1 Samuile 13 - Ngudradreadrekadhane Ka Sisiu 魯凱語聖經

Kiakaruburu ki swa Pelisitine

¹ Saka taramatulrulu ku caili ki Saule atalialalai ki swa Iseraylri taradrusa ka caili.

² Ku Saule la patwalai ki swa Iseraylri pilri ku ta 3,000 ku umawmase, la ngipapikai ku ta 2,000 ka umawmase, ikai Mikemase si tali lregelrege Bithele, la sikawlu ku takudrulu mwa ka talikai Gibiathe ki zuku ki Biniyamingi, lakamani ku lalakeini ka Yunathange ka wasangiluku, ku drumane ku umawmase la pakatwase paubalriu.

³ Ku Yunathange la pikai ka Geba papacai ki tarapadrekadrekase ki kwapingi ki swa Pelisitine; la makitu kilalra ku swa Pelisitine kikai tangimiane. Ku Saule la pakatwase kudra nipawkalrivilane kisikawlu mwa palraelre ki kuni, ngirapa sarubu ki swa Hiburu kainganai kikaruburu.

⁴ Ku swa Iseraylri makanaelre sakilalra ku tapapacadhane ki tarapadrekadrekase ki kwapingi ki swa Pelisitine, la kilalra ki swa Pelisitine ka malisilisi liniane, la makitu pukawnu ku tadawlane ki Saule, la isarubu ikai Gilegale.

⁵ Ku swa Pelisitine la isarubu kela kikaruburu ki swa Iseraylri. Kwini lalasu yakai ku 30,000 ku palridingi, 6,000 ku tarangurigi, si kai asipane ka kwapingi, ku pangalane mia ki enai babiabila ki laveke. Kwini lalasu la malra kwini ki lakwapingi pataluela mwa ka Mikemase kwini tali talrawane ka Bithavenge, ikai kwini tutakwapingane.

⁶ Ku swa Iseraylri wathingale ka wakelanga ku amatikurwane si la padethenga liniane ku badha, yakai ku laumawmase ku matwase kilepenge mwa ki barungulu lregelrege, mwadringi ki angatungatu, mwa lilibiane ki alrisapesape, wamwa adringi ki dralremedreme si valrulrange;

⁷ yakai ku umawmase ku talwabalre kadravane Yuredange, mubere papia talikai ka Gade si Gileade. Ku Saule yakaaiyana Gilegale, kudra la taratupapalra iniane ku laumawmase la mia kwidra makitu mukuludru manugeregere.

⁸ Kwini lasu singiakai ku tapelaelane ki Samuile, ikai Gilegale makapitulu mukalava, ai ku Samuile laka kadruana. Ku laumawmase la katwatwasenga ki Saule,

⁹ lakamani ku kawriva ki Saule liniane, “Malra kwini sarakaiyane ka waudriwdripi tu Lama ka lrisi si Sulivatane ka lrisi iluku pwakai nakwane!” Kwini lasu la patarumara ku Lama ka lrisi.

¹⁰ Kwini lasu samaka patarumara, ku Samuile wakela. Ku Saule la mulatadre kidredresenge iniane,

¹¹ ai ku Samuile maelaela iniane, “Manemane kai piasu?” Ku Saule la kawriva, “Ku laumawmase matwase nakwane, la kaisu pangimia ku tamaiyaneta ku vai kela kai, ka swa Pelisitine yasarubunga ikai ka Mikemase.

¹² La kidremedremaku, kikai lri kikaruburunga nakwane ikai ka Gilegale kai swa Pelisitine, laka kadruana ku tatarumarane nai ku akipalribulane ki Tamatama, lakamani ku ngikakamaningali patarumara ku Lama ka lrisi.”

¹³ La kawriva ku Samuile, “Makulrungu turamuru kai tapianesu! Kaisu paluludu ku drekase ki Tamatama ka Twaumasesu. Lwiyasi la paluludusu, lri parathudu muswane si lamwabaibalrithi muswane ki swa Iseraylri ka palralrawthunga.

¹⁴ Ai kikai kai takatalialaladhanesu kai lri kawlai, asi lwiyane kaisu kialalra iniane. Ku Tamatama lri silape ku mamamwa ki kidremedremeini ku umawmase, si pakamani ku warathudu ki kawkawluini.”

¹⁵ Ku Samuile la katwase Gilegale, pacungulu ku kadalrananeini. Ku drumane ku mapapangale la tupapalra ki Saule mwa madradresenge ki kwapingini. Kwini lalasu twalai Gilegale ka tali Biniyamingi ka Gibiathe. Ku Saule la asipi ku kwapingini, la ikai ku ta 600.

¹⁶ Ku Saule si lalakeini ka Yunathange, si twapapalra iniane ku laumawmase la ikai tali Biniyamingi ka Geba tutakwapingane; ku swa Pelisitine la ikai Mikemase tutakwapingane.

¹⁷ Ku kwapingi ki swa Pelisitine la twalai kwini ki takwapingane mautulru katwase kikaruburu: Ku taingea papia tali Suale ka Upera,

¹⁸ ku taingea papia ka Bithe Hurunu, ku taingeanenga la papia kwini paswalebe madu ka vaalru Zibuime si tali lregelrege ka calragulragu.

¹⁹ Kikwini kwidra, kadrwa ku taratwadreme kikai ki swa Iseraylri, asi lwiyane kai mwabangalre ku swa Pelisitine padarepe ki swa Hiburu ku lalrabu si idiri.

²⁰ (Ku swa Iseraylri lri tara silape ki swa Pelisitine padarepe ku lrabu ku idiri, pavilringi, tatukunu, kumugu, takawkau.

²¹ Lu twadreme ku kumugu si pudriadringai ku cecenekane ka ukudru wamalra ku vaeva ka lriwlu ka tangupia; lu patwadreme ku pavilringi si tatukunu la malra ku drusa ku lriwlu ka tangupia.)

²² Lakamani kikai, lu makaruruburu, kathane ku Saule si lalakeini ka Yunathange ka sialrabu siaidiri, ku kwapingi ki swa Iseraylri kadrwa ku natangea ku kwapingi ku yakai ku lrabu si idiri.

²³ Ku swa Pelisitine la pakatwase ku taingeane ku kwapingi mwa ka Mikemase salralriwgu kadrenge.