithathengethengete.

²⁰ Putaluvaivadha kaelaela patuelre ku pasalriu ku umawmase, lani pulringau mukuludru ku drumane ku umawmase.

²¹ Lri ikaiyaku cucubungu ki Twaumase, si Yesu Kirisitu, si sasiakawlu belenge, tukuciingalre pelaela muswane ku apaluludanesu kilakikai sabulrwane, ikai ki lamaneemanenga madha pikai ku apakaelaela ku kidremedreme.

²² Madha cacaapange ansu ki palrapalra, madha mwamwa kipaelre ki pasalrivane ki palrapalra, ngilalakeba ku bulanesu.

²³ Asi lwiyane kwi kinawmasanesu taikaiyane ku caemane, la madha ka taunguulane ku acilai, apaunguula ku bava pingitiiki saparalubane ki bicukasu.

²⁴ Yakai ku laumawmase ku athingalane adrelane ku pasalrivane lini, kwi lalasu kiasaibangenga. La ikai ku laumawmase ku lukabilrilinga lri mutaluvaivai ku pasalrivane.

²⁵ Laka thadaalrane, ku paiya ku mathariri maduai mutaluvaivai, adravane kai athingalane lri kai maka aseketane.