1 Samuile 17 - Ngudradreadrekadhane Ka Sisiu 魯凱語聖經

Ku Gulriathe walemethe ki swa Iseraylri

¹ Ku swa Pelisitine yasarubu ikai Yuda ka cekele ka Suku, padulru ku akikaruburane. Kwini lalasu twatakwapingane ikai Ipese Damime kwini kabicelrakane ki Suku si Azeka.

² Ku Saule si swa Iseraylri la isarubu tutakwapingane ikai vaalru Ila, ikai kwini padulru ku amakakaruburane ki swa Pelisitine.

³ Ku swa Pelisitine la katilibi ikai ki lregelrege; ku swa Iseraylri la mialri katilibi ikai ki taluvale ka lregelrege, ikai kabicelrakane liniane agisi ku valrwalru.

⁴ Yakai ku swakai cekele Gathe, ku naganeini sia Gulriathe, la twalai ki takwapingane ki swa Pelisitine, papia ki swa Iseraylri lemelemethe. Kikai umawmase ku elrengane ikai kau tulru ka mituru,

⁵ la ngiragelane ku 57 ka kukingi ku lriwlu ka laimai, sitaupu ku lriwlu,

⁶ kwini drapale la mialri arakai ku lriwlu ka kacingi, kwini lasu la angeale ku lriwlu ka saderedererane.

⁷ Ku idirini mararamau ki bulri ki satinutinunane ku bitulrwane, ku adreme ki idiri ku telregane pitu ka kukingi. Yakai ku tangea ku kwapingi, ku waecenge ku alathareini, kaswalalala iniane.

⁸ Ku Gulriathe acegecege, papia ki swa Iseraylri tawtau giringi, “Watumatumane numi ikai kwini? Watilibi numi takikaruburu iyaiya? Kunaku swa Pelisitinaku; laka aduri numi ki Saule. Pilria ku tangea kulri kela kikaruburu nakwane!

⁹ Lwiyasi la pamalebe nakwane, si papacai nakwane, nai aduringa numiane alaiyasi pamalebeaku, si papacai iniane, lri aduri numi naiane.

¹⁰ Kaikameane walemethaku ki kwapingi ki swa Iseraylri. Lri lreme numi pakainganai ku tangea ka umawmase kela kikaruburu nakwane!”

¹¹ Ku Saule si lakwapingini sa kilalra kikai vaga la kathathiburu ukuludru turamuru makanaelre.

Ku Davidi yatakwapingane ki Saule

¹² Ku Davidi lalake ki Yesi ka swakai Iparathe ka cekele Bithelrihime ki Yuda. Tavalru ku lalake ki Yesi. Saka talialalai ku Saule, ku caili ki Yesi laka tarudrawdrangenga turamuru.

¹³ Ku tatulru ku latakataka ka lalakeini la tupalra ki Saule kikaruburu: Ku takatakanga sia Ilriabe, ku mwasakadrusa sia Abinadabe, ku mwasakatulru sia Sama.

¹⁴ Kai Davidi laka agiaginga ka lalake. Kikai tatulru ka latakaini sa tupalra ki Saule,

¹⁵ kai Davidi kai watelrai mwa Bithelrihime pasikai ki tamaini pagwagu ki kiu.

¹⁶ Ku Gulriathe lukamialrealre la ngibwale papia ki swa Iseraylri lemethe, ikai kau makamasupatele ku vai.

¹⁷ Yakai saka minakavalane, ku Yesi la kawriva ki Davidi, “Iluka kai mangeale ka kukingi ka niakamane ka mugi si mangeale ku pange, la kisamula mwa ki takwapingane lrikape ki lataka.

¹⁸ La malra kai mangeale ka nipaseseanenga ku mireke si baai ki tarapadrekadrekase ki kwapingi. La drele ku tangimiamiane ki lataka lu udringadringai lutumane, si la iluku madu ngubeekele ku lamanemane siwlri, ka sapelaelanesu ka wadrelengasu liniane, ala ka mwadringadringai.

¹⁹ Ku talialalai ka Saule, si latakasu, si lakwapingi ki swa Iseraylri, tara yakai ka vaalru Ila makakaruburuburu ki swa Pelisitine.”

²⁰ Sakakaiyane, ku Davidi sara ngiadrakaale, la malra papikai ki drumane padrangalru kwini lakiu, la singikai ku tacunane ki Yesi iluku ku akaneane mwa. Sa kelanga ki takwapingane, ku swa Iseraylri la icengecenge mutaluvaivai makakaraleale kikaruburu;

²¹ ku swa Pelisitine si kwapingi ki swa Iseraylri la macacucubungu tara katilibi.

²² Ku Davidi la malra kwini akaneane papikai kwini ki tararagele ka kiacapili, la katwase lrabwale mwa drele ki latakaini, kivavaga ku tangimiamiane.

²³ Sa kawrivariva ku latakaini, ku Gulriathe la arwacucubungu, mia ku siaswalane, papia ki swa Iseraylri kaelaela kipatata; ku Davidi la kilalra.

²⁴ Ku swa Iseraylri sadrele ki Gulriathe, la mukuludru si katwase mawbebere.

²⁵ Kwini lalasu makawrivariva, “Drela kavai ki umawmase! Kilalra kavai sakaelaelaneini ki swa Iseraylri! Ku talialalai ka Saule la tusapakalrevane ku maadrau ku paisu kudra papacai ki Gulriathe, si lalri pakarudrange pamwa ki lalakeini, si mwalranga ku akazilwane ki tacekecekelane ki tamaini.”

²⁶ Ku Davidi la kivaga kwini ki thilini, “Alaiyasi ikai ku umawmase la papacai kavai ki swa Pelisitine, si mwalra ku takitusinalremeane ki swa Iseraylri, kwini lasu manemane ku amalraneini? Kikai kai kiagelregelre ka swa Pelisitine aneane? Ani maka sidreadrekase ki kwapingi ki apalralrawlrawthu ka Twaumase!”

²⁷ Kwini lalasu la pelaela ki Davidi, kudra papacai ki Gulriathe lri kipakalreva.

²⁸ Ku taka ki Davidi ka Ilriabe la kilalra ku Davidi sa makakawrivariva kwini ki lalasu, la kaliisi, si iya kai ki Davidi, “Watumatumanesu ikai kai? Aneane ku mwabalrithi pagwagu ki kiu? Wathingalaku ku kidredredremesu ku ngialisiane! Wakelasu dredrele ki makakaruburuburu!”

²⁹ La kawriva ku Davidi, “Manemane ku tapasamalianeli? Lai bekace adravane ka akivavagane kai maka kivaga?”

³⁰ Ku Davidi la ngibangulu papia ki druma, la mialri kivaga kikai tangimiamiane. Kudra takivavagane ki Davidi ki umawmase laka thadaalrane ku satubalreane.

³¹ Yakai ku umawmase ku kialalra ku kivagavaga ki Davidi, la pelaela ki Saule, ku Saule la dawlu ki Davidi.

³² Ku Davidi la kawriva ki Saule, “Talialalai, kadrwa ku amukuludraneta kavai ki swa Pelisitine! Nau mwa kikaruburu iniane.”

³³ Ku Saule la iya kai, “Ini, lri tumanesu kikaruburu iniane, vavalakesu, laka tarakikaruburuburu ka kwapingi!”

³⁴ Ku Davidi la kawriva, “Talialalai, tarapagwagwaku ku kiu ki ama. Yakai lu kela ku raiyungu ku cumai, si pwalra ki kiu,

³⁵ la mwaku saladha iniane, la sititi iniane, si palribulu kwini lrulai ka kiu. Alaiyasi ku raiyungu ku cumai la kainganai lredepe nakwane, wapwaku there iniane, si papacai iniane.

³⁶ Papacainga naku ku raiyungu si cumai, laka thadalrane lri dulrwaku papacai kavai kaiyana kiagelregelre ka swa Pelisitine, asi lwiyane kwi lasu twasinalrelreme ki kwapingi ki Twaumase.

³⁷ Ku Tamatama napalribulu nakwane kidaili ki raiyungu si kalesekesane ki cumai, mialrini lri tara palribulu nakwane kidaili kavai ki swa Pelisitine.” Ku Saule la kawriva, “Mathariri, lu mwa! Ku Tamatama watapalra muswane.”

³⁸ Ku Saule la baai kwini sangiragelananeini ki Davidi ku lriwlu ka talrupunu, laimai. La malra kwini tawpu pasitawpu iniane.

³⁹ Ku Davidi la malra kwini lrabu pakerenge ki adreme ka laimai, nau dadavace luiya la kai maka ngivelevele, asi lwiyane kai kiatwalrau silaimai kilakikai. Kwini lasu la kawriva ki Saule, “Kainaku lri maka silaimai kikai si katwase kikaruburu, kainaku twanagame.” Kwini lasu la mwalra kwini laimai.

⁴⁰ Ku Davidi wamalra ku ukudruini, la patwalai ki babiabila ki vaalru malra ku lrima ku maidelrethe ka latawtauru pwa ki labace, ala iluku ku savereverane ki lrenege katwase kikaruburu ki Gulriathe.

Pamalebe ki Gulriathe ku Davidi

⁴¹ Kwini swa Pelisitine la kainganainga papia ki Davidi, kudra tara malra ku alathareini la aswala iniane. Si arwadedethe,

⁴² sa patakulringwnga drele, la tusinalrelreme iniane, asi lwiyane ku Davidi vavalake ka seseelebe.

⁴³ Kwini lasu la kivaga ki Davidi, “Satumanane kwini ukudru, tawpungu amiasu nakwane?” Kwini lasu la papia ki twaumaseini pusu ki Davidi, si kipatata ki Davidi, iya kai,

⁴⁴ “Bwala, nau malra kwini wapacai ka kinawmasanesu cilri pakane ki adhadhame si waudriwdripi!”

⁴⁵ Ku Davidi la tubalre, “Lri kikaruburusu nakwane ara lrabu, idiri, dirawrane, ai kunaku lri pangukaiyaku ki nagane ki Tamatama ka abebeelengenga ki sanaka kwapingi; ka amani kudra tusinalremesu ka Twaumase ki kwapingi ki swa Iseraylri.

⁴⁶ Kaikameane, ku Tamatama lri malra muswane pwa ki alrimali. Lri pamalebeaku muswane, si thiabe ku awlrusu. Lri malraku ku wapacai ka kinawmasane ki swa Pelisitine cilri pakane ki adhadhame ki bulabulai. Lu mia kikai, kai swa kawmasane lai lri thingale ala ka yakai ku tangea ku Twaumase ki swa Iseraylri;

⁴⁷ kikai laumawmase mialri thingale ku Tamatama kai lri arakai ku lrabu ku idiri si palribulu ki kawkawluini. Sana kikaruburu lri tara pamalebe; lri malra numiane pwa ki alrima nai.”

⁴⁸ Ku Gulriathe la arwa dethe ki Davidi; ku Davidi la kirarimu lrabwale papia ki tali cucubungu ki swa Pelisitine kikaruburu.

⁴⁹ Kwini lasu la kisaswarau patwalai ki labace malra ku vaeva ku lrenege, si arakai kwini pwa ki savereverane si verevere papia ki Gulriathe. Kwini lrenege la pakai ki punu ki Gulriathe, si pakacwake ki awlruini, ku Gulriathe la aswala ku lringauini tubungu mukadrulu.

⁵⁰ Ku Davidi kai ara lrabu, arakai ku savereverane ki lrenege, ku vaeva ku lrenege la pamalebe ki Gulriathe.

⁵¹ Ku Davidi la mwa arucucubungu, dredre ki kinawmasane ki Gulriathe, si patwalai ki tawbubane sudru ku lrabu, si pwapapacai iniane, pwathiabe ngetele ku awlruini. Ku la swa Pelisitine la drele kwini tamagarange lini sa pacainga, la makitu mawbebere.

⁵² Ku kwapingi ki swa Iseraylri si kwapingi ki Yuda la kabibilrili saladha, si makakawkau saladha papacai liniane, pakela kavai Gathe si taelelebane cekele ka Ikerungu. Tara kadalranane kavai Saraime, pakeela ka Gathe si Ikerungu, ku wapacai si madula ki swa Pelisitine ngisarade ubulane.

⁵³ Ku swa Iseraylri sa siwlringa twalai ki tasaladhane lini ki swa Pelisitine, la malra ravase ki takwapingane ki swa Pelisitine.

⁵⁴ Ku Davidi la iluku ku awlru ki Gulriathe mwa ka Yerusalrime, la suru ku lawbubulu ki Gulriathe pikai ki balrawbauini.

Ku Saule wadawlu ki Davidi

⁵⁵ Ku Saule wadrele ki Davidi sa kikaruburu ki Gulriathe, la kivaga kwini ki kiacapili ki kwapingi ka Abinere, “Abinere, lalake ki aneane kwini langukathabarane?” La tubalre ku Abinere, “Talialalai, kainaku wathingale.”

⁵⁶ Ku Saule la kawriva, “Lu mwa kipapathingale kavai lasu luka lalake ki aneane!”

⁵⁷ Sa papacainga ki Gulriathe ku Davidi la siwlringa mutakwapingane, ku Abinere la iluku iniane kidrele ki Saule, ku Davidi la malrana ku awlru ki Gulriathe.

⁵⁸ Ku Saule la kivaga iniane, “Langukathabarane, lalakesu ki aneane?” Ku Davidi la tubalre, “Lalakaku ki sasiakawlusu ka Yesi ka swa Bithelrihime.”