1 Samuile 30 - Ngudradreadrekadhane Ka Sisiu 魯凱語聖經

Makakaruburu ki swa Amaleke ku Davidi

¹ Samaka pusalenga, ku Davidi la iluku ki lakwapingini siwlri mu Zikelage. Ku swa Amaleke ala ka wamwanga tali lrawdru ka Yuda, kikaruburu mwa Zikelage. Kwini lalasu la lama ki cekele,

² la malra sanaka labaibai, kai susu ku maesaesai ku matiakuru patuelre ravase, ai kai papacai ki laumawmase. Kwini lalasu sa katwase, wamalra iluku nguelre ki laumawmase.

³ Ku Davidi si lakwapingini sa kela, la drele ka nilamane ku cekele, ku lalabaibai si lalalake lini la makitu ki iluku,

⁴ la tubi karaleale, si kidulrunga ka kadruanga ku puku ki tatubiane.

⁵ Ku tadrusa ku taelrelre ki Davidi ka Ahinuame si Abigaile la mialri kiravase.

⁶ Kaiasasane ku Davidi wamwa ki amatikurwane; asi lwiyane kwini lakwapingini sakawlraunga ki lalalake lini, la makitu kipakwalrialri ku kidremedreme, la kirimunga kukuludru papia ki Davidi, si lri arakai ku lrenege papacai iniane. Ai ku Davidi satalu ki Tamatama ka Twaumaseini, kapapedrenge si garangane.

⁷ Ku Davidi la kawriva ki barakalai ka Abiathare ka lalake ki Ahimileke, “Malra kwini Ipude iluku pwa kai!” Ku Abiathare la singikaai ku taiyaneini pangimia.

⁸ Ku Davidi la kivaga ki Tamatama, “Lri maka mwaku saladha kwidra ki wakela mucekele? Lri maka padaliaku liniane?” Ku Tamatama la tubalre, “Lu mwa saladha. Lri tara padalisu, si malra pasiwlri kwini la kiaravase.”

⁹ Ku Davidi la karedele ki ta 600 ku lakwapingini katwase saladha, si daruru ka drakerale Bisure; yakai ku drumane ku asuru ikai kwini.

¹⁰ Ku Davidi la iluku ku ta 400 ku umawmase pacungulu katwase, ku ta 200 la makitu kidulrunga turamuru, kai lri maka talubalre drakerale Bisure, la asurunga ikai kwini.

¹¹ Ku lakwapingi ki Davidi la kidringai ikai umawma ku tangea ku vavalake ka sawvalai ka swa Izipiti, la malra iluku padrele ki Davidi. Kwini lalasu la baai ku akaneane ku acilai iniane,

¹² la baai iniane ku lapange ka icizike si drusa ka thuthubungu ku nipavaiyane ka budu. Kwini lasu samaka kanenga, la siwlriwlrianenga sapukwane; kwini lasu makatulrulunga ki vaiyane ki maungu kai kane kai ungulu.

¹³ Ku Davidi la kivaga iniane, “Aneane ku tamatamasu? Twalaisu inu?” Kwini lasu la tubalre, “Swa Izipitiaku, ka duri ki swa Amaleke. Ku tawkili makatulrulunga ku tacilriane nakwane pikai kai, amani sakacaemaku.

¹⁴ Wamwa nai mucekele ki tali lrawdru ka Yuda ka kadaengane ki Kirithi si kadaengane ki zuku ki Kalebe, si lama ka cekele Zikelage.”

¹⁵ Ku Davidi la kivaga iniane, “Lri palraingisu ililuku nakwane mwa saladha kwini ki la wakela mucekele?” Kwini lasu la kawriva, “Lwiyasi la papiasu ki palralrawthu ka Twaumase kiketekete kai papacai nakwane, la kai malra nakwane pwa ki tawkili, palraingaku ililuku muswane.”

¹⁶ Kwini lasu la ililuku ki Davidi katwase saladha liniane. Kwini la wakela mucekele la makitu matukwakudha ikai kidruanga, la kanekane ungungulu, si pakilringau kapeaperau, asi lwiyane makalra turamuru ku ravase lini ku lawbubulu patwalai Pelisitine si Yuda.

¹⁷ Sakamialrealre ki kaiyane, ku Davidi la kikaruburu liniane, pakela ki miauawbu; kwini badha laka kathane kudra ta 400 ku ngwarigi ki lrakeda ku langukathabarane ku mwabere, kadrwa ku natangeanga ku mwabere.

¹⁸ Ku Davidi la malra sawlri kwini ravase ki swa Amaleke ku lamanemane, paelre ki tadrusa ka taelrelreini;

¹⁹ kadrwa ku nataingeane ku mwacilri. Ku Davidi la palribulu pakanaelre ki lalake ki lakwapingini, si sawlri sanaka kiaravase ki swa Amaleke ku lawbubulu,

²⁰ la sawlri pakanaelre ku lakiu si lalwange. Kwini lakwapingi ki lasu la sisasisau ki la nilapulapwane sacucubungu, si takuiyaiya kai, “Kikai yai Davidiane patuelre!”

²¹ Kai tarathainu ku Davidi la siwlri mwa kwini ki ta 200 ka umawmase; kwini lalasu la kidulru turamuru lakamani ku kaika tupalra si la asusuru ikai babiabila drakerale Bisure. Kwini lalasu la mwa kidredresenge ki Davidi si lakwapingini; ku Davidi la mialri kabarengere liniane.

²² Ai yakai kudra la twapalra ki Davidi ka lagurucuki si tanganganga; la iya kai, “Kikai lalasu kai twapalra mitane, takai vala liniane kikai malrata sawlri kai lamanemane baai liniane. Pakatwasa liniane iluku ki lataelrelre si lalalake lini!”

²³ Ai ku Davidi kawriva, “Laretesane makanaelre, takai pia kikai marasikai kikai patarumara mitane ki Tamatama. Palakebe mitane, la paralubu si pamalebeta ki badha.

²⁴ Kadrwa ku naneanenga ku palraingi kwini vaga numi! Sanaka aneane yakai ku drulruini: Ku wakadrenge ilrilrikudru si wamwa takikaruburane naika mararaamau mavala.”

²⁵ Ku Davidi la kelrete kikai asikakudhanane; kikai nitukakudhanane ikai ki swa Iseraylri pakela kikai thadaalrane kipangimiamia.

²⁶ Ku Davidi sa siwlringa mwa Zikelage, la malra kwini ravaseini ku lawbubulu vala ki talrailragini, amani kwini lakiacapili ki swa Yuda, si takuiluku ku vaga kawriva, “Kikai bekelane kai saceacebe twalai ki badha ki Tamatama ravase.”

²⁷ Ku Davidi waacebe ki swa Bithele, swa tali lrawdru ka Yuda ka swa Rama, Yatire,

²⁸ Aruere, Sipemuthe, Isetimwa.

²⁹ Lacacekele ka Rakale, la mialri baai ki zuku ki Yerahemele si cacekele ki zuku ki Keni,

³⁰ la mialri baai ki yakai Hurema, Burasane, Athake si

³¹ cacekele ka Hiburungu. Ku Davidi si lakwapingini sanaka tadarurane lini ka cekele, kwini lasu makitua wavala ku acebe lini.