1 Samuile 9 - Ngudradreadrekadhane Ka Sisiu 魯凱語聖經

Madradrele ki Samuile ku Saule

¹ Yakai ku tangea ku swakai ki zuku ki Biniyamingi, ku naganeini sia Kise; kwini lasu lalake ki Abiele, agane ki Zerure, swakai ki maretetese ki Apia, ka tai Bikurathe. Ku Kise sapaiswane sanaganane.

² Ku Kise yakai ku sawvalai ku lalakeini ka sia Saule, ngiaesaadhane ku tacebeane ka langukathathabarane. Laka maelreelrengenga ki swa Iseraylri.

³ Ku Kise yakai ku piya ku ruba la sakawlrau; kwini lasu la kawriva ki Saule, “Lu iluka ku tangea ku sasiakawlu la karedele mwa silape kwini laruba!”

⁴ Kwini tadrusa la salraelrenga tali lregelrege Iparaime si talikai Salisa, la kai maka kidringai. Kwini tadrusa la pacungulwana silasilape, si lribate kavai talikai Salime, ku ruba la kai ikai kwini. Kwini lalasu la katwase mwa talikai Biniyamingi silasilape, laka thadalrane kai maka kidringai.

⁵ Sakabilrilinga, kwini lalasu la kela ka Zupe, ku Saule la kawriva ki sasiakawluini, “Ila tasiwlringa! Amani ku ama alau kai lri kidredremenga ki laruba, lrika amaningata ku akidremedremaneini.”

⁶ Ku sasiakawlu la kawriva, “Ngiabaladhana. Yakai kai tangea kai umawmase ki Twaumase, kiamusakesakene mitane makanaelre, asi lwiyane sanaka takawrivaneini tara ngiamia patuelre. Ila takivaga iniane, alau lri pelaela mitane ku amwaneta inu silape ki ruba iya.”

⁷ Ku Saule la kawriva, “Lwiyasi lalri mwata kikawriva iniane, manemane ku adulrwaneta baai iniane? Kai lumaseta kadrwanga ku akaneane, kadrwanga ku manemane ku adulrwaneta baai iniane.”

⁸ Ku sasiakawlu la kawriva, “Yakai kai pikaili kai gingi ka paisu. Lri dulrwaku baai iniane, lri maka dulru pelaela mitane ku amwaneta silape ki ruba.”

^9-11 Ku Saule la kawriva, “Mathariri! Ani ila tamwa.” Kwini tadrusa la katwase mwa ki taikaiyane ki umawmase ki Twaumase. Kwini lalasu la katwase papia tali sisiane, salri mudaane cekele la drele ku tapiya ku labaibai ku mwalrwalru, la kivaga liniane, “Kwidra tarasakalai yakai cekele?” (Sakamani kwidra, ku yuginsia kiapasi tarasakalai. Lwiyasi la ikai ku umawmase kulri kivaga ki Twaumase, la iya kai, “Ila takikawriva ki tarasakalai!”)

^12-13 Kwini ababai la tubalre, “Unu, yakai cekele. Kikavai yacucubungu numiane! Lwiyasi la kiraririimu numi dadavace, lri maka padali numi iniane, sana mucekele numi lri kidringai numi iniane. Ku kelaini mucekele kaikameane, ngwalai ki mapapangale kulri ikai lregelrege ka tapatarumaramarane patarumara. Ku mapapangale lri tara mukalava iniane, asi lwiyane kwini lri tara paswala subulrubulru ki sapatarumarane, kwini lalasu ala lri dulru kane ku lamanemane. Lwiyasi kaiasasane la mwa numi, lu kaiyana ikai lregelrege kane ku akaneane lri maka kidringai numi iniane.”

¹⁴ Ku Saule si sasiakawluini sa pacungulu arucucubungu, salri padaalrunga si kela ki cekele, la drele ki Samuile icengecenge papiapia liniane kainganai, lri mwa ki tasukusukubane.

¹⁵ Ku Saule salri makavalenga ala kela kikai, ku Tamatama nawacunu ki Samuile,

¹⁶ “Luiya lumiamia kikai, lri sikawlaku ku tangea ka swakai ki zuku ki Biniyamingi kela kwini muswane. Kusu arakaiyanga ku lawlau padelreme iniane, si pacegecege iniane ka amani kulri rathudu ki mapapangaleli ka swa Iseraylri. Kwini lasu lri palakebe liniane, palribulu liniane pakidaili ki alrima ki swa Pelisitine. Wadrelengaku ki mapapangaleli ka kwalrialri; kialalraku kudra kitubitubi lini.”

¹⁷ Ku Samuile sadrele ki Saule, ku Tamatama la kawriva iniane, “Kikai umawmase amani kudra pelaelaelali muswane ka umawmase; kai lasu lri rathudu ki kawkawluli.”

¹⁸ Kikwini kwidra ku Samuile wakela ithili ki lrawlrawdru ki cekele; ku Saule la arucucubungu kivaga iniane, “Ala nau kivaga, kudra tarasakalai yakaikai inu?”

¹⁹ Ku Samuile la tubalre, “Amaniaku kudra tarasakalai. Ila aswala, la aswalaala mwa ki tasukusukubane. Kaikameane kunumi ka tadrusa lri kabalrulu numi nakwane; luiya luka mialrealre lri tubalreaku kudra kivagasu patuelre, ala lri sateatedraku muswane pukadalranane.

²⁰ Ala kudra namaulrau saka sipakavalane kudra ruba, madha kidredreme, kiakidringainga. Ai, kudra murikaikailringa ki mapapangale ki swa Iseraylri aneane? Amanisu si wacekecekele ki tamasu.”

²¹ Ku Saule la tubalre, “Kunaku swakaiyaku ki zuku ki Biniyamingi, ka titikiyanenga ikai ki swa Iseraylri. Ku wacekecekele nai la mialri ka kaika nipapathurwane ka wacekecekele. Asu kawriva nakwane ku miyaiya kai ku vaga?”

²² Ku Samuile la sangiluku ki Saule si sasiakawluini mwa ki kadaanane, la panene liniane pikai ki madradraunga ka taetalane. Ikai kwini tamatulrulu ku badhabadha, la makitu takaenenenga makanaelre.

²³ Ku Samuile la kawriva ki taramarasikai ki tagagane, “Badhaili kudra cunuli muswane kudra beate pwa kai.”

²⁴ Kwini taraagaga la malra kwini nipawkalrivilane nipilriane ka beate ki vagisi, si pucucubungu ki Saule, ku Samuile la kawriva, “Kikai nipasikaiyane muswane ka beate. Ala kanea! Paukalrivilaku pikai, lri picucubungaku ki labadhabadha si baai muswane.” Kwini sakavai kwidra, ku Saule si Samuile la kabalrulu kane.

²⁵ Kwini lalasu sa twalainga ki tasukusukubane siwlri mucekele, yakai ku umawmase ku pasiakai ki Saule pikai cavalri ki daane padulru ku mathaariri ka tapecane;

²⁶ kwini lasu la ikai kwini apece. Sakaliarenga, ku Samuile la mwa ka cavalri tawtau ki Saule, “Ngidrakala! Nau sateatedre muswane pukadalranane!” Ku Saule la ngidrakale, la tupapalra ki Samuile mwa ki kadalranane icekele.

Ku Samuile padelreme pacegecege ki Saule ka tararathudu

²⁷ Kwini lalasu sakelanga ki thili ki lrawlrawdru ki cekele, ku Samuile la kawriva ki Saule, “Ila aswalala iya ki sasiakawlusu.” Sa katwase kwini sasiakawlu, ku Samuile la kawriva, “Ikaiyana kikai mukalava padaalru, lri malraku ku vaga ki Twaumase si pelaela muswane.”