1 Samuile 22 - Ngudradreadrekadhane Ka Sisiu 魯凱語聖經

Papacai ki labarakalai

¹ Ku Davidi twalai Gathe mubere mwa kwini adeethe ki cekele Adulame ki taluvale ka barungulu. Ku labetakaneini si wacekecekeleini sakilalra yakai kwini iya iniane la makitu mwa drele iniane.

² Kudra kiadredredrepete, akiame, kai kiaragai ku tangimiamiane ku laumawmase la makitu mwa satalu iniane; ku umawmase lri ikai kau ta 400. Ku Davidi la kamaninga kudra tarasangililuku liniane.

³ Ku Davidi la twalai kwini papia kavai Mizepa ka Muabe, la kawriva ki talialalai ki swa Muabe, “Kiatubiaku ala palrainga ki marudrawdrangeli ani ikaikai muswane, lu thiingalengaku ku takidremedremane ki Twaumase ala nau kidredreme ku apangimianeli.”

⁴ Ku Davidi ala malra ki marudrawdrangeini papikai kavai ki talialalai ki Muabe. Kwini lasu sa kilepenge ikai kwini ki barungulu, ku marudrawdrangeini la ikaikai kavai.

⁵ Sakabilrilinga, ku yuginsia ka Gade la kela kawriva ki Davidi, “Madha ikainga kikai; lu kirimwa mwa ka Yuda.” Ku Davidi la ngidrakale si papia angatungatu kavai Herethe.

⁶ Yakai saka minakavalane, ku Saule yakai Gibia, la nene ikai sisiane ki tailebeane ki angatu ka yanagi, la ecenge ku idiri. Kudra lakiacapilini la ngithalringulu iniane acegecege. La ikai ku umawmase ku peaelaela ki talialalai ku taikaiyane kilepenge ki Davidi si lasasiakawluini.

⁷ Ku talialalai la kawriva ki lakiacapilini, “Swa Biniyamingi! Kilalra! Lu kidremedreme numi lri baai numiane ku Davidi ku angangade si babudwane, lri pakicapili numiane ikai takwapingane?

⁸ Bekace ka amani kai ku kiececebe numi nakwane? Ku lalakeli ngiaelrenga ki Davidi, laka kadrwa ku wakela numiane pelaela nakwane. Kadrwa ku umawmase ku makalithi nakwane; laka kadrwa ku umawmase ku peaelaela nakwane ku kiacapilili ka Davidi aka wasilasilape ku apapacadhane nakwane, ku lalakeli la pakagagarangeana iniane!”

⁹ Ku Duige ka swa Idume taelre ki lakiacapili ki Saule acegecege ikai kwini; kwini lasu la kawriva, “Ku Davidi samwa kavai cekele Nube, mwa ki lalake ki Ahitube ka Ahimileke, wadrelaku iniane.

¹⁰ Ku Ahimileke la pasikai ki Davidi kivaga ki Tamatama, ala baai ku laakaneane si kwidra lrabu ki Gulriathe ka swa Pelisitine.”

¹¹ Ku talialalai ka Saule la sikawlu mwa dawlu ki barakalai ka Ahimileke si yakai Nube abarakalakalai ka laretesaneini; kwini lalasu la makitu kela.

¹² La kawriva ku Saule ki Ahimileke, “Ahimileke kilalra!” Ku Ahimileke la tubalre, “Talialalai, ala cuna!”

¹³ La kawriva ku Saule, “Asu kirimu taelre ki Davidi kidredredreme ku akiecebane nakwane? Asu baai iniane ku akaneane si lrabu, si pasikai iniane kivaga ki Twaumase? Kwini lasu wabaebaebalre nakwane kikai, si mukalavalava ku papacai nakwane!”

¹⁴ La kawriva ku Ahimileke, “Ku Davidi amani ku twakapatengatengane papia muswane ka talialalai ka kiacapilisu, laka taelrelre ki lalakesu, ka amani ku tamatama ki tarapalakebe muswane, laka amani ku kimusaesakenenga ki yakai ki daane ki talialalai.

¹⁵ Unu patengane ka pasiakaiyaku iniane kivaga ki Twaumase, ai kikwini kaika nitawpiane. Ala kwini kiadremedreme ku akiecebane ki talialalai, kusu ka talialalai madha kirimurimu anipia kwini iya nakwane si ki naneanenga ki wacekecekeleli, asi lwiyane kadrwa ku thingaleli kikai ngwakai kikai!”

¹⁶ La kawriva ku talialalai, “Ahimileke, kusu si laretesanesu lri tara kipapacai numi makanaelre.”

¹⁷ La kawriva kwini ki yathili iniane ka tarapalakebe iniane, “Pwa papacai kikai labarakalai ki Tamatama! Kikai lalasu maramaramau ki Davidi ku takidremedremane; kai lalasu wathingaleenga ka mwaberenga ku Davidi, lakai pelaela nakwane.” Ai kwini tarapalakebe kai maka pwalrima papacai ki barakalai ki Tamatama.

¹⁸ Ku Saule la kawriva ki Duige, “Lu mwa papacai liniane!” Ku Duige ka swa Idume la pwapapacai liniane. Ikai kwini ki vai, ku Duige la ngikakamani papacai ku ta 85 ku swadalepenga silaimai ku Ipude ka barakalai.

¹⁹ Ku Saule la mialri papacai kwini ki yakai Nube ka cekele ki barakalai ki laumawmase, kai wasusu ku sawvalai ku labaibai, ladaini si lavavalake, lwange, kiu, ruba papaacai demedeme.

²⁰ Ai, ku tangea ku lalake ki Ahimileke ka Abiathare mwabere, mwa kielre ki Davidi.

²¹ Kwini lasu la pelaela ki Davidi, ku tapiane ki Saule papacai ki labarakalai ki Tamatama.

²² La kawriva ku Davidi, “Kwini ki vai wadrelaku ki Duige ka swa Idume sa ikai kavai, la thingalaku lri tara mwa pelaela ki Saule iya. Kwini takipapacadhane ki retesanesu, yakai ku sikiningili;

²³ Ala ikaikaiya kikai, madha mukulukuludru. Ku Saule kiadredredreme ku apapacadhane mitane ka tadrusa, ai kai taelresu nakwane, kaisu lri katumane.”