1 Samuile 21 - Ngudradreadrekadhane Ka Sisiu 魯凱語聖經

Mwabere ki Saule ku Davidi

¹ Ku Davidi wakela kwini ki yakai Nube ka barakalai ka Ahimileke. Ku Ahimileke la kathathithiiburu mulatadre kidredresenge iniane, la iya kai, “Asu tarungeangea kela kai?”

² Ku Davidi la kawriva, “Kunaku kiasikawlaku ki talialalai pakela kikai. Ku talialalai peaelaela nakwane, madha pathingathingale ki naaneanenga kikai kipuawnganeli kikai. Ala kikai lasasiakawluli, wacununga naku liniane kudra amwane nai madredresenge.

³ Kaiasasane, yakai ku manemane ku akaneanesu? Badhaili ku lrima ku pange, ku ladrumane ku akaneane asisusu.”

⁴ Ku barakalai la tubalre, “Kadrwa ku langupangepange, kathane ka Alrivilrivi ka pange. Lwiyasi kikaaikai kwini lasasiakawlusu laka kaiyana taelre ki ababai lri kaikatumane malra.”

⁵ La kawriva ku Davidi, “Laibekace. Kai lasasiakawluli adravane ka kiasikawlu ku kaika makucingalre tara pasusu kudra ki kakudhane ngipapakabulabula, sikamanianenga kaikameane kikai nipawkalrivilane ka awngane!”

⁶ Ku barakalai la malra ku Alrivilrivi ka pange si baai ki Davidi; asi lwiyane kathane kwini sapatarumarane ki Tamatama ka pange, ka tawmalramalrane patwalai ki Alrivilrivi ka cukwi pawbalrithi.

⁷ (Kudra kiacapili ki taralapulapu ki nilapulapwane ki Saule, swa Idume ka Duige, la icengecenge ikai kwini, asi lwiyane kwini lasu wamwa kwini pangimia kudra naika apangimianeini ku pangukai ki takisuswane.)

⁸ Ku Davidi la kawriva ki Ahimileke, “Yakai ku idiri ku lrabusu? Ku talialalai pakiasamwamula nakwane kirimwa mukadalranane iya, kadrwanga ku zikangeli mwana malra ku lrabuli si drumane ka sakikaruburane.”

⁹ Ku Ahimileke la tubalre, “Yakai kai vaeva kai lrabu, amani kwidra sarakaiyanesu papacai ki swa Pelisitine ka Gulriathe sa ikaisu kavai vaalru Ila. Kwidra lrabu nipikaiyane lrilrikudru ki Ipude, arakai ku makalrilau cabu. Nau malra lwiyasu, malra. Kwini lrabu ikaikai kathane ku sarakaikaiyane kikaruburu.” Ku Davidi la kawriva, “Ta badhaili, kadrwanga ku drumane ku lrika mathaithariri kai ki lrabu!”

¹⁰ Ku Davidi la katwase, mubere ki Saule, mwa ki talialalai ka Akisi ka swa Gathe.

¹¹ Ku sasiakawlu ki Akisi la kawriva ki talialalai, “Kavai kaika Davidi, ka talialalai ki swa Iseraylri? Kaika amani kwidra senasenai sa dralradralrai ku labaibai, ‘Ku Saule papacai ku takudrulu, ku Davidi papacai ku takudrai’ ki iyaiya ka Davidi?”

¹² Kwini makakawrivariva lini la kilalra ku Davidi; kwini lasu la mukuludru ki talialalai ka Akisi,

¹³ lakamani kwidra icucubungu liniane ranau ngikaamamama. Kwini lalasu taruthuku sa iya iniane, kwini lasu la pikai ki taelelebane ki cekele cacacapange papacase zeazega, ku ngalruthuini mwaludru mwa ki ngisingisi.

¹⁴ Ku talialalai ka Akisi la kawriva ki sasiakawluini, “Drela, kikai umawmase ka amamama! Anu malra iniane iluku pwakai cucubunguli?

¹⁵ Kaiyana makakelrete kai yakai nakwane kai laamamama? Anu ilukunga kikai tangeeanga, la ikai ki daaneli amamama upupungu nakwane?”