1 Samuile 8 - Ngudradreadrekadhane Ka Sisiu 魯凱語聖經

Ku mapapangale kiatubi ku acegecegane ku talialalai

¹ Saka tarudrawdrangenga ku Samuile, wacegecege ki lalalakeini tutamagarange ki swa Iseraylri.

² Ku takataka sia Yuile, ku agiagi sia Abiya, tara yakai Bereseba atamagarange.

³ Kwini lalasu la kai twalralrau ku kakudhane ki tama lini, akipaiswane, si malramalra kudra la pavangalre, kai arakai ku aparamaramavane turathudane sikakathane.

⁴ Lakamani, kudra kiacapili ki swa Iseraylri la makanaelre isarubu mwa ka Rama kikawriva ki Samuile,

⁵ kawariva iniane iya kai, “Drela, kikai tarudrawdrangengasu, kai lalakesu la kai twalralrau ku thariranesu. Lakamani kwidra, ala pasikaiya naiane cegecege ku tangea ku talialalai, ani marasikai naiane, mia ki drumane ka lakuni.”

⁶ Ku Samuile la kai kiraragai kwini ki lalasu sa kitubi kwini acegecegane ku talialalai, lakamani ku kitubini ki Tamatama.

⁷ Ku Tamatama la kawriva, “Pasalaladha ku takidremedremane ki mapapangale! Kwini lalasu kaika malrase muswane, malrase nakwane kamani, ani kai atalialalai mitane amia nakwane.

⁸ Twalai ku tasangilukane liniane katwase Izipiti kelanga kikai, kikai lalasu kiadailinga nakwane, si katwase sukubu ki drumane ka twaumase. Kaiasasane kai tapangimiane lini muswane ala amani kai ku tapiapiane lini nakwane.

⁹ Salaladha liniane! Ai kusu tara pangicaema pakipapawlringau liniane, si swacenge pelaela liniane, lubibilrili kudra talialalai lini lu lrika pangiatumane marasikai liniane.”

¹⁰ Ku Samuile la malra kwini takawrivane ki Tamatama iniane nguvavaeva pelaela kwini ki kiatubi iniane ku ani cegecege ku talialalai amia ka mapapangale.

¹¹ Kwini lasu amia kai, “Kwini talialalai numi lri pangimia kikai marasikai numiane: Kwini lasu lri dawlu ki lalalake numi ka sawvalai mukwapingi, lri ikai ku tarangipalridingi, lri ikai ku tarangurigi, lri ikai ku taraathamadalane.

¹² Kwini lasu lalri sikawlu ku lrika kiacapili, yakai kulri iluku ki takudrulu ki kwapingi, yakai ku lri iluku ki tamalrimale ku kwapingi. Ku lalalake numi lalri pasikai liniane kaungu, si pasikai liniane kitaleke, lri pasikai liniane darepe ku sakikaruburane ka adreme si palridingi.

¹³ Ku lalalake numi ku labaibai lri pasikai iniane tusapasanguesaesadhane, tudamai, akame ku pange.

¹⁴ Kwini lasu lalri malra kudra mathaithariringa ku angangade numi, si babudwane, maulriwlrivane ka umawma si baai ki lasasiakawluini.

¹⁵ Kwini lasu lri malra ku la taleke numi, budu kudra taingeane ki nipau mangealane baai ki tabebelenge ki daane ki talialalai si drumane ka latabebelenge.

¹⁶ Kwini lasu lri malra iluku ki lasasiakawlu numi, kudra mathaithariringa ka nilapulapwane, si ruba, si pasikaikai iniane kauawngu.

¹⁷ Kwini lasu lri malra ku la kiusu kudra taingeane ki nipau mangealane, ala kunumi lri aduringa numi iniane.

¹⁸ Luka amaninga kwini, lri ngwalai numi kudra tapaacegeceganeli pasikai numiane tutalialalai si tubinga kitubi, ai ku Tamatama kai lri kilalranga kudra sidruru numi.”

¹⁹ Ku mapapangale la kai kirimu kilalra kudra vaga ki Samuile, ngiabalrelringa tubalre, “Ini, lri ikai ku talialalai nai!

²⁰ Ala lu ngimia kikai, lrika miyaiya nai ki drumane ka kuni ikai ku talialalai marasikai naiane, si sangiluku naiane kikaruburu.”

²¹ Ku Samuile sa kilalranga kikai vaga lini la kirimu pelaela ki Tamatama.

²² Ku Tamatama la kawriva, “Singikaiya ku tamurikaiyane lini si baai ku talialalai liniane!” Ku Samuile la pakatwase kwini ki swa Iseraylri siwlri mutavanane.