1 Samuile 2 - Ngudradreadrekadhane Ka Sisiu 魯凱語聖經

Inulri ki Hana

¹ Ku Hana la inulri iya kai: Ku Tamatama paswaete ki kidremedremeli ku akiragadhane; ku Tamatama la patangeraranenga kai awlruli. La dulrwaku mulralrakai ki labadha, asi lwiyane palribulu ku Twaumase nakwane, pakiararagai nakwane.

² Kathane ku Tamatama ka sanianiangenga; kathaneini, kadrwa ku saniange. Ku Twaumaseta kathane ka tarapalribulu.

³ Kunumi madha pangibwabwalenga ku ngikamianane ku lingau; madha kawrivarivanga palribate ku lavaga. Asi lwiyane ku Tamatama amani ku wathingale ki manemanenga ka Twaumase; wasaibange ki kakudhane ki umawmase.

⁴ Ku bu ki tamagarange macelra; ku malrupi la akabalrithi sapukwanenga.

⁵ Ku maesaesai ku umawmase ngiabalrelringa ngwalai ki akaneane kwalri; ku masilrau kai lri kasilraunga. Ku kai twalalake ku labaibai twalalakenga ku tapitu ku lalalake; kudra ngwakalra tulalake ku tiatina maulrase patuelre ku lalalake.

⁶ Ku Tamatama papacai ki umawmase, la mialri papanianiake ki umawmase; pwa swadriadringi ki umawmase, la mialri pasiwlri kainganai ki umawmase.

⁷ Pamatiakuru ki drumane, pakaesai ki drumane; paatalelebe ki drumane, pakiausakene ki drumane.

⁸ Patwalai ki thuvugu pabelenge ki matiakukuru; patwalai ki lriduku parwabelenge ki matiakuru kwalrialri ka umawmase. Pasiatalragi iniane si taelre kivavange ki lalake ki talialalai, la pakilrigu liniane. Kai karwalai ki kadaengane Tamatama ka wacegecege; piakai belenge cegecege kai kawmasane.

⁹ Ku Tamatama siarapale ku tapudrapalane ki twakucingalre iniane ka lakawkawluini; ku ngialisiane ku umawmase lri kawlrau ikai kadradridrimitane. Kai umawmase kai lri maka arakai ku pukuini si la akaci.

¹⁰ Ku Tamatama lri amudu ki badhaini; lri twalai belenge pawleca makakai liniane. Ku Tamatama lri saibange pakanaelre kai kawmasane. Lri baai ku puku ki pacegecegeini ka talialalai, lri paakaci ku pilrini si cegecege ka talialalai.

¹¹ Sakabilrilinga, ku Ilekana la siwlri mwa Rama; ku vavalake ka Samuile la asuru ikai Selu; ikai ki barakalai ka Ilri kibulrubulru marasikaikai kipuawngane ki Tamatama.

Sawvalalai ka lalalake ki Ilri

¹² Kwini tadrusa ka lalake ki Ilri amani kudra twasinalrelreme ki umawmase. Kwini lalasu twadreadrekase ki Tamatama,

¹³ kai pasususu kwidra nitukakudhanane ku tamalramalrane kudra sapatarumarane ku labeate. Lu ikai ku lri patarumara, kwini lalasu kai watelrai sikawlu ki sasiakawlu iluku ku tututulru ku valisi ka sacicivane, lu ipalungana ku beate,

¹⁴ kwini sasiakawlu la pwa thedelre ki yapalungane, sana pakai ku manemane, wamalra si barakaladhane iya. Kwini lalasu la pia kwini sanaka wakela Selu patarumara ka swa Iseraylri.

¹⁵ La kaika ngimiyaiya kai sikakathane, adravane lu kaiyana lama ku lamace, kwini sasiakawlu ki barakalai, la kawriva kwini ki patarwamaramara, “Ta badhaili pakavaeva ku beate; la nau baai ki barakalai paakame. Malrase ki nithingelrane, luka ngeta lri malra.”

¹⁶ Lwiyasi kwini umawmase la tubalre, “Lri pasuswana nai kudra ki tapangimiamiane paswala lama ku lamace, ala lri dulrusu ngisasingikainga ku amalrane!” Kwini sasiakawlu ki barakalai lai lri iya kai, “Ini, taanga baadhaili kikai! Lu kaisu baai, lri ribicaku!”

¹⁷ Ikai ki tadrelane ki Tamatama, kwini pasalrivane ki tadrusa ka lalake ki Ilri kiapakilringaunga turamuru, asi lwiyane kwini kadrwa ku tamusakesakenane ki lrika sapatarumarane ki Tamatama.

Ku Samuile yakai Selu

¹⁸ Kikwini kwidra, ku Samuile vavaalakeana; kwini lasu sialaimai ku lalasare ka kaimadhane ka Ipude si marasikaikai kaungu ki Tamatama.

¹⁹ Ku tinaini lukacaili twalaimai ku vaeva ku sapakabelebelenganane, lu katwase tarudrusa ki tawaneini patarumara ku cailanane wailuku si baai iniane.

²⁰ Ku Ilri la subulrubulru ki Ilekana si taelrelreini ka Hana, si kawriva iniane, “Ku Tamatama ani pangukai ki taelrelresu si baainga muswane ku lalakesu, lani ikai ku sapawbalrithane kikai patarumarasu kikai lalake.” Kwini lalasu la siwlri mubalriu.

²¹ Ku Tamatama la subulrubulru ki Hana; kwini alisu la tulaalakenga ku tatulru ku sawvalai, tadrusa ku ababai. Ku vavalake ka Samuile la marasikaikai ki Tamatama, aru swasuai kadradrau.

Ku Ilri pakiapapawlringau ki tadrusa ka lalalakeini

²² Ku Ilri laka tarudrawdrangenga turamuru. Kwini lasu laka takilalrane kudra thathatha ku kaika mathariri ku tamarasikaikaiyane ki tadrusa ka lalakeini ki sakacekele lini ka swa Iseraylri, kwini lalasu la pakela kudra wamwa taelre apece kwini ki kiapuauawngane ka labaibai ikai ki Alrivilrivi ka balrawbau.

²³ Ku Ilri la kawriva liniane, “Anu pia kikai miyaiya kikai? Wakelanga makanaelre makitu pelaela nakwane kikai paramia kikai kai pia numi kai ngialisiane.

²⁴ Lalalakeli, madha piyaiyanga kikai! Kwini kitulisilisi numi ikai ki kawkawlu ki Tamatama!

²⁵ Lwiyasi la ikai ku umawmase ku pasalriu ki drumane ka umawmase, ku Twaumase lri dulrwana ngitalikaiyane iniane kidrikisi ku vaga; ai luka umawmase ku pasalriu ki Tamatama, aneane kulri maka pasikai iniane kidrikisi ku vaga?” Kwini lalasu la kai kilalra ku vaga ki tama lini, asi lwiyane ku Twaumase malrithethenga ku apapacadhane liniane.

²⁶ Ku vavalake ka Samuile la aru kadraunga, la kikadalame ki Tamatama si kikiraragai ki laumawmase.

Wasakalai ku akipamatikurwane ki tai Ilri

²⁷ Yakai ku umawmase ki Twaumase ku wakela kidrele ki Ilri, papia iniane kela pelaela ku vaga ki Tamatama, “Kudra cucungulanesu ka tai Arungu sa aduriduri ki talialalai ki swa Izipiti, napapiaku iniane cucunu.

²⁸ La patwaladhaku ki lazuku ki swa Iseraylri, si pilriaku ki wacekecekeleini paabarakalai nakwane, pakamani liniane kudra yakai ki tapatarumaramarane marasikaikai, papia nakwane padalai ku sangwalreme, si ngiragelane ku Ipude si marasikaikai nakwane. La baadhaku liniane ku lri ka akitudrulrane lini kudra nilamane ku lasapatarumarane.

²⁹ Anu karau kwini sapatarumarane ku lamanemane kudra tara pangimia kwini iyali kwidra ki kawkawluli? Ilri, asu ka tukuciacingalre ki lalakesu ka makadrwadrwa nakwane? La palraingisu liniane malra patwalai kwini ki la sapatarumarane ki kawkawluli ku mathaithariringa si ngipapakaricuru?

³⁰ Kunaku ka Tamatama ka Twaumase ki swa Iseraylri napalrainginga naku ki wacekecekelesu si zukusu ka amani ku lrika palralrawthu abarakalai marasikaikai nakwane. Ai, kikai kwidra lri mwalraku kwini takipuawngananesu; lri tara tukucingalraku kudra twakucingalre nakwane ku umawmase, la sidrekase kudra la twadrekase nakwane ku umawmase.

³¹ Drela! Wakelanga kai vai, kunaku lri malraku ku niake ki yacengecenge ki wacekecekelesu si laretesanesu aru tuedrekane, kadrwa ku lri kaelrenge ku niake.

³² Lri tara kwalrisu kidremedreme, si pusamalra kudra baaili ki drumane ka swa Iseraylri ku akaesadhane. Kunumi ka maretetese la lrika kadrwa ku panianiake pakela ki tarudrawdrange.

³³ Ai, lri suraku pikai ku tangea ku mwabaibalrithi muswane, paabarakalai iniane marasikai nakwane, ai kwini lasu lri kamukici, si kasalivaalrawnga. Ku lamwabaibalrithi muswane makanaelre lri makitu sulisi si pacai.

³⁴ Ku lalakesu ka Hupeni si Pinehase lalri masilange ikai ki vaivai pacai; kikai amani ku sapatuthingalaneli muswane kikai lavagali lri tara ngimia.

³⁵ Lri pilriaku ku tangea si pacegecege abarakalai, kwini lasu lri tara tukucingalre nakwane, singikai kudra takidremedremaneli kipuawngane. Lri patarumaraku ku mwabalrithi iniane; kwini lasu la lrika taikaiyane kudra ki pilrili si cegecege ku talialalai kipuawngane.

³⁶ Kudra waudripiana ku lamwabaibalrithi muswane lri papia kwini ki barakalai ababange ku akaneane, ngwalai ki bekelane ka akaneane, lalri kitubi ku ataraparaluralubu ki barakalai.”