1 Samuile 15 - Ngudradreadrekadhane Ka Sisiu 魯凱語聖經

Makakaruburu ki swa Amaleke

¹ Ku Samuile kawariva ki Saule, “Ku Tamatama siakawlu nakwane padelreme muswane, cegecege muswane tutalialalai ki swa Iseraylri. Lakamani, kusu kilalra ku vaga ki Tamatama.

² Ku Tamatama ka abebeelengenga ki sanaka kwapingi lri pathavungu ki swa Amaleke, asi lwiyane ku swa Iseraylri sa twalai Izipiti mulatadre, kwini cucungulane lini nakiaecebe numiane.

³ Kusu mwa kikaruburu ki swa Amaleke, amudu patuelre sanaka manemane lini, madha pasusuru ku navaevanga; malra papacai amudu ki sawvalai lini, ki ababai, lavavalake, daini, lalwange, lakiu, lrakeda si ruba.”

⁴ Ku Saule la ikai Teleme sarubu si drele ki kwapingi: Ku twalai Iseraylri ta 200,000, ku twalai Yuda takudrai.

⁵ Kwini lasu la sangiluku ki kwapingini mwa ka cekele Amaleke, ikai valrwalru lepenge, si ukalavalava.

⁶ Ku Saule la sikawlu ki umawmase pakipapawlringau ki swa Keni, “Kunumi katwasa ki swa Amaleke la mwa ki talidrumane, amani lu pacepaku papacai numiane. Asi lwiyane kudra ku swa Iseraylri sa twalai Izipiti, ku cucungulane numi nakialibake marasikai liniane.” Ku swa Kenise la katwase kwini.

⁷ Ku Saule la pamalebenga ki swa Amaleke, twalai Havila padaruru kavai tali talrawane Izipiti ka Sure kikaruburu,

⁸ si papanianiake pwalra ki Agage ka talialalai ki Amaleke, papacai amudu sanaka umawmase lini.

⁹ Ai ku Saule si kwapingini la pasuru ki niake ki Agage, la mialri kai papacai kwini ki mathaithariringa ka lakiu, sawvalai ka lwange, lalrulai ka lwange si lakiu, la pasuru kudra drumane ku lamanemane. Kwini lalasu wamudunga kwidra kaika sarakaiyanenga si kaika tinukucingalrane ka lawbubulu.

Ku Tamatama malrase si cilri ki Saule tutalialalai

¹⁰ Ku Tamatama la kawriva ki Samuile,

¹¹ “Masamadraku ku tapaatalialaladhaneli ki Saule; kai lasu wacilringa nakwane, si baebalre ki padradrekaseli.” Ku Samuile la kai kiragai, wataleare kitubi ki Tamatama.

¹² Sakakaiyane ki mialrealre, ku Samuile la mwa silape ki Saule. Kwini lasu kialalra ku Saule ka wamwa ka Karemile, ikai kavai ngipapasikai cegecege ku taluvale ku sadrengedrenge ka lrenege ka sangulringalringavane, la katwase papia ka Gilegale.

¹³ Ku Samuile wamwa drele ki Saule, ku Saule la pasudalru ku vagaini, “Samuile, ku Tamatama anisubulrubulru muswane! Paluludaku ku drekaseini.”

¹⁴ Ku Samuile la iya kai, “Unu? Anau kilalrana kwi marariariau kwi la lwange si kiu?”

¹⁵ Ku Saule la tubalre, “Kikai yai malra ki lakwapingili ravase patwalai ki swa Amaleke. Kwini lalasu pasuru ku mathaithariringa ku lwange si kiu, pakai ku apatarumarane ki Tamatama ka Twaumasesu. Ala kudra drumane papacainga demedeme.”

¹⁶ Ku Samuile la kawriva, “Icelreba! Lri pelaelaku ku takawrivane nakwane ki Tamatama kumaungu.” Ku Saule, “Kawriva la iya!”

¹⁷ Ku Samuile la kawriva, “Adravane ka kaisu ngiatatukucingalre, ai amanisu kudra tarasangililuku ki lazuku ki swa Iseraylri. Ku Tamatama wapilri muswane tutalialalai ki swa Iseraylri;

¹⁸ ku Tamatama siakawlu muswane katwase, si drekase muswane amudu kudra ki ngialisiane ka swa Amaleke, la papacai liniane demedeme.

¹⁹ Asu kai kilalra si pasalaladha? Asu kisaswararau malra kwini niravasane, si pia kikai kaika kadalame ki Tamatama ka awngane?”

²⁰ Ku Saule la kawriva, “Pasalaladhaku ku vaga ki Tamatama, si singikai ku tacunaneini kikaruburu, si ravase ki talialalai ki swa Amaleke ka Agage, si nguelre papacai ki swa Amaleke.

²¹ Kathane kikai lakwapingili kai papacai kwini ravase lini ku lalwange si kiu; kwini lalasu wailuku kwini lalwange si kiu mwa ka Gilegale, tusapatarumarane ki Tamatama ka Twaumasesu.”

²² Ku Samuile la kawriva: Manemane ku kadalame ki Tamatama? Apasalaladhane iniane? Apatarumarane ku Lama ka lrisi si sapatarumarane ka waudriwdripi? Ku pasalaladha mathaithariri ki sapatarumarane; ku kialalra ku drekase makikiraragai iniane lu patarumarane ku mathaithariringa ka kiu.

²³ Kudra wabaebalre iniane si twalrisi ivigi mararamau ka malisi; ku madrekase si wasukubu ki samiamiange maramaramau ikai ku pasalrivane. Ngwalai ku tabalreanesu cilri ku drekase ki Tamatama, ku Tamatama malrase si cilri muswane, si kai paatalialalainga muswane.

²⁴ Ku Saule la kawriva, “Unu, pasalrivaku; kainaku kialalra pasalaladha ku drekase ki Tamatama si tapelaelanesu. Mwakuludraku ki mapapangale, lakamani ku singikaili ku pia kwini iya lini nakwane.

²⁵ Kaiasasane, kiatubiaku ku apacepanesu kikai pasalrivaneli, tupalra nakwane siwlri mwa ka Gilegale, lanau pudriadringai sukubu ki Tamatama.”

²⁶ Ku Samuile la kawriva, “Kainaku lri tupapalra muswane siwlri. Wabaebalresu ku drekase ki Tamatama; la cilringa muswane, si kai paatalialalainga muswane ki swa Iseraylri.”

²⁷ Ku Samuile la ngibangulu nau katwase iya, ku Saule la bilibili ki sapakabelengane ki laimaini, malra kwini laimai papurici.

²⁸ Ku Samuile la kawriva iniane, “Kaikameane ku Tamatama wamalranga kikai rathudusu patuelre kai kuni ki swa Iseraylri ribici muswane, si baai kwidra ki tangea ka mathaithariri muswane.

²⁹ Ku sapupukuanenga ka Twaumase ki swa Iseraylri kai lri draedrangelre avavaga, la mialri kai lri tupela ku kidremedremeini; kai ngiamia ki umawmase, kai lri ela ku kidremedremeini.”

³⁰ Ku Saule la kawriva, “Pasalrivaku. Ai, ala baadhanaili ku lringau ikai cucubungu ki lamarudrange ki mapapangale si swa Iseraylri makanaelre, la tupapalraili siwlri, la nau sukubu ki Tamatama ka Twaumasesu.”

³¹ Ku Samuile ala katwase tupalra iniane siwlri mwa ka Gilegale; ku Saule la sukubu ki Tamatama.

³² Ku Samuile la drekase, “Malra ki talialalai ki Yacia iluku pwa kai nakwane!” Ku Agage la kathathiburu manugeregere kela mucucubungu ki Samuile, la kidredredreme, “Ala matiaukuludru kai apacadhane!”

³³ Ku Samuile la kawriva, “Kwini lrabusu napapacai ki tapaangale ku lalalake ki latiatina, kaiasasane ku tinasu lri kawlrasenga ki lalakeini.” Ku Samuile la ikai Gilegale ki tapatarumaramarane papacai ki Agage.

³⁴ Sakabilrilinga, ku Samuile la siwlri mwa Rama; ku talialalai ka Saule la mialri siwlri mutavanane mu Gibia.

³⁵ Twalainga kwini pakela ku tapacadhaneini, ku Samuile kai wadrelenga ki Saule, ai kwini lasu ngwalai ki Saule tubi turamuru. Ku Tamatama masamadre ku tacegecegane ki Saule tutalialalai ki swa Iseraylri.