1 Samuile 6 - Ngudradreadrekadhane Ka Sisiu 魯凱語聖經

Wasawlri ku Langiane

¹ Ku Langiane ki Tamatama kudra nitarapitwane ka dramare ku taikaiyane kavai Pelisitine,

² ku swa Pelisitine la dawlu ki barakalai si taratulrisilrisi ku angimiane kela, la kivaga liniane, “Kikai lri pangitumane nai marasikai kikai Langiane ki Tamatama ki swa Iseraylri? Lwiyasi la malra nai sawlri pwa kudra ki nataikaiyane, manemaneana ku lrika apatupapalrane nai?”

³ Kwini lalasu la tubalre, “Lwiyasi lri sawlri numi kwini Langiane ki Twaumase ki swa Iseraylri, laibekace lri tara ikai ku sapatupalrane ku sathavungane sasukubane kudra ki pasalrivane, madha ka kathane ku Langiane ku nisawlriane. Lu mianga kikai, kwini caemane numi lri mudringai, si lalri thingale numi ku Twaumase aningithanga kai telrai pathavungu numiane.”

⁴ Kwini swa Pelisitine la kivaga, “La lrika manemane kudra sasukubane nai ki pasalrivane nai?” Kwini lalasu ala tubalre, “Lrima ka niara kingiane darepe tupu si lrima ka niara kingiane ka tila. Kwini vavaeva ka nipangialravane ki pu si tila atalingikaiyane ki tangea ki tarasangililuku ki swa Pelisitine, asi lwiyane kwini thadalrane ka swalrubu ka wamwa ki kinawmasane numi si la tarasangililuku.

⁵ Kunumi tara pia kwini nitumiyaiyane ki pu si tila ka mabebetethe ki angangade numi, la papia ki Twaumase ki swa Iseraylri ngipapelaela ku pasalrivane numi. Lu mia kikai, alau kai lri kirimunga pathavungu numiane si latwaumase numi, si la kadaengane numi.

⁶ Anu ngithanga ngipapakwalri mia ki talialalai ki swa Izipiti si swa Izipiti kudra kelrathane lini? Madha karimurimuru ku Twaumase watumane kiecebe liniane, pakela ku tapalraingane lini ki swa Iseraylri katwase ka Izipiti.

⁷ Lakamani, kunumi padulrwa ku vaeva ku bavane ku palridingi si kaika nipasiamecaneana ka tina ka lwange, la malra ki lwange pakerenge ki palridingi, la sisau kwini ki la lrulai ka lwange putalwangane.

⁸ La malra ku Langiane ki Tamatama pubelenge ki palridingi, la pithila ku vaeva ku lrui, la puadringi kwini nicabwane ku kingi ka nitumanemanane, kwini sapatupalrane ki sasukubane numi ki pasalrivane numi ka saceacebe, ala pabilibili ki lwange.

⁹ Kunumi la drela ku tapapiane ki palridingi katwase: Lwiyasi laka papia tali Bithe Simise katwase, lrika amia kai, kikai sapamatikurwane amani ku Twaumase ki swa Iseraylri ka pwalebe mwa mitane; lwiyasi kaika papia talikai kavai, lri thingaleta ku Twaumase ka kaika pwalebe ku sapamatikurwane, kikai sapamatikurwane ala ka kaika niranavane.”

¹⁰ Ku swa Pelisitine la singikai kudra taiyane lini si pangimianga. Kwini lalasu wamalra ku drusa ku tina ka lwange pakerenge ki palridingi, la ruvu kwini ki lrulai ka lwange pikai talwangane,

¹¹ la malra kwini Langiane pubelenge ki palridingi, la mialri kwini tapasukaiyane ka lrui kwini ki nitutilane ka kingi si kingi ka pu si pibelenge ki palridingi.

¹² Kwini tina ka lwange la papia talikai Bithe Simise, kadrwa ku tathivalravane walecege katwase; kwini lalwange matwatwase, si takutumememe. Kudra talrima ka kiacapili ki swa Pelisitine la kabibibilrili ki lalwange, kela kavai talikai babiabila ka Bithe Simise.

¹³ Ku swa Bithe Simise la icengecenge ikai kwini valrwalru kimugimugi; kwini lalasu sa paswabelenge drele, ala drele kwini ki Langiane, la makitu kiraragai makanaelre.

¹⁴ Kwini palridingi la kela ka Bithe Simise ki angangade ki Yesua, si idrengere ithili ki maadrau ka tarugutugu. Kwini mapapangale la pwa bucuku kwini ki palridingi, la culu kwini drusa ka tina ka lwange tusapatarumarane ka Lama ka lrisi si patarumara ki Tamatama.

¹⁵ Kwini swa Lrivi la malra kwini Langiane ki Tamatama si drumane ka lrui ka nisuragelane ku nitumanemanane pulebe, la sarare pibelenge ki madradrau ka tarugutugu. Ala, ku swakai Bithe Simise la patarumara ki Tamatama ku Lama ka lrisi si drumane ku sapatarumarane.

¹⁶ Kwini talrima ka kiacapili ki swa Pelisitine la drele kwini tapangimiane lini, sakavai kwini lalasu la katwase siwlri mu Ikerungu.

¹⁷ Kwini swa Pelisitine wabaai ki Tamatama ku lrima ku kingi ka pu patarumara tusasukubane ki pasalrivane lini; ku vaeva nipasikaiyane ki swa Asedude, ku vaeva nipasikaiyane ki swa Gaza, ku vaeva nipasikaiyane ki swa Asekelungu, ku vaeva nipasikaiyane ki swa Gathe, ku vaeva nipasikaiyane ki swa Ikerungu.

¹⁸ Kwini lalasu la baai ku kingi ka tila, kwini vavaeva nipasikaiyane kwini rathudu lini ka cekele kwini ki tarasangililuku ki swa Pelisitine, paelre kwidra ki nikepalane ka cekele si kwidra ki kaika nikepalane ka cekele. Kwini maadrau ka tarugutugu ka yakai ki angangade ki Yesua ka swa Bithe Simise, kamani kwidra tapikaiyane ki Langiane ki Tamatama ka maadradrau ka tarugutugu, pakela kaiasasane yakaiyana kavai, tusapatuthingalane kudra tangimiane kikai.

¹⁹ Ku Tamatama papacai ku tamapitulu ku swa Bithe Simise, asi lwiyane kwini lalasu ngwadadethe drele ki Langiane. Ku laumawmase la ngwalai kudra ki kiapapacai ki Tamatama ku takalra ku umawmase si tubitubi liniane.

Ku Langiane yakai Kiriathe Yerime

²⁰ Ku swa Bithe Simise la kawriva, “Ikai cucubungu ki Tamatama ka sanianiangenga ka Twaumase, aneane ku lri maka acegecege? Lri dulruta satedre iniane papia inu, si malra iniane pakidaili mitane?”

²¹ Kwini lalasu la sikawlu ku umawmase mwa kawriva ki swa Kiriathe Yerime, “Ku swa Pelisitine wamalra ku Langiane ki Tamatama sawlri; bwala kidredresenga si tarumara!”