1 Samuile 12 - Ngudradreadrekadhane Ka Sisiu 魯凱語聖經

Sakipusawane ka vaga ki Samuile

¹ Ku Samuile kawariva ki swa Iseraylri, “Pangiamianga naku ku kitubi numi pacegecege ku talialalai rathudu numiane.

² Kaiasasane, yakainga ku talialalai kulri sangiluku numiane. Kunaku yai, tarudrawdrangenga naku, kai lalalakeli makitwa tapalra numiane. Twaladhaku ki vavalake pakeelanga kikai, wasangililukaku numiane.

³ Kaiasasane, yakaiyaku kikai; lwiyasi la ikai ku tapasalrivaneli, lri dulru numi ikai cucubungu ki Tamatama si pilrini paatalialalai kukusu ku pasalrivaneli. Waribicingaku ku lwange ki palrapalra ku ruba? Ku walrilrigilingaku si tavuvulrucu ki aneane? Wamalrangaku ku pavangalre? Lwiyasi la ikai ku ngimiyaiya kikai ku tapianeli, lri tara sawlriaku cugu.”

⁴ Ku mapapangale la tubalre, “Kadrwa ku talrilrigilanesu tavuvulrucusu naiane; kadrwa ku malrasu ku manemane ki naneanenga.”

⁵ Ku Samuile kawariva, “Kaikameane, ku Tamatama si pilrini paatalialalai amani kulri pelaela ku tangimianeli; wathingale numi ka mabulaku.” Ku mapapangale la kawriva, “Unu, Tamatama ku lri pelaela ku tangimiamianesu.”

⁶ Ku Samuile la pacungulu kawriva, “Kudra wapilri ki Musi si Arungu ka Tamatama nawailuku ki cucungulane numi mulatadre Izipiti.

⁷ Kaiasasane, kunumi acegecega! Lri icucubungaku ki Tamatama kukusu ku pasalrivane numi, pakipapawlringau numiane, ku Tamatama pakai ku apalribulane numiane si cucungulane numi la pangimianga ku palrealrebane ku matiasamali.

⁸ Ku tai Yakubu sa mwanga ka Izipiti, ku swa Izipiti la pakwalri tusinalreme liniane kwidra, ku cucungulane numi la kitubi ki Tamatama ku akipalribulane. Ku Tamatama la sikawlu ki Musi si Arungu sangiluku liniane katwase Izipiti, la malra liniane pasutelrai ikai kikai.

⁹ Ai kwini lalasu la kirimulringa karimuru ki Tamatama ka Twaumase lini. Lakamani kwidra, ku Tamatama pakela ki swa Pelisitine, talialalai ki swa Muabe, si mabelenge ki kwapingi ki cekele Hazure ka Sisera kikaruburu ki cucungulane numi, si pamalebe liniane.

¹⁰ Kwini lalasu la papia ki Tamatama kitubi ku akipalribulane, ‘Tamatama, pasalriu nai; asi lwiyane kiadaili nai muswane, si mwa sukubu ki Baale si Asetarete. Kiatubi nai muswane pakidaila naiane ki badha, lri tara kisikawlu nai muswane!’

¹¹ Ku Tamatama la sikawlu ki Gidiunge, Barake, si Yepeta, sakabilrilinga la sikawlu nakwane kela palribulu numiane pakidaili ki ngiathalringulu ka labadha, si pakasulivate ku tapanianianiakane numi.

¹² Ai sadrele numi ki talialalai ka Nahase ki swa Amune kela kikaruburu numiane, kiarimu numi kalrase ki Tamatama ka Twaumase numi atalialalai numiane, la kitubi numi nakwane iya kai, ‘Mwarikai nai ku talialalai kulri rathudu naiane.’

¹³ “Kaiasasane, kudra cegecege numi kudra talialalai yakai kai. Mwarikai numi ku tangea ku talialalai; ku Tamatama la baainga numiane.

¹⁴ Lwiyasi la musakene numi ki Tamatama ka Twaumase numi, si kisikawlu iniane, kilalra iniane, si paluludu ku padradrekaseini, kunumi si talialalai numi alaiyasi savaeva ku kidremedreme papia iniane, lri tara kasulivaliivate numi.

¹⁵ Ai, kunumi alaiyasi kai numi kilalra ki Tamatama, kai paluludu ku padradrekaseini, lri kiecebe numiane si talialalai numi.

¹⁶ Kaiasasane, kunumi acegecega! Lri drele numi ku maadrau ku apangimiane ki Tamatama.

¹⁷ Kaiasasane kaika kalacengelravane? Ai lri inulriaku, ku Tamatama lai lri padreredrere belenge pawdale. Lu drele numi kikai tangimiane lalri thingale numi, kudra tapapiane numi ki Tamatama kitubi cegecege ku talialalai ala ka madrau turamuru ku tapasalrivane numi, makabelengenga numi iniane.”

¹⁸ Ku Samuile la kitubi ki Tamatama, ivaivai, ku Tamatama la padreredrere belenge pawdale. Ku mapapangale la makitu mukuludru ki Tamatama si Samuile;

¹⁹ Kwini lalasu la kawriva ki Samuile, “Ala pasikaiya naiane inulri kitubi ki Tamatama ka Twaumasesu, la nai kai pacai. Kikai wathingalenga nai, kudra takitubiane nai cegecege ku talialalai ala ka maadrau turamuru ka pasalrivane.”

²⁰ Ku Samuile la kawriva, “Madha mukulukuludru! Adravane pia numi kikai ngialisiane turamuru kai kakudhane, ai madha kidaidaili ki Tamatama, kirimwalringa salikavaeva kisikawlu iniane.

²¹ Madha tupapapalra ki kaika Twaumase; kwini lalasu kai lri maka paralubu numiane, palribulu numiane, asi lwiyane kwini kaika patengane.

²² Ku Tamatama lri tara pangimiya kudra tapuvaganengaini, lutuumane kai lri cilri numiane, asi lwiyane kudra malrithethenga ku ani akawkawlu nakwane amia numiane,

²³ ai, kwaku, ku Tamatama madha reteretege ku inulrisu amia nakwane pasikai numiane, ala lu mia kikai kainaku lri pasalriu iniane. Lri bulrwaku numiane ngukakai kudra ki mathariri mwalecege ka kadalranane.

²⁴ Tara musakena ukuludru ki Tamatama, si pakaelre ku kidremedreme kisikawlu iniane, tara ngulringava kudra pasikaini numiane ku maadrau ku awngane.

²⁵ Lwiyasi la kai numi telrai pasalriu, kunumi si talialalai numi lri tara kamudu numi.”