1 Samuile 19 - Ngudradreadrekadhane Ka Sisiu 魯凱語聖經

Ku Saule wahakegai ki Davidi

¹ Ku Saule peaelaela ki lalakeini ka Yunathange si lakiacapilini makanaelre, kwini kiadredredreme ku apapacadhane ki Davidi. Ku Yunathange madalame turamuru ki Davidi,

² la mwa pelaela iniane, “Ka ama kiadredredreme nau papacai amia muswane. Luiya ki mialrealre, la kibaladha ikai ki kalelepengane, si ikaiyana kikwini.

³ Lri kelangaku kwini ki takibaladhanesu, si ikai thili ki ama makakawriva iniane pangukai muswane. Lwiyasi ikai ku la dreleli ku tangimiamiane, lri tara pelaelaku muswane.”

⁴ Ku Yunathange la icucubungu ki Saule drengedrengere ki Davidi, si iya kai, “Ama, madha pakaduladula ki sasiakawlusu ka Davidi; kwini lasu kadrwa ku piaini ku tulisi muswane. Ngiabaalrelringa, kwini lasu ku piangaini yadrepele ka atutharirane muswane.

⁵ Ka lasu kiapacai ku niakeini si mwa papacai ki Gulriathe; ku Tamatama la pamalebe ki badha ki swa Iseraylri. Kikwini kwidra la mialrisu kiraragai, kaiasasane asi papacai ki kadrwa ku pasalrivane ka umawmase, si vutha mwa papacai ki Davidi?”

⁶ Ku Saule la kimalra ku takawrivane ki Yunathange, la papia ki nagane ki Tamatama kiketekete ku kaika apapacadhane ki Davidi.

⁷ Ku Yunathange la dawlu ki Davidi, si pelaela kilakikai iniane patuelre, ala iluku iniane kidrele ki Saule. Ku Davidi la siwlriwlringa mia ku siaswalane marasikaikai ki Saule.

⁸ Ku swa Iseraylri si swa Pelisitine la peelanga makakaruburu. Ku Davidi la mwa kikaruburu ki swa Pelisitine, si pamalebe liniane, kwini lalasu la makitu mubere.

⁹ Yakai saka minakavalane, ku twalai ki Tamatama ku aidridringane la kela ki Saule. Ku Saule la malra ku idiri, si nene ikai daane; ku Davidi la mialri ikai kwini, icengecenge patungutungutungu ku patungutungu.

¹⁰ Ku Saule nau arakai ku idirini pwa patalu ki balingibingi culrulu ki Davidi la iya, ai ku Davidi la mubere, ku idiri la tengadre ikai ki balingibingi, ku Davidi la mubere, si katwasenga kwini.

¹¹ Kikwini ki maungu, ku Saule la sikawlu ku wamwa lepenge ki daane ki Davidi, nau papacai iniane luiya lukamialrealre la iya. Ku taelrelre ki Davidi ka Mikale la kawriva pakipapawlringau ki Davidi, “Kai maungu lu kaisu mubere, lri tara kipapacaisu luiya.”

¹² Ku Mikale la pangukai ki lribange saruru pulebe ki Davidi, paubere iniane.

¹³ Ku Mikale la malra ku vaeva ku samiamiange pikai ki tapeapecane, la arakai ku ubale ki kiu ka tawlrwane pasalebe ki awlru ki samiamiange, la pwa cawbu.

¹⁴ Sa kela pwalra ki Davidi ku sasiakawlu ki Saule, ku Mikale la pelaela liniane macaeme kai Davidi iya.

¹⁵ Ai ku Saule lu nguselana la iya liniane, ani tara drele ki Davidi iya. Ku Saule la cunu, “Malra iniane patala tapeapeecane, nau papacai iniane.”

¹⁶ Kwini lalasu sa mudaane, la drele ala ka vaeva ka samiamiange kwini tharwatakanga itapeapecane, la si tawlrwane ku niarakaiyane ku ubale ki kiu.

¹⁷ Ku Saule la kivaga ki Mikale, “Asu kirimu lrilrigili nakwane, pawbere ki badhali?” Ku Mikale la tubalre, “Lu kaisu paralubu nakwane mubere, lri papacadhaku muswane amia.”

¹⁸ Ku Davidi mwabere mwa ka Rama kidrele ki Samuile, la pelaela ki Samuile patuelre kudra tapianeini ki Saule iniane. Ala katwase tupapalra ki Samuile mwa ka Naiuthe, si ikaikai kwini.

¹⁹ La ikai ku umawmase ku peaelaela ki Saule, ku Davidi yakai ka Naiuthe Rama iya,

²⁰ ku Saule la sikawlu ku umawmase mwa pwalra iniane. Kwini lalasu la drele ku layuginsia, sangililuku ku Samuile, si dralradralrai karalealeale. Ku Ri ki Twaumase la kirimu mwa ki sasiakawlu ki Saule ka laumawmase, kwini lalasu la kirimu pathagili dralradralrai karalealeale.

²¹ Ku Saule sa kilalra kikai tangimiamiane la peelanga pakatwase ku takaakalra ku umawmase, kilakikai umawmase la mialri ngialrau ki aswalala dralradralrai karalealeale, ku Saule saka kingitulrulu sikawlu pakatwase, la ngimia ku tapiane ki aswalala.

²² Sakabilrilanenga la ngikakamani ku Saule mwa ka Rama. Sa kela kwini lasu kavai Seku thili ki madrau ka dralremedreme, kwini lasu la kivavaga ku taikaiyane ki Samuile si Davidi. La ikai ku umawmase ku peaelaela iniane, kwini lalasu yakai Naiuthe iya.

²³ Sa papiapia kavai kwidra ku Saule, ku Ri ki Twaumase la mialri kirimu mwa iniane, kwini lasu la tara kadadalranane takudralradralrai karalealeale kela ka Naiuthe.

²⁴ Kwini lasu la icucubungu ki Samuile mwalra ku laimaini, si dralradralrai karalealeale, turakete taleare vilralrakane apece. Ala amani kikai kudra tatwaladhane kudra “Ku Saule la mialri ka ayuginsia?” Amia ka vaga.