1 Samuile 23 - Ngudradreadrekadhane Ka Sisiu 魯凱語聖經

Ku Davidi palribulu ki cekele Kila

¹ Ku Davidi kialalra ku swa Pelisitine ka kiakaruburuburu ki cekele Kila, si ravase ku nitawkitaletalekane.

² Kwini lasu la kivaga ki Tamatama, “Lri mwaku kikaruburu ki swa Pelisitine?” Ku Tamatama la tubalre, “Lu mwa kikaruburu, palribulu ki cekele Kila.”

³ Ai, ku kwapingi ki Davidi la kawriva iya kai iniane, “Mwakuludrungaata ikai kavai Yuda, lu mwangata cekele Kila kikaruburu ki kwapingi ki swa Pelisitine kaika lrika parawramuru?”

⁴ Ku Davidi la kivaaganga ki Tamatama. Ku Tamatama la kawriva iniane, “Lu mwa ka Kila! Lri baadhaku muswane ku apamalebeane ki swa Pelisitine.”

⁵ Ku Davidi si lakwapingini la katwase mwa Kila kikaruburu ki swa Pelisitine. Kwini lalasu la papacai ku takalra ku badha, la malra ravase ku lanilapulapwane ki badha. Ku Davidi la pangimia kikai palribulu kwini ki cekele.

⁶ Ku Abiathare ka lalake ki Ahimileke sa mubere papia ka Kila mwa ki Davidi yai, nawamalra iluku ku Ipude.

⁷ Ku Saule wathingale ku Davidi ka wamwa ka Kila, la iya kai, “Ku Twaumase wamalranga pwa ki alrimali. Ku Davidi wamwa ki nialradrane ku cekele, yakai ku lrawlrawdru, yakai ku sadrukurane ka cekele, taingeane ka ngiraranau mulrabuku.”

⁸ Ku Saule la sarubu ki kwapingi ngirarukudru padulru ku akikaruburane, la papia Kila katwase ku kwapingi, lringulu ki Davidi si lakwapingini.

⁹ Ku Davidi la patarathingale ku Saule ka kiadredredreme ku kiakaruburu iniane, la kawriva ki barakalai ka Abiathare, “Ta iluka pwakai kwini Ipude.”

¹⁰ Ku Davidi la kawriva, “Tamatama ka Twaumase ki swa Iseraylri, kialalraku ku Saule ka kiadredredreme ku wakela kai Kila, ngwalai nakwane ka sasiakawlusu si lri amudu kai ki cekele.

¹¹ Ku swa Kila lri malra nakwane pwa ki Saule? Kialalraku ku Saule ka lri kela, tengane ka lri kela? Tamatama ka Twaumase ki swa Iseraylri, kiatubiaku muswane tubalreaili!” Ku Tamatama la tubalre, “Lri kela ku Saule.”

¹² Ku Davidi la kivaaganga, “Ku swa Kila ka laumawmase, lri malra nakwane si lakwapingili baai ki Saule?” Ku Tamatama la iya kai, “Lri pia kwini kwi lalasu.”

¹³ Lakamani kwidra, ku Davidi si lakwapingini lri ikaai kau ta 600 la makakaai katwase ka Kila, mwa kidruanga acaicali. Ku Saule la kilalra ku Davidi ala ka matwasenga ka Kila la kasuburunga kwini nakidremedremeini.

Ku Davidi yakai calragulragu

¹⁴ Ku Davidi la pacungulu ikai talikai Zipe ubulane kilepelepenge. Ku Saule la silasilapeana iniane, ai ku Twaumase kai wamalra ki Davidi baai iniane.

¹⁵ Ku Davidi kialalra ku Saule ka malritheethe nau papacai iya iniane, kikwidra, kwi lasu yakai ki adeethe ka ubulane ka Zipe ka Hurebesi,

¹⁶ ku Yunathange la mwa drele iniane, pasapukwane iniane ku asudralrwane ku sapalakebane ki Twaumase,

¹⁷ la iya kai iniane, “Madha mukuludru! Ku ama ka Saule kai lri maka kabebetethe muswane; wathingale, lri tara atalialalaisu ki swa Iseraylri lukabibilrili, ku taetalaneli lri musaka drusa muswane.”

¹⁸ Kwini tadrusa la tupela makaketekete tutalragi icucubungu ki Tamatama. Ku Davidi la asuru ikai Hurebesi; ku Yunathange la siwlri mubalriu.

¹⁹ La ikai ku umawmase ku twalai Zipe mwa ka Gibia kidrele ki Saule, la iya kai, “Ku Davidi yakai talikai nai kilepenge, yakai tali lrawdru ka ubulane Yuda, kavai lregelrege ka Hakila ka Hurebesi.

²⁰ Talialalai wathingale nai ka nau pwalra amiamiasu iniane; abwala mwa naiane kai, lri tara paralubu nai muswane ka talialalai pwalra iniane.”

²¹ Ku Saule amia kai, “Twathariri numi nakwane. Ku Tamatama ani subulrubulru numiane!

²² Lu mwa, tupela pudriadringai silape, ka yakai inu, aneane ku wadrelenga iniane. Malrilrigili turamuru kwini lasu amia ku kilalrali.

²³ Lu mwa si pudriadringai silape ku taikaiyanelringaini kilepenge. La makakaai kela pelaela, la nau mwa tupalra numiane. Lwiyasi kwini lasu la ikaaiyana tali kai kikai, adravane ka lri salraelreaku ki swa Yuda, lri tara malraku putaluvaivai iniane.”

²⁴ Kwini laumawmase la katwase, aswalala ki Saule siwlri mwa ka Zipe. Ku Davidi si lakwapingini la kilepenge ikai ubulane Maune, ikai kwini tali lrawdru ubulane ka vaalru ka Yuda.

²⁵ Ku Saule la sangiluku ki kwapingini katwase singibila silape ki Davidi; sa kilalra ku Davidi, la katwase papia tali ubulane Maune mubere, kilepenge ilrilrikudru ki alrisapesape. Ku Saule wathingale ku tangukakaiyane ki Davidi, la katwase saladha.

²⁶ Ku Saule si lakwapingini la satali thili ki alrisapesape; ku Davidi si lakwapingini la itali thili ki alrisapesape. Kwini swa talikai ki Saule padethenga liniane, lri padaalrunga si pwalra liniane, kwini lalasu la kirarimu katwase kilepenge.

²⁷ Ikai kwini kwidra, yakai ku tangea ku kiasikawlu kela, pelaela ki Saule iya kai, “Kirimwa siwlri! Ku swa Pelisitine mwadaanenga ki kadaenganeta!”

²⁸ Ku Saule la idrengere ku asaladhane ki Davidi, siwlri kwini kwapingini kikaruburu ki swa Pelisitine. Lakamani kwidra kwini pasia “Pagisi ka alrisapesape.”

²⁹ Ku Davidi la katwase kwini, papia tali Ingidi, ikai kwini kilepenge.