1 Samuile 11 - Ngudradreadrekadhane Ka Sisiu 魯凱語聖經

Ku Saule pamalebe ki swa Amune

¹ Sangilribatenga ki taradramare, ku talialalai ki Nahase ka swa Amune la kikaruburu ki cekele Yabi ka Gileade. Ku swa Yabi kawariva ki Nahase, “Tamakaketekete, la nai marasikai numiane la iya.”

² Ku Nahase la kawriva, “Ani makaketekete mitane lwiya numi naiane yakai ku sivale ku apangimiane: Lri gativathaku kwini ki vanale ki maca numi, la arakai kai tusatusinalremeane ki swa Iseraylri.”

³ Kwini lamarudrange ki swa Yabi la kawriva, “Ala baadhana naiane ku amaka pitulane ku vai, la nai sikawlu ku wamwa ki swa tali Iseraylri. Lwiyasi laka kadrwa kulri paralubu naiane, nai kusangenga muswane.”

⁴ Ku sasiakawlu sa kela ki taikaiyane ki Saule ka Gibiathe, la malra pelaela kikai vaga, ku mapapangale la makitu kasalivalrau si tubitubi makanaelre.

⁵ Kikwini kwidra, ku Saule wakelakela twalai umawma iluku ki lwange, la kivaga, “Matumane? Kai laumawmase ani makitu tubitubi?” Kwini lalasu la malra kwini pakela ki swa Yabi ku vaga si pelaela ki Saule.

⁶ Sa kilalra ku Saule kikai vaga, la kirimu kikandu ki Ri ki Twaumase, si kagirimucu turamuru.

⁷ Kwini lasu la malra ku drusa ku lwange, la pwa teketeke pautatiki kwini lwange, la drekase ki sasiakawlu iluku baai palraelre ki swa Iseraylri, pakipapawlringau ki mapapangale, “Sanaka kai twapalranga ki Saule si Samuile mwa kikaruburu, kudra lwange lini lri kipangimia kikai ku takithiabane!” Ku swa Iseraylri makiwcu lu kalisi ku Tamatama, la kainganai makanaelre kadrwa ku mwakalrivili.

⁸ Ku Saule la sarubu liniane ikai Bizeke: Yakai ku ta 300,000 ku twalai ki swa Iseraylri kela, ta 30,000 ku twalai Yuda.

⁹ Kwini lalasu la kawriva kwini ki twalai Yabi ka kiasikawlu, “Lu pelaela ki swa Yabi, lwiya lu kaiyana mulringedele ku vai, kwini lalasu lri kiparalubu.” Ku yakai Yabi ka laumawmase sakilalra kikai vaga la kiraragai turamuru,

¹⁰ si iya kai ki Nahase, “Luiya lri kusange nai, ngisasingikaiyanga ku apangimianesu naiane.”

¹¹ Sakakaiyane ki mialrealre, ku Saule wamalra tu taitulruane ki kwapingini; sakaliare, kwini lalasu la katwase turedele mwa ki takwapingane ki badha, kikaruburu ki swa Amune, sa kela ki mwalringedele, papacainga ku takaalra ki swa Amune; kudra waudripiana ku kwapingi la sarau makanaelre, katwase mubere.

¹² Ku swa Iseraylri la kawriva ki Samuile, “Aneane ku kai lri maka atalialalai kai Saule mitane amia? Malra kwini ki laumawmase putaluvaivai, lri pwa nai papacai liniane!”

¹³ Ai ku Saule kawariva, “Kaikameane kaika apapacadhane ki umawmase, asi lwiyane kaikameane ku Tamatama palribulunga ki swa Iseraylri.”

¹⁴ Ku Samuile la kawriva liniane, “Ila tamwa Gilegale makanaelre, ikai kavai tupela pacegecege ki Saule tutalialalai.”

¹⁵ Kwini lalasu la makitu mwa ka Gilegale, si ikai cucubungu ki Tamatama pacegecege ki Saule atalialalai, si patarumara ku Sulivatane ka lrisi. Ku Saule si swa Iseraylri makanaelre taelre kirararagai kikai ki maadrau ka awngane.