1 Samuile 4 - Ngudradreadrekadhane Ka Sisiu 魯凱語聖經

¹ Ku vaga ki Samuile salraelre Iseraylri. Kikwini kwidra, ku swa Pelisitine wakela kikaruburu ki swa Iseraylri, la katwase kidresenge ku swa Iseraylri. Ku swa Iseraylri yakai Ibinezere tutakwapingane; ku swa Pelisitine la ikai Apeke tutakwapingane.

Kiaravase ku Langiane

² Ku swa Pelisitine wamwa kikaruburu ki swa Iseraylri, samwanga pakilringau makakaruburu, la pamalebe liniane, la papacai ikai kau ta 4,000 ku umawmase.

³ Sa siwlringa kwini daduladulanenga ka kwapingi mwa ki takwapingane, ku ciwru ki swa Iseraylri la kawariva, “Kaikameane ku Tamatama ani pakela ki swa Pelisitine kikaruburu mitane? Ila tamwa ka Selu, la malra bulri kwini Langiane ki Tamatama! Lu mia kikwini, lri kirimu tupalra mitane, si malra mitane palribulu patwalai ki alrima ki badha.”

⁴ Kwini lalasu la sikawlu ki umawmase mwa ka Selu, la malra bulri iluku kwini wanene ikai kabicelrakane ki drusa ka Kirubime ka Langiane ki Tamatama ka abebeelengenga ki sanaka kwapingi. Kwini tadrusa ka lalake ki Ilri ka Hupeni si Pinehase twapapalra kela.

⁵ Kwini Langiane sakelanga ki takwapingane, ku swa Iseraylri la makakaraleale, adravane ka kadaengane watedretedrese.

⁶ Ku swa Pelisitine sakilalra kwini guruguru ka lingau, la iya kai, “Kilalra kavai twalai ki swa Hiburu ka magaguruguru ka lingau! Manemane ka patharevane?” Kwini lalasu sathingale ala ka Langiane ki Tamatama ka wakelanga ki takwapingane ki swa Hiburu,

⁷ la makitu mukuludru, la iya kai, “Yakai ku twaumase ku wamwa ki takwapingane lini la iya. Lri tara amakita! Kaita kiapadradresengeana ku miyaiya kikai!

⁸ Aneane kulri maka dulru palribulu mitane pakidaili ki sapukwane turamuru ka twaumase? Kudra yakai ki calragulragu papacai ki swa Izipiti, ala amani kikai twaumase!

⁹ Swa Pelisitine, kagaranga! Pasawvaladhana katwase kikaruburu. Amani lwiyasi, la adurita ki swa Hiburu, mia kunadruma sa aduri mitane ka lalasu. Lakamani, tapasawvaladhane kagarange kikaruburu!”

¹⁰ Ku swa Pelisitine la keceengane kikaruburu. Ku swa Iseraylri la kipamalebe, si makitu mubere mubalriu. Kudra wapacai ku kwapingi takalra turamuru, ku swa Iseraylri ku kiapapacai ta 30,000.

¹¹ Ku Langiane ki Twaumase la kiravase; ku tadrusa ka lalalake ki Ilri ka Hupeni si Pinehase la mialri kipapacai.

Tapacadhane ki Ilri

¹² Sakavaivai kwini, la ikai ku tangea ku umawmase ki zuku ki Biniyamingi twalai ki tamakaruruburane lrabwale mwa ka Selu. Kwini lasu la thuriace ku laimaini, si ngicacabungu ku abu, sapathingalane ka watubitubi.

¹³ Ku Ilri kiadremedreme kathekelre turamuru ki Langiane ki Twaumase, la nene ikai kadadalranane masiasiasirare. Kwini umawmase la ikainga cekele pathingale kikai tangimiamiane, ku laumawmase makanaelre la mukuludru karaleale tubitubi.

¹⁴ Ku Ilri sa kilalra kwini takaralealane, la kivaga, “Ani ikai kikai miyaiya kai ka lingau?” Kwini umawmase la mwa ki Ilri si pelaela kikai tangimiamiane.

¹⁵ (Kikwini ku Ilri ku cailini tara 98, ku macaini maru mamukicinga.)

¹⁶ Kwini umawmase la kawriva, “Kaikameane twaladhaku ki takikaruburane kainganai mubere kela kikai.” Ku Ilri la kivaga iniane, “Lalakeli, matumane?”

¹⁷ Kwini umawmase la kawriva, “Ku swa Iseraylri twalai ki cucubungu ki swa Pelisitine mubere; kiapamalebe nai, la mia kudra tadrusa ku lalakesu ka Hupeni si Pinehase la kipapacai. Ku Langiane ki Twaumase la kiravase!”

¹⁸ Kwini umawmase samatikai ki Langiane, ku Ilri la nguthathili ki lrawlrawdru ki cekele, kudra taneneaneini la papulrilrikudru mukadrulu. Ku Ilri laka tarudrawdrangenga si laka bitulru, sakatwase mukadrulu la kacelra ku lreini, si pacai. Kwini lasu ku takicapilaneini ki swa Iseraylri taramasupatele ka caili.

Tapacadhane ki taelrelre ki Pinehase

¹⁹ Kudra lalake ki Ilri, kudra taelrelre ki Pinehase, la katawbaliri, lri padalrunga si tulalake. Kwini alisu sakilalra ka kiaravase ku Langiane ki Twaumase iya, ku tama ki taelrelreini si kudra taelrelreini la tara pacainga, la pangitutuluku kiangeange, la tulalake ku lalake.

²⁰ Kwini alisu salri pacai, kwini siaraparapale iniane ka ababai la kawriva iniane, “Kecengana! Twalalakesu kai vaeva kai sawvalai.” Ai kwini alisu la kai kithathengete, la kai tubalrebalre.

²¹ Kwini alisu la sunagane kwini ki lrulai pasi Ikabude, si swacenge iya kai, “Ku lrigu ki Twaumase kiadailinga ki swa Iseraylri”, papia ki takiravasane ku Langiane, tara wapacai ku tama si taelrelreini.

²² Kwini alisu kawariva, “Ku lrigu ki Twaumase kiadailinga ki swa Iseraylri, asi lwiyane ku Langiane ki Twaumase kiaravasenga.”