1 Samuile 20 - Ngudradreadrekadhane Ka Sisiu 魯凱語聖經

Paralubu ki Davidi ku Yunathange

¹ Ku Davidi twalai Naiuthe ka Rama mubere si la mwa kidrele ki Yunathange, si iya kai iniane, “Watumanaku? Manemane ku pasalriuli? Manemane ku tapasalrivaneli ki tamasu, si lalri papacai nakwane?”

² Ku Yunathange la kawriva, “Ini, kaisu lri pacai! Ku ama adravane ka manemane, ku makucingalre ku kai makucingalre peaelaela nakwane patuelre. Kikai awngane kai lri kibubuli nakwane lutumane, kai lri pia kwini!”

³ Ai ku Davidi la kiketekete iya kai, “Ku tamasu wathingale ala ka madalamesu nakwane, kai lri pelaela muswane ku nau pia iyaiyaini, asi lwiyane amani lu kwalri ku kidremedremeini amia muswane. Lri papiaku ki palralrawthu panianiake ka Tamatama papia muswane kiketekete, ku apacadhane yakai cucubungu nakwane!”

⁴ Ku Yunathange la iya kai, “Ku ani pia kwini iyasu nakwane, kainaku lri pasiwlri.”

⁵ Ku Davidi la tubalre, “Luiya amani ku aswalalanga ka vai, naika kiabalrulaku ki talialalai, lwiyasi mathariri la iyasu, ala nau kibalai ikai ki umawma, pakela lukapakavale ki maungu.

⁶ Alaiyasi ku tamasu ani kai kela kibalrulu iya nakwane, pelaelanga iniane, ka kiavagaku muswane katwase mubalriu mu Bithelrihime, asi lwiyane kikai amani ku tapatarumaramarane ka wacekecekele kai ki caili.

⁷ Kwi lasu lwiyasi la iya kai, ‘Unu!’ Lu mia kwini waudripingaku; lwiyasi la kalisi, lri thingalesu ka lri tara papaacai nakwane.

⁸ Kiatubiaku ku atara pangimianesu kudra tamakaketeketaneta icucubungu ki Tamatama. Alaiyasi ka yakai ku pasalrivaneli, ngikakamania ka papacai nakwane; asaluka tamasu ku amani ka papacai nakwane?”

⁹ Ku Yunathange la kawriva, “Madha iyaiya kwini kidremedreme! Lwiyasi la thingalaku ala ka lri papacai muswane ku ama, bekacaku kai pelaela muswane?”

¹⁰ Ku Davidi la kivaga, “Lwiyasi ku tamasu laka akwalisi tubalre muswane, aneane ku lri kela pelaela nakwane?”

¹¹ La tubalre ku Yunathange, “Ila, tamwa kavai ubulane!” Kwini lalasu la karedele katwase mwa.

¹² Ku Yunathange la kawriva ki Davidi, “Ku Tamatama ka Twaumase ki swa Iseraylri ani kamani ku sapatuthingalane mitane! Luiya si lu pakavale ki miyaiya kai, lri dredrelaku ku takidremedremane ki ama. Lwiyasi ka kadrwa ku tangilisianane muswane, lri ilukaku ku vaga baai muswane;

¹³ alaiyasi la pikai ki kidremedremeini nau papacai iya muswane, si la kainaku pelaela muswane, asu kasulivate katwase, ku Tamatama lani papacai nakwane.” Ku Yunathange la kawrivana, “Ku Tamatama ani tapalra muswane, mia kunadruma ku tatapalraneini ki ama!

¹⁴ Ala panianianiyakeanaku, kusu tara arakaiya ku sakialibake ki Tamatama tukucingalra sirapale nakwane; alaiyasi pacadhaku,

¹⁵ tuthadalrana tukucingalre sirapale ki wacekecekeleli. Kudra lu maka pakamudunga ku Tamatama ki badhasu,

¹⁶ kudra tamakaketeketaneta ani kapapedrengeana. Lwiyasi la kabebetethesu ku tamakaketeketane, ku Tamatama lri pathavungu muswane.”

¹⁷ Ku Yunathange la peelana kiketeketa iya ki Davidi ku akilibakane iniane, asi lwiyane kwini lasu madalame turamuru ki Davidi, mia ku tangikakilibakaneini.

¹⁸ Ku Yunathange la kawriva ki Davidi, “Luiya amani ku aswalalanga ka vai, lu kanekane la kaisu ikai, ku la palrapalra lri tara patarathingale;

¹⁹ lu pakavale la kaisu ikainga, ku palrapalra lri patarathingale. Lakamani, kusu lu mwa kwidra natamwanesu ku paswalala kibalai, si kibalai mulrilrikudru ki alrimulumulu.

²⁰ Lri malraku kwini alrimulumulu tudukipi, si lraili aru tulrulu,

²¹ ala lri cunaku ki sasiakawluli mwa silape kwini lraili. Lwiyasi la kawrivaku ki sasiakawlu, ‘Yalrilrikudru muswane kwini lraili, lu mwa silape!’ Kwini taiyane yai, lri kasulivatengasu, mutaluvaivadhanga, lri papiaku ki palralrawthu panianiake ka Tamatama kiketekete, kaisu lri matikuru lutumane.

²² Lwiyasi la pelaelaku ki sasiakawlu, ‘Yacucubungu ka lraili’, lri kirarimusu lrabwale! Asi lwiyane amani ku Tamatama ka ani katwase amia muswane.

²³ Ala kikai tamakaketeketaneta, ku yakai ku Tamatama ka lrika palralrawthu ikabicelrakane pathingale mitane.”

²⁴ Ku Davidi la kibalai ikai ubulane. Saka aswalalanga ka vai, ku Saule ka talialalai la kela kane ku aga,

²⁵ la tuthadalrane nene sakai kwini ki talikai ki balingibingi. Ku Abinere la nene ithili iniane, ku Yunathange la nene cucubungu iniane, ku taneneane ki Davidi laka kadrwa ku wanene.

²⁶ Ai kwini ki vai kai tumana amia ku Saule, asi lwiyane kwini lasu ku Davidi alau ngwalai lu ikai ku kaika takabulaneini amia.

²⁷ Sakakaiyane, ka kaiyane ki aswalalanga ka vai, ku taneneane ki Davidi laka kadrwa ku wanene; ku Saule la kivaga ki Yunathange, “Matumane ku Davidi kuiya si kaikameane ani kakadrwa kai kela kane kai aga?”

²⁸ Ku Yunathange la tubalre, “Kiatubi nakwane ku Davidi, ku apalrainganeli iniane papia Bithelrihime.

²⁹ Kwi lasu amia kai, ‘Ala nau mwa, asi lwiyane kunai ka wacekecekele lri ikai nai cekele patarumara; ku kaka tara kela amia nakwane. Alaiyasi ka talragili muswane, ala paubalrivaili mwa lrikape ki wacekecekeleli!’ Lakamani kudra kaika kela ki Davidi kibalrulu.”

³⁰ Ku Saule la ngidekedeke kalisi, si kaelaela ki Yunathange, “Kusu ka waudriwdripi! Wathingalenga naku ala ka ngiatalikaikaisu ki Davidi, ngiamamulringwngasu si lringau ki tinasu!

³¹ Laibekace kaisu thingale, lu makavale panianiake ku Davidi, ka kaisu lri maka atalialalai kai ki kuni? Lu mwa silape iniane, la iluku mwa kai. Kwini lasu lri tara kipapacai!”

³² Ku Yunathange kawariva, “Kwini lasu ani lri kipapacai? Manemane ku pasalriuini?”

³³ La kirimu ciliki ku idirini ku Saule, papia ki Yunathange verevere, pasana papacai iniane. Ku Yunathange ala pulringaunga ku tamaini ka tengane ka kiadredredreme ku papacai ki Davidi.

³⁴ Ku Yunathange la kalisi si twalai ki takalringulane acegecege, si turakete kai kane ku aga, kwini vai kwini kaiyane ki aswalalanga ka vai. Ku Yunathange la ngwalai kai ki pangukai ki Davidi la kipakwalri turamuru, amani sa tusinalreme iniane ku Saule.

³⁵ Sakakaiyane ki mialrealre, ku Yunathange la singikai ku tamaiyanengaini ku zikange mwa ubulane kidrele ki Davidi. Kwini lasu la iluku ku tangea ku vavalake,

³⁶ la kawriva iniane, “Lu lrabwala mwa silape ku lrailili.” Kwini vavalake la lrabwale. Ku Yunathange la lraili ku vaeva, la lribate iniane.

³⁷ Salri kela kwini ki tamakakaiyane mucilri ki lraili, ku Yunathange idrengera la iya iniane, “Yatali cucubunguana ku lraili,

³⁸ madha ikai kwini acegecege, kirimwa lrabwale!” Kwini vavalake la siludu kwini lraili, si baai ki pilrailane.

³⁹ Laka kadrwa ku natikianenga ku tathingalane kwini vaga ka manemane ku patharevane, kathane ku Yunathange si Davidi ku wathingale.

⁴⁰ Ku Yunathange la malra ku bu si lraili baai ki vavalake, lu aswalala mubalriu iya iniane.

⁴¹ Sa katwasenga kwini vavalake, ku Davidi la mutaluvaivai twalai lrilrikudru ki alrimulumulu, si arika drwadrusa ku paculru pidruru, kingitulrulu sukubu iniane. Kwini lasu la mauma tubitubi ki Yunathange, ku Davidi laka maparawramuru ki Yunathange tubi.

⁴² Ku Yunathange la kawriva ki Davidi, “Lu kasulivalivata katwase! Ku Tamatama lri tara ikai ki lamwabaibalrithi nakwane si lamwabaibalrithi muswane, ka palralrawthu pasusu kikai tamakaketeketaneta.” Ku Davidi la katwasenga; ku Yunathange la mialri siwlri mucekele.