1 Samuile 7 - Ngudradreadrekadhane Ka Sisiu 魯凱語聖經

¹ Kudra swa Kiriathe Yerime la malra tarumara kwini Langiane ki Tamatama, bulri pwa ki taluvale ka tikiane ka lregelrege, pikai ki daane ki tai Abinadabe. Kwini lalasu la pawkalrivili pilri kwini ki lalake ki Abinadabe ka Ilriazare kadrekadrenge ki Langiane.

Ku Samuile warathudu ki swa Iseraylri

² Ku Langiane ki Tamatama maulai ikai Kiriathe Yerime, ikai ku taramapusale ka caili. Ikai kikai, ku swa Iseraylri papiapia ki Tamatama kitubi.

³ Ku Samuile la kawriva ki mapapangale ki swa Iseraylri, “Lwiyasi la salikavaeva ku kidremedreme numi papia ki Tamatama, lri tara cilri numi kwini twaumase ki badhane si samiamiange ka ababai ka twaumase ka Asetarete. Kunumi pakanaelrea ngipapatarumara ki Tamatama, kathane ku amarasikaiyane numi. Lumia kikai, lri palribulu numiane pakidaili ki sarathudane ki swa Pelisitine.”

⁴ Ku swa Iseraylri la makitu mwalra ku samiamiange ki Baale si Asetarete, laka kathanenga ku Tamatama ku sukusukubu.

⁵ Ku Samuile wasarubu ki swa Iseraylri mwa ka Mizepa, si kawriva liniane, “Lri ikaiyaku kavai pasikai numiane inulri papia ki Tamatama.”

⁶ Kwini lalasu la makitu irubu mwa ka Mizepa. Kwini lalasu la vau ku acilai la ubu picucubungu ki Tamatama, tusapatarumarane, si laisi makavaale. Kwini lalasu amia kai, “Pasalriu nai ki Tamatama.” (Kwini Mizepa amani kudra taikaiyane ki Samuile marasikai turathudane ki swa Iseraylri.)

⁷ Ku swa Pelisitine la kilalra ku swa Iseraylri ka yasarubu ikai Mizepa, kudra talrima ku tarasangililuku ki swa Pelisitine la iluku ku kwapingi mwa kikaruburu liniane. Ku swa Iseraylri sa kilalra kikai sa pelaelane la mukuludru turamuru,

⁸ la kawriva ki Samuile, “Ala parwakaiya pasikai naiane inulri papia ki Tamatama ka Twaumaseta, kitubi iniane palribulu naiane kidaili ki swa Pelisitine.”

⁹ Ku Samuile la culu ku vaeva ku lrulai ka kiu tu Lama ka lrisi patarumara ki Tamatama. Kwini lasu kiatubi ki Tamatama paraluba ki swa Iseraylri iya; ku Tamatama la tubalre kudra kitubini.

¹⁰ Sa patarumaramara ku Lama ka lrisi ku Samuile, ku swa Pelisitine la kela kikaruburu. Sa icengecenge kwini, ku Tamatama la patwalai belenge ku dreredrere mwa liniane, la malra liniane pakalrithavulu katwase mubere siwlri.

¹¹ Ku swa Iseraylri la twalai Mizepa ngibwale, katwase saladha ki badha ka swa Pelisitine padethenga ka Bithekare, tara kadadalranane papacai liniane.

¹² Sakabilrilanenga, ku Samuile la pikai kabicelrakane ki Mizepa si Sene cegecege ku vaeva ku lrenege, la iya kai, “Ku Tamatama taparalubane mitane”, lakamani ku sunagane kikai ki lrenege pasi “Ibinezere”, ku patharevane yai “Paralubu ka lrenege”.

¹³ La mia kikai, ku swa Pelisitine la kipamalebenga. Ku tapanianianiakaneini ki Samuile, ku Tamatama kadrwa ku tapakelanenga ki swa Pelisitine kikaruburu ki kadaengane ki swa Iseraylri.

¹⁴ Twalai Ikerungu kela Gathe, kudra kiamalra ki swa Pelisitine ku cekele makitua sawlringa baai ki swa Iseraylri. Si taelrenga karawrawrathudu ki swa Kanange.

¹⁵ Ku Samuile ku taikaiyaneini kawmasane atamagarange sangiluku ki swa Iseraylri.

¹⁶ Kwini lasu luka caili tara matwase lrilriu lidrau ka Bithele, Gilegale, si Mizepa, ikai kilakikai marasikai turathurathudane.

¹⁷ Lu maka lrilriu lidrawnga, kwini lasu tara mwa balriu mwa ka Rama, ikai kwini atamagarange. Kwini lasu la pikai Rama cegecege ku taluvale ku tapatarumaramarane ki Tamatama.