1 Samuile 1 - Ngudradreadrekadhane Ka Sisiu 魯凱語聖經

Ku tai Ilekana yakai Selu

¹ Ikai cekele Rama tali lregelrege ka Iparaime yakai ku tangea ku umawmase, ku nagane sia Ilekana. Kwini lasu lalake ki Yeruhame, agane ki Ilrihu, ka zuku ki Iparaime, wacekecekele ki Zupe, ka tai Tuhu.

² Ku Ilekana tadrusa ku taelrelreini ka Hana si Pinena. La ikai ku lalake ki Pinena, ku Hana laka kadrwa ku lalake.

³ Ku Ilekana lukacaili twalai Rama mwa ka Selu sukubu ki Tamatama ki abebeelengenga ki sanaka kwapingi, patarumara iniane. Ikai kwini yakai ku tadrusa ku lalake ki Ilri ka Hupeni si Pinehase abarakalai ki Tamatama.

⁴ Ku Ilekana lu maka patarumaranga, tara wabaai vala ku taingeane ku beate ki Pinena, la baai ki lalakeini ku taingeane.

⁵ Adravane ku Ilekana kadalame ki Hana, ai lrika paka taingeangeane baai iniane, asi lwiyane ku Tamatama kai patwalalalake iniane.

⁶ Kwini ecebane ki Hana ka Pinena laka tatusinalrelrelremeane iniane, pakiangeange iniane, asi lwiyane ku Tamatama kai patwalalake iniane.

⁷ Kikai tangimiamiane laka thadalrane lukacaili, kwini lalasu lu kela mucucubungu ki daane ki Tamatama, ku Pinena la saavidhi patubi ki Hana, si kai kane ku lamanemane.

⁸ Ku taelrelreini ka Ilekana la kivaga iniane, “Hana, asu tubitubi? Asu kai kanekane? Asu ka tatubitubiane kwi kidremedremesu? Kainaku ka makadrwadrwa ki tamangeale ka lalalake ka lasawvalalai?”

Hana si Ilri

^9-10 Yakai saka kiningivalane, kwini lalasu yakai Selu, sa maka kanenga ku aga ikai ki daane ki Tamatama, ku Hana la ngidrakale. Kwini alisu kwalri turamuru ku kidremedreme, takutubitubi, takukitubitubi ki Tamatama. Kikwini kwidra, ku barakalai ka Ilri yacengecenge takaenene ikai ki taetalane ki barakalai kwini yathili ki daane ki Tamatama.

¹¹ Ku Hana kiaketekete iya kai, “Tamatama ka abebeelengenga ki sanaka kwapingi, paswalebea si sirapale ki sasiakawlusu ka ababai si drele kai sakwalrialrili, pulringavaili, madha sakawlrawlrau nakwane! Alaiyasi baaisu nakwane ku lalake, lri kiketeketaku, lri baadhaku iniane muswane; kwini lasu lri kai kigulrugulru ku takaumawmasaneini.”

¹² Ku Hana laka kadrwa ku taretegane ku akitubiane ki Tamatama; ku Ilri la drele kwini ki bibianeini.

¹³ Asi lwiyane kwini Hana pia kidremedreme inulrinulri, ngiavelevelevele ku ngudwi, ai kai avavagavaga, ku Ilri alau mabusuku la iya,

¹⁴ la iya kai iniane, “Kaiyana makakelrete kwini busukanesu? Madha kabusukunga!”

¹⁵ Ku Hana la kawriva, “Ini, tamatama, kainaku waungulu ku bava; kwalri kai kidremedremeli turamuru, kikai laka peaelaelaelaku ki Tamatama kai sakwalrialrili.

¹⁶ Amamama ka ababai madha iyaiya nakwane; asi lwiyane ngwalai ki sakwalrialrili turamuru, la piaku kikai inulrinulri.”

¹⁷ Ku Ilri la kawriva, “Lu kaliapapadhanga kwi kidremedremesu katwase. Ku Twaumase ki swa Iseraylri ani pangimia kudra kitubitubisu si patarumara muswane.”

¹⁸ Ku Hana la tubalre, “Asu ka takathalraadhane nakwane.” Samaka kawriva, la katwase kwini alisu, si kanenga, kaulrawnga ku sakwalrialri ki lringauini.

Takitulalakane ki Samuile si takipatarumarane

¹⁹ Sakakaiyane ki mialrealre, ku tai Ilekana makanaelre la ngulalakese ngidrakale, si sukubu ki Tamatama, la katwase siwlri mwa ka Rama. Ku Ilekana si taelrelreini la tadrusa apece, ku Tamatama twabalrenga ku kitubi ki Hana,

²⁰ kwini alisu ala katawbaliri, la tulalake ku vaeva ku sawvalai, Ku Hana la sunagane pasi Samuile, asi lwiyane amia kai kwini alisu, “Kikai amani ku kitubili ki Tamatama.”

²¹ La darurunga kudra ki tamudradhadradhane mwa ka Selu, ku Ilekana la mailuku ki wacekecekeleini mwa patarumara ki Tamatama ku sapatarumarane ki cailane, sawlri kudra kiketeketeini ki Twaumase.

²² Kikai ku Hana kai tupapalra; kwini alisu amia kai ki taelrelreini, “Lu isaadranga ki thuthu kai lalake, lri ilukaku iniane mwa ki daane ki Tamatama, lani ikaainga kwini ku takaumawmasaneini.”

²³ Ku Ilekana la kawriva, “Unu, mathariri kwi taiyanesu, pangimia; la asura itavanane, lu isadranga ki thuthu kai lalake la mwanga! Ku Tamatama ani paralubu muswane sawlri ku kiketeketesu.” Ku Hana la asurunga itavanane, lapulapu ki lalake.

²⁴ Ku lalake sa isadranga ki thuthu, ku Hana la iluku iniane mwa ka Selu, la iluku ku vaeva ku taratulrunga ka caili ka sawvalai ka lwange, mangeale ka kukingi ku milrikinku, akuvaeva ki lrangici ka tabavane ku bava. Ku Hana la iluku ki vavalake ka Samuile mwa ka Selu, mwa ki daane ki Tamatama.

²⁵ Kwini lalasu sa culunga kwini lwange, la malra kwini ki lalake si baai ki Ilri.

²⁶ Ku Hana la iya kai iniane, “Tamatama ngwalringauananasu nakwane, amaniaku kwidra drelesu, kudra acegecege ikai kai si inulrinulri ki Tamatama ka ababai.

²⁷ Kiatubiaku ki Tamatama kikai ki lalake, ku Tamatama la pangimia kudra takitubianeli si baai nakwane.

²⁸ Lakamani kikai, lri baadhaku patarumara ki Tamatama; lri makalautunga ka Tamatamane.” Kwini kwidra kai lalasu la ikai kwini sukubu ki Tamatama.