1 Timuthi 3 - Ngudradreadrekadhane Ka Sisiu 魯凱語聖經

Taramasasangililuku ki kiwkai

¹ Kikai vaga yai pacengecenge. “Aneane ku nau ka taramasasangililuku ki kiwkai amia, amani ku akulikuli pusamalra ku vaeva ku mathariri ka awngane.”

² Ku taramasasangililuku ki kiwkai lu ka kadrwa ku atakaiyane kikaelaela. Lai savaeva ku taelrelreini, mapapedrenge ku takaumawmasaneini, wadulru ngiraruthuku, pangiamia ki kakwakudhaane ku tapanianianiakaneini, si kiragai pasudalru ki badhabadha. Malrigili bubulru,

³ kaika tara ungulu kabusubusuku, kaika tara kikalisi lrumai, masulrapele ku takaumawmasane, kai marau ku lapaisu.

⁴ Luka ngiathiingale marasikai ki tacekecekelaneini, si kalrigili bulru ki lalalake, kwi lalalake la dulru pasalaladha patueelre.

⁵ Ku kai wathingale marasikai ki tacekecekelaneini, ara dulru marasikai ki kiwkai ki Twaumase?

⁶ Ku taramasasangililuku ki kiwkai kai mwadringai luka tawkisususu, amani lu ngikalrilrigu ku kidremedremeini, si ngukakai ku tangukaiyane ki Akema si kitupasalrivane.

⁷ Kai lasu ikai ki kaika sinzia laka mialri kathariri ku takimatikaiyaneini, amani lu kitulilisi, si ulrabuku mwa ki Akema.

Taraparaluralubu ki kicapili ki kiwkai

⁸ Ku taraparaluralubu ki kiacapili ki kiwkai luka makaleecege ku takaumawmasane, si lu kawriva laka patengatengane, la kai kabusubusuku, kai kararau ku zaisange;

⁹ nai arakai ku bulane ku kidremedreme si paluludu pangiamia ku kaika athingalane ka matiasamaimali ku takisuswane.

¹⁰ Kai lalasu lri paswalana kikithiathingale, luka kadrwa ku akitakaiyane kikaelaela ala lri maka dulru kipuawngane.

¹¹ Ku lalabaibai lini lai mialri ka mathariri ku takaumawmasane, kai kawriariariva ku cacapange ku vaga, lri kapapedrenge, matisudralru.

¹² Sanaka taraparaluralubu lri tangeangea ku taelrelreini, si laka ngiathingale bulru ki lalalake si marasikai ki tacekecekelane.

¹³ Kudra mathariri ikai ki takaungane ku taraparaluralubu lri kimatikai, lai dulru kagarange pelaela ku takisuswane lini papia ki Yesu Kirisitu.

Maadrau ka kaika athingathingalane ka matiasamaimali

¹⁴ Takwapacapacasaku kikai tigami, si apisarakelakeela drele muswane;

¹⁵ alaiyasi mwadailane, kikai tigamili pelaela muswane, lu ikaita ki daane ki Twaumase ku apangimianeta panianianiake. Kikai daane yai kiwkai ki panianianiake apalralrawthane ka Twaumase, ka ulrudru si karwalai ki patengane ka sabulrwane.

¹⁶ Wathingale makanaelre, kikai kaika athingalane ka matiasamaimali kai kisususuta mwaadringi turamuru: Kwini lasu aumawmase mutaluvaivai, laka Siri ku peaelaela tumadringelrese, kiadrele ki lasasiakawlu belenge. La kimapelaela ki sanaka ceekele, Kiakasalru ki yakawmasane, Kiatarumara pusubelebelenge.