1 Timuthi 4 - Ngudradreadrekadhane Ka Sisiu 魯凱語聖經

Kaika patengane ka tarabulrubulru

¹ Ku Siri pwadriadriingai kawriva, ikai ki bilrilanenga, yakai ku laumawmase ku lri cilri ki takisuswane, si tupapalra ki tarakadraedraedrangelre ka abake si sabulrwane ki aidridringane.

² Kikai sabulrwane twalai ki la tarakadraedraedrangelre, kudra kidremedreme lini lri mia ki kiadrungurunga ka adreme kuculu si pacai.

³ Kai lalasu pakaicilri pakarudrange, la ikai ku pakaicilri lini pakane ku akaneane, ai ku Twaumase ku bekace kilakikai akaneane yai, wabaai kudra ki masalru si thingale kai ki patengane ka sabulrwane ka umawmase kiaseasene si kane.

⁴ Sanaka beekace ki Twaumase mathariri patuelre, ka arakaiyane ku kiaseasene ku kidremedreme si tarumara, inaku madha iyaiya,

⁵ asi lwiyane kai vaga ki Twaumase si inulri ki umawmase wadulru bula kilakikai akaneane.

Makalecege ka sasiakawlu ki Yesu Kirisitu

⁶ Kilakikai alaiyasi pelaelasu ki laretesane, amaningasu ku makalecege ka sasiakawlu ki Yesu Kirisitu, si kudra vaga ki salrwane si kudra tupapapalrasu ka pacengecenge ka sabulrwane lri paralubu muswane paadili ikai ki takisuswanesu.

⁷ Pangukai kwidra la kaika amatikaikaiyane ka nikadraedrangelrane ka vaga si abulru twalai kunadruma mubera patuelre, pasikai ku a kapatengatengane usakene ki Twaumase ka sikace la ngipapakicawcakwane.

⁸ Mathariri kai akicawcakwanane ki kinawmasane, ai mathaithariri kai akicawcakwanane ki takisuswane, asi lwiyane maadrau ku taparalubane kai ki tapanianianiakane kai kawmasane si apanianiakane lubibilrili.

⁹ Kikai vaga yai patengane ka matiadralru, ka adulrwane madu tarumara.

¹⁰ Lakamani, ku kwalri nai kisamula, si ku sasiadradrama pikai ki palralrawthu panianiake ka Twaumase, amanini ku Takipalribulribulane ki sanaka umawmase, laka makadrwadrwa ka Takipalribulribulane kudra ki masalru iniane ka umawmase.

¹¹ Kusu malra kilakikai pelaela liniane si bulru liniane.

¹² Madha kitulavavalake. Anika vaga, ka tangivelevelane, ka sakialibake, ka salrwane, ka bulane ki maneemanenga patuelre atakitwalravana ki sinzia.

¹³ Kusu la kisamula ki la asilrigwane ki Sisiu, ki asikivane si abulrwane, ku la miyaiya kai ku awngane, pakela ku akelaneli.

¹⁴ Madha sidreadrekase ku baai ki Twaumase ku awnganesu, kikai baai ki Twaumase ka awngane ngwakai ki sakalai ki yuginsia si taanswane ki laciwru si baai muswane.

¹⁵ Kilakikai salikavaeva ku kidremedremesu katwase kaungu, ani dredrele ku laumawmase ku taadilanesu.

¹⁶ Kusu kipapawlringava, kudra tabulrubulrwanesu la kidradremedrema. Laka palralrawtha pia kilakikai, lu piasu kai, lri dulrusu ngipapalribulu, lai lri dulrusu palribulu kudra kialalalra muswane ku umawmase.