1 Samuile 5 - Ngudradreadrekadhane Ka Sisiu 魯凱語聖經

Ku Langiane yakai ki swa Pelisitine

¹ Ku swa Pelisitine sa malranga ravase ku Langiane ki Twaumase, kwi lalasu patwalai Ibinezere bulri pwa ka cekele Asedude,

² la bulri pudaane ki biu lini ka Dagunge, si pithili ki samiamiange ka Dagunge.

³ Sakakaiyane ki mialrealre, ku swa Asedude sa ngidrakale la drele kwini lringau ki Dagunge la sangulelebe, mukadrulunga icucubungu ki Langiane ki Tamatama. Kwini lalasu la drakale kwini ki samiamiange, sawlri pwa kudra ki nataikaiyane.

⁴ Sakakaiyane ki mialrealre, kwini lalasu sa ngidrakale la drelenga kwini ki samiamiange mukaadrulunga ikai cucubungu ki Langiane. Kikai kwidra, kwini awlru si alrimaini la tara kangetele, tubakebake ikai lrawlrawdru, laka kathanenga ku kinawmasane.

⁵ Lakamani, pakeelana kaikameane, ku barakalai ki Dagunge si yakai Asedude ka lakiasususu ki Dagunge makitwa lrakedakedale lribate ki lrawlrawdru ki Dagunge ka biu, mwakuludru ngubabelenge mwa dredre.

⁶ Ku Tamatama la pangicaeme pathavungu ki swa Asedude si kwini ki ngiathalringulu liniane ku laumawmase, kwini lalasu la makitu mukuludru, si kapu makanaelre.

⁷ Kwini lalasu sa drele kudra tangimiamiane kikai, la iya kai, “Ku Twaumase ki swa Iseraylri pathavuthavungu mitane si twaumaseta ka Dagunge. Kaita lri maka pikai kai kikai Langiane.”

⁸ Lakamani, kwini lalasu la sikawlu padawlu ki swa Pelisitine ku talrima ka kiacapili lini kela, kivavaga liniane, “Kikai lri pangitumane nai marasikai kikai Langiane ki Twaumase ki swa Iseraylri?” Kwini lalasu la tubalre, “Malra iniane iluku mwa ka Gathe!” Ku mapapangale la iluku mwa kavai.

⁹ Ai kwini Langiane sakelanga kikavai. Ku Tamatama la pathavungu ki swakai kwini ki cekele, si pakathathiburu liniane turamuru. Ku Twaumase pakapu ki sakatucekelane, ku tarudrawdrange ku lavavalake thadalrane.

¹⁰ Kwini lalasu la katwase satedre kwini Langiane pwa ka Pelisitine ka talidrumane ka cekele ka Ikerungu. Kwini Langiane sadarurunga kwini, kwini swakai kwini la makitu kawkau, “Kawvai lalasu wabulribulri ka Langiane ki Twaumase ki swa Iseraylri kela kikai, lri malra papacai mitane!”

¹¹ Lakamani, kwini lalasu la padawlu kwini ki kiacapili ki swa Pelisitine, iya kai liniane, “Ala malra kikai Langiane ki swa Iseraylri sawlri pwa kudra ki nataikaiyane! Lu pangimiata kwini, kikai Langiane kai lri papacainga mitane si mapapangaleta.” Kwini sakatucekelane makanaelre makitua kathathiburu mukuludru miakwidra, asi lwiyane ku Twaumase pangiacaeme pathavungu liniane.

¹² Adravane kwini kai wapacai mialri makitu kapu. Kwini lalasu papia ki twaumase lini karaleale kitubitubi ku akipalribulane.