1 Samuile 28 - Ngudradreadrekadhane Ka Sisiu 魯凱語聖經

¹ Lakai tarathainu, ku swa Pelisitine wasarubu ki lakwapingi si kikaruburu ki swa Iseraylri. Ku talialalai ka Akisi la iya kai ki Davidi, “Naika wathingalesu, kusu si lakwapingisu kalri mapaparalubuta karedele kikaruburu.”

² Ku Davidi la kawriva, “Laibekace, sasiakawlaku muswane. La thingalesu nakwane ku lrika adulrwaneli tumane.” Ku talialalai ka Akisi la kawriva, “Mathariri! Ani kapalralrawthunga atarapalakelakebe nakwane amiaku muswane.”

Kiavaga ki taraivigi ku Saule

³ La pacainga ku Samuile; ku swa Iseraylri la kalreme iniane, la malra iniane dralreke pikai ki cekeleini ka Rama. Ku Saule nawavutha sanaka taratulrisi si taraivigi pakatwase ka Iseraylri.

⁴ Ku kwapingi ki swa Pelisitine yasarubu ikai kwini adethe ka Suneme si tutakwapingane; ku Saule la sarubu ki swa Iseraylri ikai lregelrege Gilebua tutakwapingane.

⁵ Sa drele ku Saule ki kwapingi ki swa Pelisitine, la mukuludru turamuru,

⁶ la kivaga ki Tamatama ku apangimiane. Ai ku Tamatama kai pangwakai ki sipi, la kai pangukai ki Urime, la mialri kai pangukai ki yuginsia tubalre iniane.

⁷ Ku Saule la drekase ki kiacapilini iya kai, “Atalingikaiyaili silape ku tangea ku taraivigi, lri mwaku kivaga iniane.” Kwini lalasu la iya kai, “Yakai kavai Indure ku tangea.”

⁸ Ku Saule la kipabalrithi ku maelaelane ka laimaini, sa kadradrimitinga la taruelre ki tadrusa ka sasiakawluini mwa kidrele kwini ki ababai. Ku Saule la iya kai iniane, “Ala pasikaiyaili kivaga ki abake ki wapacainga, si pelaela nakwane kwini lrika angimiane. Nau baai muswane ku nagane ki tangea ka umawmase, la dawla kwini ki abakeini putaluvaivai.”

⁹ Kwini ababai la kawriva, “Lri tara ka wathingalesu kudra tapangimiane ki Saule, kwini lasu wavutha ki taratulrisi si taraivigi pakatwase ka Iseraylri. Asu kirimu nau pamatikuru iya nakwane, ku apacadhaneli?”

¹⁰ Ku Saule la kiketekete iniane, “Papiaku ki palralrawthu panianiake ka Tamatama tubalre muswane: Kaisu lri ngwalai kikai si kipathavungu.”

¹¹ Kwini ababai la kivaga, “Aneane kwini adawlanesu?” Ku Saule la iya kai, “Samuile.”

¹² Kwini ababai sa drele ki Samuile, kwini alisu la karaleale, si iya kai ki Saule, “Asu twavava nakwane? Amanisu ka talialalai ka Saule!”

¹³ Ku talialalai ka Saule la kawriva iniane, “Madha mukuludru! Manemane kwini drelesu?” Kwini ababai la tubalre, “Wadrelaku ku tangea ku mia ki twaumase ku twalai adringi ki dae kainganai mubelenge.”

¹⁴ La kivaga ku Saule, “Ngitwatumane ku tacebeane?” Kwini ababai la tubalre, “Tangea ka tarudrawdrange; sialaimai ku malragi ku palimemelre.” Ku Saule la thingale kwini ala ka Samuile, la musakene si guruthungane ikai daedae.

¹⁵ Ku Samuile la kivaga ki Saule, “Asu kirimu vangavange upungu nakwane? Asu dawlu nakwane?” Ku Saule la kawriva, “Madrau turamuru kai amatikurwaneli! Lri kela kikaruburu nakwane ku swa Pelisitine, la miaka wacilringa nakwane ku Twaumase. Kai pangwakainga ki yuginsia, la kai pangukainga ki sipi tubalre nakwane. Lakamani kwidra dawluli muswane kainganai mubelenge, kiatubiaku muswane pelaelaili ku apangimiane.”

¹⁶ Ku Samuile la kawriva, “Kwini wacilringa muswane ku Tamatama, abadhanga muswane, asu kirimwana dawlu nakwane?

¹⁷ Ku tapangimiane ki Tamatama muswane, pangwakainga ki nguduili pelaela muswane: Ku Tamatama wamalranga kwini ki kunisu, si baai ki Davidi;

¹⁸ asi lwiyane kikwini wabalresu ku drekase ki Tamatama, kaisu wamalra ki swa Amaleke si lamanemane lini amudu patuelre. Lakamani, ku pia kikai ki Tamatama muswane kaikameane.

¹⁹ Ku Tamatama lri malra muswane si swa Iseraylri pwa ki alrima ki swa Pelisitine. Lwiya, kusu si lalalakesu lri taelrenga numi nakwane; ku Tamatama lri mialri malra ki kwapingi ki swa Iseraylri si baai ki swa Pelisitine.”

²⁰ Ku Saule la ukuludru ngituluku turamuru ku vaga ki Samuile, la makakaai tubakebake, si tukulusane ku kinawmasaneini, apece ikai daedae, asi lwiyane kwini lasu maka valenga ku vaiyane si maungu kai kane ku manemane, laka kadruanga ku puku.

²¹ Kwini ababai la mucucubungu ki Saule, si drele kwini tangitulukaneini, la kawriva iniane, “Kikai kiapacadhaku si pangimia ku ani pia kwini iyasu nakwane.

²² Kaiasasane ala singikaiya ku ani pia kwini iyali muswane. Kanea kikai pasikaili muswane kai akaneane, kanea lani ikai ku pukusu mukadalranane.”

²³ Ku Saule la kai mubangalre; kwini lasu kainaku lri kane la iya. Ku sasiakawluini si kwini ababai la mialri kanea pingibekele iya iniane. Sakabilrilinga, la ngidrakale twalai daedae, si nene ikai ki tapeapecane.

²⁴ Kwini ababai la kirarimu malra kwidra lapulapuini ku maricuru ku vaeva ku lrulai ka lwange culu, la paelre ki milrikinku, la akame ku kaika nipawsemakane ka pange.

²⁵ La iluku mucucubungu ki Saule si la papalraini, kwini lalasu la makitu kanenga. Kwini sakamaungu, kwini lalasu la katwase.