1 Samuile 3 - Ngudradreadrekadhane Ka Sisiu 魯凱語聖經

Ku Tamatama adrelane ki Samuile

¹ Ku vavalake ka Samuile kiabulrubulru ki Ilri marasiakaikai ki Tamatama. Walreeva ala kela ku vaga ki Tamatama, laka kingibebekele ku tadrelane ku maburusi.

² Yakai sakamaungu, kudra kai wacegecegenga drele ka Ilri yakai ki tapeapecaneini apece;

³ ku Samuile la apece ikai kwidra ki tapikaiyane ku Langiane ki Twaumase ka Alrivilrivi ka taikaikaiyane, kaiyana maliare, ku tinaki waledraledrana,

⁴ ku Tamatama la dawlu ki Samuile. Ku Samuile la tubalre, “Unu tamatama!”

⁵ La katwase lailai mwa ki Ilri, si kawriva, “Wadawdawlusu nakwane? Kawvadhaku?” Ku Ilri la kawriva, “Kainaku wadawlu muswane, lu siwlria apece!” Ku Samuile la siwlri apece.

^6-7 Ku Tamatama la peelanga dawlu ki Samuile. Kikwini kwidra ku Samuile kaiyana wathingale ki Tamatama, asi lwiyane ku Tamatama kaiyana adrelane iniane. Kwini lasu la ngidrakaalenga, la mwa ki Ilri, iya kai, “Wadawlusu nakwane? Kawvadhaku.” Ku Ilri la kawriva, “Lalakeli, kainaku wadawlu muswane, lu siwlria apece!”

⁸ Ku Tamatama laka saka kingitulrulu dawlu ki Samuile. Kwini lasu la ngidrakaalenga, si mwa ki Ilri, iya kai, “Wadawlusu nakwane? Kawvadhaku.” Ku Ilri la thingalenga ala ka Tamatama ka wadawdawlu kikai ki vavalake,

⁹ la iya kai ki Samuile, “Lu siwlria apece; lwiyasi la peelanga dawlu muswane, la iyanga kai, ‘Tamatama, kawriva, kialalalalra kai sasiakawlusu!’ ” Ku Samuile la siwlri apece.

¹⁰ Ku Tamatama la kela, acegecege ikai kwini, mia ki siaswalane dawlu, “Samuile! Samuile!” Ku Samuile la tubalre, “Ala kawriva, kialalalalraku ka sasiakawlusu!”

¹¹ Ku Tamatama la kawriva iniane, “Kai lri tarathainunga, lai lri ikaiyaku ki swa Iseraylri pia ku palrealrebane ku awngane, ku la kialalra ku umawmase makitu kasamali turamuru.

¹² Ikai kwini ki vai, lri tara pangimiaku kudra natapuvaganeli ki tai Ilri.

¹³ Peaelaelanga naku iniane, lri ngwalai kwini ki lalalakeini kudra ngilisianane ku vaga kiecebe nakwane si lrika palralrawthu ku apathavungane liniane ka wacekecekele. Ku Ilri wathingale kudra pia lini ku ngialisiane, ai kai waruthuku liniane.

¹⁴ Lakamani, pwadriadriingadhaku papia ki tai Ilri pelaela: Adravane ka sapatarumarane ku niculwane ku la sapatarumarane ku lamanemanenga kai lri maka dulrunga sawlri kikai ki tangimiane ku tapasalrivane turamuru.”

¹⁵ Ku Samuile la apece pakela ki maliare, la ngidrakale si muelebe ku saelelebane ki lrawlrawdru ki daane ki Tamatama; kwini lasu la kai maka papia ki Ilri pelaela kikai maburusi.

¹⁶ Ku Ilri la dawlu iniane, “Lalake ka Samuile!” Ku Samuile la tubalre, “Unu, tamatama!”

¹⁷ Ku Ilri la kivaga iniane, “Manemane ku kawriva ki Tamatama muswane? Madha sekesekete nakwane. Lwiyasi la kaisu pakaelre pelaela, ku Twaumase ani pangicaeme kaelaela muswane!”

¹⁸ Ku Samuile la pelaela ku tangimiamiane patueelre, kadrwa ku natikianenga ku niseketane. Ku Ilri la kawriva, “Amanini ku Tamatama; ani singikai ku mathariri ku taiyaneini si pangimia.”

¹⁹ Ku Samuile la aru kadraadrau pucacugane; ku Tamatama la tapalra iniane, kudra sanaka takawrivaneini la makitu ngimiamia.

²⁰ Ku mapapangale ki swa Iseraylri, twalai Dange kela Bereseba, makitu thingale ki Samuile ala ka Tamatama ka wacegecege paayuginsia.

²¹ Ku Tamatama la pacungulu ikai Selu kikwini ki taikaiyane kikawriva ki Samuile si adrelane.