1 Samuile 10 - Ngudradreadrekadhane Ka Sisiu 魯凱語聖經

¹ Ku Samuile la malra ku akuvaeva ku lawlau ka ulrive, si gugu pwa ki awlru ki Saule, si uma iniane, iya kai, “Ku Tamatama pwalawlau si pacegecege muswane ka amani ku tararathudu ki kawkawluini ka swa Iseraylri; lri marasikaisu ki kawkawluini, palribulu liniane kidaili sanaka baadha. Kikai lebe kai, amani ku sapatuthingalane ku tapacegecegane muswane ki Tamatama tutararathudu ki kawkawluini:

² Kaikameane lu katwasengasu nakwane, lri ikaisu ki tali Biniyamingi kavai Zeleza, adeethe ki takidralrekane ki Rakile kipadradresenge ku tadrusa ku umawmase. Kwini lalasu lri pelaela muswane, kudra asilapanesu kudra ruba kiakidringainga. Ku tamasu kai lri kidredremenga ki ruba, ai lri kidremedreme muswane, si arwakai kivavaga ki umawmase, ‘Ala lri tumane ku lalakeli?’

³ Lri ngukakaisu kwini katwase papucucubungu, kela kavai Tabure kwidra ki tharialupu ka angatu, lri kipadradresengesu ku tatulru ku umawmase; kwini lalasu lri mwa ka Bithele patarumara ki Twaumase. Ku tangea la iluku ku tulru ku lrulai ka kiu, ku tangea wailuku ku tulru ku pange, ku mwasakatulru la iluku ku akuvaeva ki tabavane ka lrangici.

⁴ Kwini lalasu lri kivaga muswane, si baai muswane ku drusa ku pange; la malra madu.

⁵ Ala lri katwasesu mwa ka Gibiathe, mwa ki lregelrege ki Twaumase; yakai kwini ku takwapingane ki swa Pelisitine. Ikai ki tamudaananesu ki cekele lalri kipadradresengesu ku twaredelane ku twalai lregelrege ki tapatarumarane ka layuginsia; kwini lalasu lri bangebange ku patungutungu, ngikulralru, iluku ku patungutungu si kapituane ka patungutungu, si dralradralrai kawkawkau.

⁶ Ku Ri ki Tamatama lalri kirimu arake muswane; lri taelresu liniane dralradralrai karalealeale, mia ki maelane ka umawmase.

⁷ Lu ngimianga kikai patuelre, lri singikaisu ku tasangilukane muswane ki Twaumase si pangimia.

⁸ Lrika aswalalasu nakwane mwa ka Gilegale; lri ikaiyaku kavai madradresenge muswane, si patarumara ku Lama ka lrisi si Sulivatane ka lrisi. Lri makapitulusu mukalava nakwane; lu kelanga naku kwini lri pelaelaku ku lrika apianesu ku awngane.”

⁹ Ku Saule sakatwatwase ki Samuile, ku Twaumase wabaai iniane ku vaeva ku bavane ku takidremedremane. Kudra tapelaelane iniane patuelre, ikai kwini ki vaivai makitwa ngimianga.

¹⁰ Ku Saule si sasiakawluini sa daruru Gibia, twaredelane ku layuginsia kela kidrele iniane. Ku Ri ki Twaumase la kirimu arake iniane, ku Saule si kwini redelaneini la dralradralrai kawkawkau.

¹¹ Kudra nawathingale ki Saule sadrele kudra tangimianeini, la makivagavaga, “Matumane ka lalake ki Kise? Ayuginsianga ka Saule?”

¹² Yakai ku tangea ku swakai kwini ku amia kai, “Ku drumane? Ku tama lini laka yuginsia.” Amani kikai “Kwidra taayuginsiane ki Saule?” Kikai avaganga ikai ki laumawmase.

¹³ Samaka ngimia ku Saule ikai kwini dralradralrai kawkawkau, ala katwase papia lregelrege kwini ki tasukusukubane ki Twaumase.

¹⁴ Ku agi ki tama ki Saule la drele iniane si sasiakawluini, la kivaga, “Mwainu numi?” Ku Saule la iya kai, “Matwase nai silape ki ruba! La kai nai maka kidringai, la katwase nai kikawriva ki Samuile.”

¹⁵ Ku agi ki tama ki Saule la kivaga, “Laka manemane ku pelaelaini numiane?”

¹⁶ La tubalre ku Saule, “Peaelaela naiane kiadringainga kudra ruba.” Ai ku Saule la kai pelaela ki agi ki tamaini matikai ku takipaatalialaladhaneini ki Samuile.

Ku Saule kia tutalialalai ki laumawmase

¹⁷ Ku Samuile la sarubu ki mapapangale ikai Mizepa si madrekadrekase,

¹⁸ la kawriva liniane, “Ku Tamatama ka Twaumase ki swa Iseraylri amia kai, wasangiluku numiane mulatadre Izipiti, palribulu numiane pakidaili ki swa Izipiti si kudra latwasinalreme numiane ka umawmase.

¹⁹ Amanini ku Twaumase numi, ka amani kudra palribulu numiane kidaili sanaka amatikurwane ka Twaumase. Ai kaikameane, malrase numi iniane, la kitubi numi nakwane cegecega si badha naiane ku tangea ku talialalai iya. Kaiasasane kunumi singikaiya ki zuku si lamaretetese numi masakaikai isarubu icucubungu ki Tamatama.”

²⁰ Ku Samuile la dawlu nguvavaeva ki lazuku papucucubungu; ku Tamatama la pilri ki zuku ki Biniyamingi.

²¹ Ku Samuile la malra pucucubungu ki lawacekecekele ki zuku ki swa Biniyamingi, la pilri ki wacekecekele ki tai Materi; kwini tai Materi la kela cucubungu, la pilri ki lalake ki Kise ka Saule. Ku mapapangale la silape ki Saule, ai kai maka kiadringai iniane.

²² Kwini lalasu la kivaga ki Tamatama, “Kwini lasu wakelanga kai?” Ku Tamatama la tubalre, “Yakai kavai ka Saule, kiabalai ikai lrilrikudru ki lalawbubulu.”

²³ La ikai ku umawmase ku wabilibili ki Saule, iluku pucucubungu ki mapapangale; kwini lasu maelreelrengenga kwini ki laumawmase.

²⁴ Ku Samuile la kawriva ki mapapangale, “Kikai ala amani ku pilri ki Tamatama! Ikai mitane kadrwa ku paramia iniane.” Ku mapapangale la tawtau, “Talialalai nai banzai!”

²⁵ Ku Samuile la papia ki mapapangale pelaela ngutatiki kudra awngane si puku ki talialalai niyane, si pacase pwa ki nibalrubalrulane ka hungu, la pudringai pikai cucubungu ki Tamatama, ala pakatwase kwini ki mapapangale mubalriu.

²⁶ Ku Saule la mubalriu mwa ka Gibia; la ikai ku la kiakandu ki Twaumase ku twapapalra ki Saule mubalriu.

²⁷ Ai yakai kudra latasasalrai ku umawmase ku amia kai, “Kikai umawmase kai lri maka dulru palribulu mitane?” Kwini lalasu kai twamanemane lu drele ki Saule, la kai baai iniane ku saceacebe.