1 Samuile 14 - Ngudradreadrekadhane Ka Sisiu 魯凱語聖經

Garangane ki Yunathange

¹ Yakai saka minakavalane, ku Yunathange la kawriva ki tangea ki tarasiamece ku sakikaruburaneini ka taradrangalru iniane ka yacengecenge, “Abwala tamwadringi ki balrawbau ki takwapingane ki swa Pelisitine!” Ai kwini lasu kai peaelaela ki tamaini ka Saule.

² Kikwini kwidra, ku Saule yakai kavai tali latadre ka Gibia, ikai ka Migerune kwini ki nginanavate ka angatu tutakwapingane. Kudra twapapalra iniane lri ikai kau ta 600.

³ (Kwini sialaimai ku Ipude ka barakalai ka Ahiya; kwini lasu lalake ki Ahitube ka agi ki Ikabude. Ku Ahitube lalake ki Pinehase, ka agane ki abarakalai ki Tamatama ka Ilri ikai Selu.) Kadrwa ku umawmase ku wathingale ku Yunathange ka matwasenga ki takwapingane.

⁴ Ku Yunathange nau mwadringi ki balrawbau ki swa Pelisitine lu iya lri tara ngukai ka salralriwgu Mikimase. Maecebe kwini ki salralriwgu yakai ku drusa ku mia ki valisi ki ridraidri ku maadrau ka lrenege, ku vaeva sia Buze, ku taluvalenga la si Sene;

⁵ kwini vaeva ka salralriwgu wacubungu tali dradha ka Mikemase, ku taluvale ka salralriwgu la cubungu tali lrawdru ka Geba.

⁶ Ku Yunathange la kawriva kwini ki langukathabarane ka tarapalakebe iniane, “Ila, tamwadringi kavai ki kai kiagelregelre tulrisi ka umawmase! Ku Tamatama alau lri paralubu mitane. Lwiyasi paralubu mitane, anika aneaneanenga kai lri maka telenge mitane. Adravane takalra tabekele ku umawmaseta, ku Twaumase lri tara pasabelenge mitane.”

⁷ Kwini tarapalakebe la kawriva, “Adravane tumanaiya ku takidremedremanesu, lri tupapalraku.”

⁸ Ku Yunathange la kawriva, “Mathariri! Ila tamwanga, taraanau ku adrelane ki swa Pelisitine mitane.

⁹ Kwini lalasu lwiyasi ani ikai kai mukalava liniane iya mitane, lri ikaaita kai mukalava.

¹⁰ Kwini lalasu lwiyasi ani mwa liniane kavai iya mitane, takatwase mwa; kikwini ala amani ku sapatuthingalane ki Tamatama lri paakacinga mitane.”

¹¹ Kwini lalasu la raanau ani drele iya liniane ki swa Pelisitine. Ku swa Pelisitine la kawriva, “Drela! Yakai ka swa Hiburu ka twalai ki takilepengane lini ka barungulu mutaluvaivainga!”

¹² Kwini lalasu la tawtau kawriva ki Yunathange si tarapalakebe iniane, “Abwala mudradha, yakai kai apelaelane nai numiane!” Ku Yunathange la kawriva kwini ki tarapalakebe iniane, “Tupapalraili! Ku Tamatama wamalranga liniane si baai ki swa Iseraylri.”

¹³ Ku Yunathange la kapa tabelenge ki salralriwgu; ku tarapalakebe iniane la tupapalra iniane. Ku Yunathange la pamalebe ki swa Pelisitine; ku tarapalakebe la papacai kwini ki lalasu.

¹⁴ Ikai kai ki nikingivalane kikaruburu, ku Yunathange si tarapalakebe iniane yakai kwini ki naika taingeane ki lu pausupatane ki ikubu ka kadaengane papacai ku tamapusale pulrabale ku umawmase.

¹⁵ Kwini yakai laumawma ka la swa Pelisitine la makitu mukuludru mia kwidra; kudra tarakadrekadrenge si tarakikaruburu ku lakwapingi la mialri pathimithiminga, ku kadaengane la tedretedrese, matiukukuludru turamuru ku tangimiamiane!

Kiapamalebe ku swa Pelisitine

¹⁶ Ku tarathamadalane ka kwapingi ki Saule yakai ka Gibiathe ka tali Biniyamingi drele ki swa Pelisitine la kathathiburu amamanga katwase mubere.

¹⁷ Ku Saule la kawriva liniane, “Asipa ki kwapingi, luka aneane ku kai yakai!” Kwini lalasu sa asipi, la drele laka kadrwa ku Yunathange si tarapalakebe iniane.

¹⁸ Ku Saule la kawriva ki barakalai ka Ahiya, “Malra kwini Ipude!” (Kwini ki vai, ku Ahiya la tapai ku Ipude sacucubungu ki swa Iseraylri).

¹⁹ Sa icengecenge kawrivariva ki barakalai ku Saule, kwini taikaiyane ki swa Pelisitine ka balrawbau la aru kalrithavulu; ku Saule la kawriva ki barakalai, “Kai nai maka sara kiavaga ki Tamatama!”

²⁰ Ku Saule la sangiluku ki kwapingini mwa takikaruburane, kikaruburu ki swa Pelisitine; ku swa Pelisitine la kalrithavulunga, si mapapacapacai.

²¹ Kudra la satalu ki swa Pelisitine ku swa Hiburu, ka yakaikai ki takwapingane lini kipuawawngane liniane ka swa Hiburu, kaiasasane ngiabalrenga kipaelre ki kwapingi ki Saule si Yunathange.

²² Kudra kialepenge ikai tali Iparaime ka swa Iseraylri sa kilalra ki swa Pelisitine ka makitwa muberenga, la mialri kainganai mutaluvaivai si saladha liniane,

²³ padaruru kavai Bithavenge. Kwini ki vai, ku Tamatama palribulu ki swa Iseraylri.

Sangilribatenga ku tamakaruruburane

²⁴ Kikwini kwidra, ku swa Iseraylri la makitu kasilrau kidulru, asi lwiyane ku Saule nakiaketekete, si padrekadrekase iya kai, “Kaikameane, sanaka aneanenga ku wakane ku aga sa kainaku bilriana ki badha, lri kamani ku kiapusu.” Lakamani ku laumawmase makavale kai kane ku lamanemane.

²⁵ Kwini lalasu la kela kwidra ki angatungatu, la drele ki kadaengane ka makaalra ku valu.

²⁶ Makalra ku valu kwini ki angatungatu, ai kadrwa ku umawmase ku nau kane amia, asi lwiyane makitwa mukuludru ki sapuswane ki Saule.

²⁷ Ai ku Yunathange kai kialalra ala ka waruthuku ku tamaini arakai ku sapuswane ku kaika akaneane ki laumawmase ku namanemanenga, lakamani ku malraini ku ukudru, si drukudruku ki tavalwane, la diputhu kwini valu si kane. Kwini lasu la makakaai ngulralringavane.

²⁸ La ikai ku umawmase ku peaelaela iniane, “Mwabaisinga nai kidulrunga nai, ai ka tamasu waruthuku naiane, ‘Kaikameane sanaka aneanenga ku wakane ku lamanemane, lrika amani ku kiapusu.’ ”

²⁹ Ku Yunathange amia kai, “Ku ama padrekadrekase kikai kaika mamamwa ki kakwakudhane ki umawmase! Drela, wakaneaku kai valu, la ngulralringavanengaku!

³⁰ Lu maka pamalebengata ki badha, la kaneta kudra malrata ku akaneane, lri tara aru sapukwaneta, si papacai ku takaakalra ku swa Pelisitine!”

³¹ Kwini ki vai, ku swa Iseraylri pamalebe ki swa Pelisitine, twalai ka Mikemase kikaruburu daruru ka Aiyalungu. Kikai kwidra, ku swa Iseraylri la makitu mubaisi kamamelre;

³² kwini lalasu la kisaswarau patwalai ki ravase lini malra ku kiu, lwange, si lrulai ka lwange, ikai kwini culu, kane kwini eraeradhane ka beate.

³³ Yakai ku peaelaela ki Saule iya kai, “Drela ka laumawmase wakane ka eraeradhane ka beate, pasaalriwnga ki Tamatama!” Ku Saule la tawtau, “Kunumi ka lawabaebalre! Kirimwa balrutai ku maadrau ku lrenege pwa kai!”

³⁴ Kwini lasu la dreekasenga iya kai, “Lu mwa ki mapapangale si pelaela liniane, malra kwini ki lalwange si lakiu lini sisau pwa kai, si ikai kai culu, ikaikai kane; ai madha kanekane ku eraeradhane ka beate, si pasalriu ki Tamatama.” Lakamani kikai, kwini sakamaungu, ku mapapangale mailuku kwini lalwange lini sisau mwa kai, si ikai kwini culu.

³⁵ Ku Saule la pasikai ki Tamatama cegecege ku tapatarumaramarane; kikai amani ku aswalaalanga ku cegecegeini ku tapatarumaramarane.

³⁶ Ku Saule la kawriva ki lakiacapilini, “Lu maungu ila takikaruburu ki swa Pelisitine, si ravase ka lamanemane lini, pakeela ki maliare, papacai liniane demedeme!” Kwini lalasu la tubalre, “Sanaka mathariri iyasu, pangimia pia!” Ai ku barakalai la kawriva, “Alata paswalana kivaga ki Twaumase!”

³⁷ Lakamani kwidra, ku Saule la kivaga ki Twaumase, “Lri mwa nai kikaruburu ki swa Pelisitine? Lri malrasu liniane pwa ki alrima ki swa Iseraylri?” Ai kwini sakamaungu ku Twaumase la kai tubalre.

³⁸ Ku Saule la kawriva kwini ki lakiacapili ki mapapangale, “Bwala mwaili kikai, la drele lukamanemane ku pasalriuta kaikameane.

³⁹ Papiaku ki palralrawthu ka Tamatama ka tarapalribulu ka Twaumase ki swa Iseraylri si kiketekete: Kudra pasalriu lri tara kipathavungu si kipapacai; adravane ka lalakeli ka Yunathange thadaalrane kai lri kipawkalrivili.” Ai kadrwa ku natangeanga ku kawariva.

⁴⁰ Ku Saule la papia ki swa Iseraylri iya kai, “Kunumi acegecega sakai kavai; kai Yunathange ani sakai nakwane acegecege.” Kwini lalasu la kawriva, “Sanaka mathariri iyasu, pangimia pia!”

⁴¹ Ku Saule la papia ki Tamatama ka Twaumase ki swa Iseraylri kawriva, “Tamatama, kaikameane asu kai tubalrebalre nakwane? Tamatama ka Twaumase ki swa Iseraylri, kiatubiaku pangukaiya kikai ki saniange ka lrenege tubalre nakwane! Lwiyasi ku pasalrivane la ikai ki Yunathange ku yakai nakwane, arakaiya ku Urime tubalre nakwane; lwiyasi ku pasalrivane laka yakai ki kawkawlusu ka swa Iseraylri, arakaiya ku Thumime tubalre.” Sa kuzibiki, ku nisudrane laka Saule si Yunathange; ku mapapangale laka kadrwa.

⁴² Ku Saule la kawriva, “Amani kai lalakeli ka Yunathange? Amaniaku?” Sa sudrunga laka Yunathange.

⁴³ Ku Saule la kivaga iniane, “Watumanesu?” Ku Yunathange la kawriva, “Wakaneaku pingitiki ku valu. Yakaiyaku kikai, palraingaku pacai.”

⁴⁴ Ku Saule la kawriva iniane, “Lwiyasi la kainaku pathavungu papacai muswane, ku Twaumase ani papacai nakwane!”

⁴⁵ Ai ku mapapangale la kawriva ki Saule, “Kai Yunathange pasiakai ki swa Iseraylri maadrau turamuru ku tapamalebeane, laibekace kipathavungu kipapacai? Ini! Lri papia nai ki palralrawthu panianiake ka Tamatama kiketekete, adravane ka vaeva ka isiuini lri mialri kai lri kipakadula. Kai piaini kaikameane, satalu ki Twaumase.” La ngimia kai, ku mapapangale la palribulu ki Yunathange, la kai kipapacainga.

⁴⁶ Ku Saule la kai saladhanga ki swa Pelisitine, kwi lalasu la siwlri mwa ki taikaiyane lini.

Takikaruburane si lawacekecekele ki Saule

⁴⁷ Ku Saule sa pakapapedrengenga ku taetalane ki talialalai ki swa Iseraylri, wamwa kidruanga kikaruburu ki badha: Kwini lasu kiakaruburu ki swa Muabe, swa Amune, swa Idume, si latalialalai ki swa Zuba, si swa Pelisitine. Adravane papia inu kikaruburu pamalebe.

⁴⁸ Ku Saule magarange turamuru lu kikaruburu, adravane ku swa Amaleke pamalebe. Kwini lasu palribulu ki swa Iseraylri kidaili ki lri kela sanaka amatikurwane.

⁴⁹ Ku lalake ki Saule amani kai Yunathange, Isevi, Malekisua. Ku takatakanga ku ababai sia Mirabe, ku agiagi sia Mikale.

⁵⁰ Ku taelrelreini sia Ahinuame, ka lalake ki Ahimaze. Kudra tamatama ki kwapingini amani ku Abinere ka lalake ki agi ki tamaini ka Nere.

⁵¹ Ku tama ki Saule ka Kise si tama ki Nere ka Abinere tara lalake ki Abiele.

⁵² Ku tapanianiakaneini ki Saule tamakakaruburuburane ki swa Pelisitine, lakamani kwidra kwini lasu sana drele ikai ku magarange sapukwane ku umawmase, la dawlu iniane paakwapingi, si ikai ki takwapingane akwapiapingi.