1 Samuile 16 - Ngudradreadrekadhane Ka Sisiu 魯凱語聖經

Kiapadelreme pacegecege atalialalai ku Davidi

¹ Ku Tamatama kawariva ki Samuile, “Lri tarathainuanasu ngwalai ki Saule tubitubi? Wacilringa naku iniane, kai paatalialalainga iniane ki swa Iseraylri. Lu iluka ku lawlau ki ulrive mwa ka Bithelrihime, mwa kwidra ki sia Yesi, asi lwiyane wapilringa naku ku tangea ki lalakeini paatalialalai.”

² Ku Samuile la kivaga, “Lri tumanaku si maka mwa kavai? Lwiyasi la thingale ku Saule, lri tara papacai nakwane!” Ku Tamatama kawariva, “Lu iluka ku lrulai ka lwange, lri mwaku kavai patarumara ki Tamatama la iya.

³ Kusu la dawla ki Yesi kipaelre ki apatarumarane; kikwini kwidra, lri pelaelangaku pia kwini iya muswane. Kwidra matikaili pelaelali muswane kudra umawmase, lri padelremesu si pacegecege iniane tutalialalai.”

⁴ Ku Samuile paluludu ku vaga ki Tamatama si pangimia. La katwase mwa ka Bithelrihime, ku lamarudrange ki cekele la mukuludru kela kikawriva iniane, la kawriva, “Kai kelasu mailukusu ku sulivatane?”

⁵ La tubalre ku Samuile, “Wailukaku ku sulivatane. Wakelaku patarumara ki Tamatama. Kunumi la ngibabula, ala kela tupapalra nakwane.” Ku Samuile la mialri ngibabula iya ki Yesi si lalakeini, dawlu liniane kipaelre ki apatarumarane.

⁶ Sa kela kwini lalasu, ku Samuile la drele ki lalake ki Yesi ka Ilriabe, la kidremedreme iya kai, “Kikai acegecege icucubungu ki Tamatama ka umawmase lri tara ka amani ku pilrini.”

⁷ Ai ku Tamatama kawariva ki Samuile, “Madha drele ki tali latadre ka ngiacaeme ku tacebeane kathariri. Kainaku wapilri iniane, asi lwiyane lu drelaku ki umawmase kainaku ngiamia ki umawmase ku tadrelane; kai umawmase wadrele palatadre, wadrelaku pakai ki takidremedremane.”

⁸ Ku Yesi la dawlu ki lalakeini ka Abinadabe ngucucubungu ki Samuile. Ai ku Samuile la kawriva, “Ini, ku Tamatama kai wapilri iniane.”

⁹ Ku Yesi la dawlu ki Sama kela mucucubungu; ku Samuile la kawriva, “Ini, ku Tamatama mialri kai pilri iniane.”

¹⁰ La pia kikai, ku Yesi pwacucubungunga ki Samuile kwini ki tapitu ka lalalakeini. Ku Samuile la kawriva iniane, “Ini, ku Tamatama kai wapilri ki naneanenga liniane.”

¹¹ Ku Samuile la kivaga ki Yesi, “Yakaiyana ku drumane ku lalakesu ku sawvalai?” Ku Yesi la kawriva, “Yakaiyana ku agiaginga; mwalatadre pagwagu ki kiu.” Ku Samuile la kawriva, “Lu dawla iniane kela kai. Kwini lasu lu kai kela, kaita lri patarumara la iya.”

¹² Ku Yesi la sikawlu ki umawmase dawlu iniane. Kwini lasu ngiacaeme kathariri ka langukathabarane, madirele ku cimini, ledra si alrivilrivi ku macaini. Ku Tamatama la kawriva ki Samuile, “Amani kai lasu, padelrema si cegecege iniane!”

¹³ Ku Samuile la malra ku lawlau ki ulrive, icucubungu ki latakaini padelreme cegecege ki Davidi. Ku Ri ki Tamatama la makakai ikai tapalra ki Davidi. Twalainga kwini ki vai tapalra iniane. Ku Samuile la siwlri mwa ka Rama.

Ku Davidi yakai ki daane ki talialalai ka Saule

¹⁴ Ku Ri ki Tamatama kiadaili ki Saule; ku Tamatama la pakela ki aidridringane pakwalri iniane.

¹⁵ Ku sasiakawluini la kawriva iniane, “Wathingalaku ku Twaumase pakela ki aidridringane pakwalri muswane.

¹⁶ Lakamani kwidra ala drekasa, la nai mwa silape ku tangea ku malrigili patungutungu kela kai. Lwiyasi la kela muswane ku aidridringane, kwini umawmase sana patungutungu, lri mudringaisu.”

¹⁷ Ku Saule la drekase liniane, “Lu pasikaiyaili silape kudra tangea ku tarapatungutungu ku umawmase!”

¹⁸ Yakai ku tangea ku sasiakawlu ki Saule la kawriva, “Ikai ka Bithelrihime yakai ku lalake ki Yesi; kwini lasu malrigili turamuru patungutungu. Kwini lasu magarange kalrigili kikaruburu, ngiaesadhane ku tacebeaneini, la kalrigili kawriva; ku Tamatama la tapalra iniane.”

¹⁹ Ku Saule la sikawlu ki sasiakawluini mwa ki Yesi, si iya kai, “Lu dawla kwini ki tarapagwagu ki kiu ka lalake ka Davidi ani kela kai nakwane.”

²⁰ Ku Yesi la sikawlu ki Davidi, mailuku ku akuvaeva ki tabavane ka lrangici ku bava, vaeva ka lrulai ka kiu, si vaeva ka siamece pasuete ku pange ka ruba mwa kidrele ki Saule.

²¹ Ku Davidi la mwa ki Saule, marasikaikai iniane. Ku Saule la kadalame ki Davidi, la pilri iniane kamani ku taraililuku ku sakikaruburuburane ki Saule.

²² Ku Saule la sikawlu ku umawmase pakela ku vaga mwa ki Yesi, “Madalamaku turamuru ki Davidi, ani ikaainga kai si marasikaikai nakwane!”

²³ Twalai kikwini, sana pakela ku Twaumase ki aidridringane mwa ki Saule, ku Davidi la malra ku patungutungu si patungutungutungu, ku aidridringane la makakai kidaili ki Saule, ku Saule la kirimu kathariri kasasa.