1 Timuthi 2 - Ngudradreadrekadhane Ka Sisiu 魯凱語聖經

Tasukusukubane ikai ki kiwkai

¹ Ku aswalalanga, lri pakipapawlringavaku muswane, pasikaiya sanaka umawmase kitubi ki Twaumase, inulri, atalingikaiyane kitubi, kiaseasene;

² la pasikaiya inulri ki talialalai si kudra yakai ku puku itaetalane ku umawmase, la tadulru kasulivate, karathudu, kapapedrenge, usakene si paluludu ki Twaumase ku tapanianianiakaneta.

³ Kikai yai mathariri, ka kadalame ki takipalribulribulaneta ka Twaumase.

⁴ Ku Twaumase ani kipalribulu sanaka umawmase, si thingale ki pacengecenge ka sabulrwane makanaelre amia.

⁵ Kikai pacengecenge ka sabulrwane amia kai: Vaeva ku Twaumase, ikai ki Twaumase si umawmase kabicelrakane yakai ku tangea ku kadawdalrwane, kaamani kwidra aumawmase ka Yesu Kirisitu;

⁶ ngiacacilri pakai ku apangilralraingane ki umawmase, kikai sapelaelane, lu kelanga ku vai, ku Twaumase ani kipalribulu sanaka umawmase amia.

⁷ Lakamani, kiasikawlaku ikai ki kaika swa Yuda ataradindindu, ka nisikawlane ki Yesu, si tarabulrubulru pakasalru liniane si thingale ku patengane ka sabulrwane. Kainaku wadraedrangelre, kai iyaiyali patengane patuelre!

⁸ Ikai ki latairuburubwane, anatumane lu inulri ku sawvalai, laka patengatengane pubelenge ku alrima si inulri, la kai kalisi, la kai rivu.

⁹ Anatumane ku ababai ikai ki tasilaimaimadhane kadeemele amiaku, madha tumaelaelane ku isiu, si arakai ku kingi silu, nitukucingalrane ka laimai ngiragelane.

¹⁰ Pikaiya ku mathariri ku tangivelevelane, pamamwa ku putaluvaivaisu ku takisuswane.

¹¹ Ku ababai isaselebana kicawcakwane, si pasalaladha sanaka maneemane.

¹² Kainaku palraingi ki ababai lu bulrubulru ki umawmase, lu kicaicapili ki sawvalai, ani isaseleebane.

¹³ Asi lwiyane ku Twaumase paswala kathi ki Adame, ala ka Iva.

¹⁴ Ku kialrilrigili kaika Adame, amani ku ababai, kwi alisu kialrilrigili, baebalre ku drekase ki Twaumase.

¹⁵ Ai, ku ababai alaiyasi ngisasingikai ngiraruthuku, pangimia ku salrwane, ku sakialibake, ku bulane, lri ngwalai ku tatulalakane lapu ki lalalake si kipalribulu.