1 Samuile 24 - Ngudradreadrekadhane Ka Sisiu 魯凱語聖經

Ku Davidi kai papacai ki Saule

¹ Ku Saule sa siwlringa ku tasaladhane ki swa Pelisitine, la thingale ku Davidi ka yakai tali Ingidi ubulane kilepenge,

² la sangiluku kudra tararakace ka kwapingi ki swa Iseraylri ku ta 3,000, mwa kwini tali talrawane ki “Alrisapesape ka kisisi” Silape ki Davidi si lakwapingini.

³ Ku Saule la kela kwini ki takivane ka adethe ki vaeva ka barungulu, mwadringi mulricungu, la icengecenge ku Davidi si lakwapingini kibalai ikai tali adringi ki barungulu.

⁴ Ku kwapingi ki Davidi la kawriva iniane, “Kikai vaingasu! Ku Tamatama nakawarivanga muswane, lri malra ki badhasu pwa ki alrimasu, lri dulrusu ngisasingikai ku apangimianesu iniane.” Ku Davidi la tinulrawlrakwane kidethe iniane, si kibubuli malra kipithingi ku piyu ki palimemelre ki Saule.

⁵ Sakabilrilinga ku Davidi ngwalai kudra ki tapangimianeini si kai kasulivalivate ku kidremedremeini,

⁶ la kawriva ki kwapingini, “Ku Twaumase ani ruthuku nakwane ku kaika apakadulane tulisi ki naneanenga; asi lwiyane talialalai ka lasu, amanini ku Tamatama ku padelreme cegecege tutalialalai iniane.”

⁷ Ku Davidi la pakasuburu ku kidremedreme ki lakwapingini, kai palraingi liniane ku pakadula tulisi ki Saule. Ku Saule la ngidrakale, mulatadre ki barungulu, si lri katwase;

⁸ ku Davidi la mulatadre si kabibilrili ilrilrikudru iniane, akwadrau kawriva, “Tamatama, Talialalai!” Ku Saule la ngibangulu, ku Davidi la guruthungane sukubu iniane, iya kai,

⁹ “Talialalai asu tuvaga kwini la kilalrasu ku ngialisiane ku vaga, lri papacai iya nakwane muswane?

¹⁰ Kaikameane, ngiakakamaniaku drele muswane ikai ki barungulu, ku Tamatama wamalra muswane pwa ki alrimali. Kai lakwapingili la ikai ku pwapapacai iniane amia nakwane, ai kainaku maka wabesere, la kawrivaku liniane, lutumane kainaku lri papacai muswane, asi lwiyane amanisu ku padelreme cegecege ki Tamatama atalialalai.

¹¹ Tamatamali, drela! Drela kikai yakai ki alrimali kai piyu ki palimemelresu. Nau papacai ana iyaku muswane kaika makucingalre, la malraku kipithingi ku piyu ki palimemelresu, kikai naika masalrusu, kadrwa ku nau balre ku nau tulisi iyaiyali muswane. Laka kadrwa ku pasalrisalriuli muswane, kikai la silasiilapeanasu nakwane, nau papacai iyaiya.

¹² Anika Tamatamanga ku amani ka twaringaringau ku ini si unu ku tangimiamiane. Ani kamaninga ngitalikaiyane nakwane bilri, asi lwiyane kainaku lri tulisi muswane.

¹³ Ku vaga ki sidrumane amia kai, ‘Ku ngialisiane twalai ki manganga ka umawmase.’ Lutumane kainaku lri papacai muswane.

¹⁴ Drela manemane ku apapacadhane ki talialalai ki swa Iseraylri? Drela manemane kwi saladhaladha ki lasu? Vaeva ka wapacai ka tawpungu, vaeva ka thamikulu?

¹⁵ Ku Tamatama lri turingaringau lri pelaela luka aneane ku pacengecenge si pasalriu mitane. Ani ka amani ku maka pwadriadringai drele, si palakebe nakwane, palribulu nakwane kidaili ki alrimasu.”

¹⁶ Ku Davidi sa makakawrivanga, ku Saule la kawriva, “Lalakeli ka Davidi, tengane ka amanisu?” La kirimu akwadrau tubi.

¹⁷ Kwini lasu la iya kai, “Pacengecengesu, la pasaalrivaku. Lu piaku kikai aralisiane muswane, laka thadalranesu ara tharirane nakwane.

¹⁸ Kaikameane, kikai pathingalanengasu kai thariranesu; asi lwiyane ku Tamatama adravane malranga nakwane pwa ki alrimasu, la kaisu papacai nakwane.

¹⁹ Lu pwalra ku umawmase ki badha, watumane si maka pakasulivalivate ka kadrwa ku manemane si pakatwase? Anika Tamatama ka ngwalai muswane kikaikameane kai tapangimianesu la subulrubulru muswane!

²⁰ Kaiasasane wathingalenga naku turamuru ala ka lri tara atalialalaisu ki swa Iseraylri, si kikai kuni lrika amanisu ku warathudunga.

²¹ Kusu papia ki nagane ki Tamatama kiketekete, lri tara pasurusu ki lamwabaibalrithi nakwane, kai naganeli si nagane nai ka wacekecekele ku kaika akisakawlravane.”

²² Ku Davidi la kiketekete ki Saule. Sangilribatenga kikai kwidra, ku Saule la siwlri mubalriu; ku Davidi si lakwapingini la siwlringa mwa kwidra ki taikaiyane lini kibalai.