1 Samuile 26 - Ngudradreadrekadhane Ka Sisiu 魯凱語聖經

Peaelanga kai kirimu papacai ki Saule ku Davidi

¹ Yakai ku umawmase ku twalai Zipe kela Gibia kidrele ki Saule, la pelaela iniane ku Davidi kiabalai ikai kavai tali babiabila ubulane Yuda kavai lregelrege Hakila.

² Ku Saule la iluku ku ta 3,000 ku tagagarange ku kwapingi ki swa Iseraylri mwa ka Zipe silape ki Davidi.

³ Kwini lalasu la ikai kadalranane lregelrege Hakila tutakwapingane. Ku Davidi yakaaiyana ubulane, sa thingale ku Saule ala ka wailuku ku kwapingi kelakelanga yai,

⁴ la sikawlu ku taralrilriu mwa lrilriu, laka tengane ka wakelakela ku Saule.

⁵ Ku Davidi la makakaai katwase mwa, la kidringai kudra tapecane ki Saule si tamatama ki kwapingi ka Abinere ka lalake ki Nere. Ku Saule waapece ikai ki takwapingane; ku lakwapingini la makitu ngithalringulu iniane.

⁶ Ku Davidi la kivaga ki Ahimileke ka swa Hite si Abisai ka agi ki Yuabe ka lalake ki Ziruia, “Kunumi ka tadrusa aneane ku palraingi tupalra nakwane mwa ki takwapingane ki Saule?” Ku Abisai la kawriva, “Palraingaku!”

⁷ Kwini sakamaungu, ku Davidi si Abisai la mudaane ki takwapingane ki Saule, la drele ki Saule wapece ikabicelrakane ki takwapingane, ku idirini la cegecege pithili ki tali awlruini daedae; ku Abinere si lakwapingi la lringulu iniane apece.

⁸ Ku Abisai la kawriva ki Davidi, “Kai maungu, ku Twaumase wamalra kai ki badhasu pwa ki alrimasu. Kai ala nau arakai ka idirini culrulu iniane, lri aru vavale madu pwathethere iniane pikai ki daedae, kai madu lri ara pusale!”

⁹ Ai ku Davidi la kawriva, “Kusu madha pakaduladula iniane! Luka aneane ku wadula ki padelreme cegecege ki Tamatama tutalialalai, ku Tamatama lri tara pathavungu iniane.”

¹⁰ Ku Davidi la pela kawriva, “Lri papiaku ki palralrawthu panianiake ka Tamatama kiketekete, wathingalaku ku Tamatama lri ngikakamani papacai ki Saule, lu kelanga ku apacadhane lri paacai, si alau lri pacai ikai ki takikaruburane.

¹¹ Ku Tamatama kai lri palraingi nakwane pakadula kudra padelremeini cegecege tutalialalai, ta malra kavai idiri si taaciladhaneini katwase!”

¹² Ku Davidi la patwalai ki tali awlru ki Saule malra ku idiri si taaciladhaneini, ala katwase tupapalra ki Abisai. Laka kadrwa ku wadrele, la mialri ka kadrwa ku wathingale ku tangimiane, kadrwa ku natangeanga ku alrigilrigi pacunu. Kwini lalasu makitua ereke, asi lwiyane ku Tamatama pasakaereke liniane.

¹³ Ku Davidi la lribate ki valrwalru talikaiyane kavai, sa daruru ki talikaiyane ki lregelrege belenge, madadaili liniane.

¹⁴ Ala akuadrau tawtau ki kwapingi ki Saule si Abinere, “Abinere! Kialalrasu nakwane?” Ku Abinere la kivaga, “Aneane kavai watawtawtau capange, aceace ki talialalai?”

¹⁵ Ku Davidi la tubalre, “Abinere, kaisu kamani kudra sapupukuanenga ka tamagarange ki swa Iseraylri? Asu kai maka pudriadringai palakebe ki talialalai ka tamatamasu? Yakai ku umawmase ku wamwa ki takwapingane, lri papacai ki tamatamasu!

¹⁶ Kaisu pangiamia ku awnganesu, Abinere! Papiaku ki palralrawthu panianiake ka Tamatama kiketekete, kunumi nai pacai numi makanaelre! Asi lwiyane kwini kai numi maka palakebe ki tamatama, kwini ki cegecege tutalialalai ki Tamatama. Lu mwa drele! Yakai inu ku idiri ki talialalai? Kudra yakai tali awlruini ku taciladhane yakai inu?”

¹⁷ Ku Saule la thingale ala ka lingau ki Davidi, la kivaga, “Davidi, lalakeli! Amanisu?” Ku Davidi la tubalre, “Tamatamali, talialalai, amaniaku!”

¹⁸ Ala iya kai, “Talialalai, asu saladhaladhana nakwane ka sasiakawlusu? Manemane ku pasalriuli?

¹⁹ Talialalai, kilalra kai aiyaneli. Lwiyasi ku Tamatama la pakiecebe muswane nakwane, palraingaku lama patarumara iniane, pakai ku asawlriane ku kidremedremeini; lwiyasi ka ngukai ki kidremedreme ki umawmase ka atulisiane, ku Twaumase ani pusu liniane. Asi lwiyane kikai lalasu pakatwase nakwane patwalai kwini ki baai ki Tamatama ki kawkawluini ka kadaengane, si pacaicaicali nakwane ikai ki maelane ka kuni, si sukusukubu ki latwaumase ki swakai kwini.

²⁰ Kiatubiaku muswane nau kai ikai ki kadaengane ki maelane ka kuni pacai, si kidaili ki Tamatama. Ku talialalai ki swa Iseraylri ani kainganai papacai nakwane, mia ki papacai ki vaeva ka thamikulu? Ani lraili papacai nakwane? Mia ki walraili papacai ki vaeva ka yaubulane ka adhadhame?”

²¹ Ku Saule la kawriva, “Pasalrivaku. Lalakeli ka Davidi, bwala! Kainaku lri pakadulanga muswane, asi lwiyane kai maungu kikai paudripisu kai niakeli. Angelrangelrangelravaku; la piaku kai kaipacengecenge!”

²² Ku Davidi la kawriva, “Talialalai, kikai idirisu. Cuna ku tangea ku sasiakawlusu kela kai malra.

²³ Ku Tamatama pakalreva kudra ki pasusu ku vagaini ku madringelrese ku umawmase. Kaikameane wamalra muswane pwa ki alrimali, ai kainaku wadula muswane ka tutalialalai ki Tamatama.

²⁴ Ku Tamatama ani mia kaikameane palakebe nakwane mia ku tapalakebaneli ki niakesu.”

²⁵ Ku Saule la kawriva ki Davidi, “Lalakeli, ku Twaumase ani subulrubulru muswane! Sanaka tapianesu ki maneemanenga ani ngimia patuelre!” Ku Davidi la katwase kikwini; ku Saule la katwase mubalriu.