1 Samuile 31 - Ngudradreadrekadhane Ka Sisiu 魯凱語聖經

Tapacadhane sa kikaruburu ku lalalake ki Saule

¹ Ku swa Pelisitine si swa Iseraylri yakai lregelrege Gilebua makakaruburu. La takaalra ku swa Iseraylri ku kiapapacai; ku tedranenga ku umawmase, paelre ki Saule si lalalakeini makitua muberenga.

² Ai ku swa Pelisitine la saladha si padali ki Saule si lalalakeini, la papacai ki Yunathange, Abinadabe si Malekisua.

³ Ku ngiathalringulu ki Saule ka makarururuburu arwa pakilringau, la kipakai ki lraili ki badha, la pakilringau ku dulaini.

⁴ Kwini lasu la kawriva kwini ki taraililuku ku sakikaruburaneini ka kwapingi, “Sudra kwini lrabusu, la pwa culrulu nakwane! Amani lu tusinalreme nakwane kikavai kai kiagelregelre, ka kadrwa ku Twaumase lu drele ka swa Pelisitine.” Ai kwini tarapalakebe la mukuludru turamuru, mwakuludru nau pia kwini iya. Ku Saule la malra sudru ku lrabuini, si mwa gurapangane ki lrabu ngicaculrulu si pacai.

⁵ Kwini tarapalakebe sa drele ki Saule pacainga, la mialri mwa ki lrabu ngicaculrulu pacai, twapapalra ki Saule pacai.

⁶ Kikai amani ku tangimiane pacai ki Saule si tatulru ka sawvalai ka lalalakeini, si kwini langukathabarane ka tarapalakebe, ikai kwini ki vai kwidra lakwapingi ki Saule la pacai makanaelre.

⁷ Ku yakai kavai vaalru Yezele si yakai tali talrawane kadravane Yuredange ku swa Iseraylri sa kilalra ku kwapingi ki swa Iseraylri makitu muberenga, la mia ku Saule si lalakeini makitua pacainga, la cilringa kwini ki cekele mubere. Ku swa Pelisitine la malranga kwini ki cekele lini.

⁸ Sangilribatenga ku nimaka pusalane ku tamakaruruburane, kwini swa Pelisitine la mwa malra kwini sangiragelanane ki kiapapacai, la drele sa tharutakanga ikai lregelrege Gilebua ku kinawmasane ki Saule si tatulru ka lalalakeini,

⁹ la malra ku awlru ki Saule, si mwalra ku sakikaruburaneini. Kwini lalasu la sikawlu ku wamwa alraelre ki swa Pelisitine, papia ki samiamiange lini si mapapangale pelaela kikai mathariri ka sapelaelane.

¹⁰ Kwini lalasu la malra kwini sakikaruburuburane ki Saule pikai ki biu ki ababai ka twaumase ka Asetarete, la malra kwini kinawmasaneini pakedrekedre pikai ki taraeraedrane ki cekele kavai Bithe Sane.

¹¹ Ku swakai Gileade ku laumawmase ka cekele Yabi sa kilalra ku tapangimiane ki swa Pelisitine ki Saule,

¹² Kwini swakai kwini ku latamagarange la makitu mutaluvaivai katwase, dadavace taleare, la kela kavai Bithe Sane. Kwini lalasu la malra kwini kinawmasane ki Saule si lalalakeini pulebe, si iluku siwlri mwa kavai Yabi, la ikai kwini lama.

¹³ Kwini lalasu ala malra kwini culrale lini dralreke pikai kwini ki yacekele tailebe ki yanagi ka angatu, si laisi makapitulu.