1 Pitiru 5 - Ngudradreadrekadhane Ka Sisiu 魯凱語聖經

Lakiu ki Twaumase

¹ Lri sakaiyaku ku takaciwraneli kitubi numiane ka laciwru. Amaniaku ku peaelaelaela ku takwalriane ki Kirisitu, ku amavalavalane kisupilri lukabibilrili ku autaluvaivadhane ku lrigu. Kiatubiaku numiane,

² agwagwa ku sudralru numiane ki Twaumase ku lakiu, pasingikidremedreme kiragai singikai ku kidremedreme ki Twaumase sirapale liniane, kaika nivuthane, kaika ngwalai ku akipawlrawlravane ka awngane, ngiakakamaani pasikai kaungu.

³ Madha dredrepete pakwalri ki lapulapu numi ku lakiu, kamania ku takitwalravane ki lakiu.

⁴ Lukamiyaiya kai, lu kelaanga ku Tamatama ki taraagu yai, lri tarumara numi ku lrika palralrawthu kai kaelanga ku talikalikathane ku pagamucu.

⁵ Laka thadaalrane, kunumi ka layacengecenge pasalaladha ki tarudrawdrange. Si arakaiya ku ngitatwalebeane ngiragelane makanaelre, si la mapasikaikai, asi lwiyane amia kikai kai Sisiu, “Ku Twaumase kiaecebe ku ngiakalrilrigu ku umawmase, la baai ku migemi ki ngiatatwalebe ku umawmase.”

⁶ Lakamani, ikaiya tailebeane ki puku ki Twaumase ngitatwalebe, lukamiyaiya kwini, lri ikai kwidra takatharirane ku vai si parwa belenge numiane.

⁷ Kwini kwalrialri numi pakanaelrea musuragele baai iniane, asi lwiyane makalithi numiane.

⁸ Kipapawlringava padulru, kwidra badha numi ka Akema mia ki raiyungu girigiringi masasawlriwlri dadavace, silasilape ku alredaneini ku umawmase.

⁹ Ku salrwane numi kakecenga, kiecebe iniane, asi lwiyane wathingale numi kai kawmasane ku lasinzia mialri ka la kiapadradresenge ku thadaalrane ku akipakwalriane.

¹⁰ Ai, lu kipakwalringa numi kwini edreekane, kwidra amani ku wabaai sanaka migemi ka Twaumase, amani kwidra wadawlu numiane si pangukai ku tamaelreane ki Yesu Kirisitu si mavalavala kisupilri ku palralrawthu ka lrigu ka Twaumase, lri kamani ka pangiamia pakitulrepenge numiane, pakapapedrenge numiane, baai ku puku si pakapapedrenge ku tangadrane baai numiane.

¹¹ Ku puku ani papia iniane, pakeela palralrawthu! Amingi.

Abibiilrilinga ku tatubarengeranane

¹² Ikai ki retesane ka Silra ka pakaelre ku takidremedremane paralubu, wapacasaku kikai edreekane ka tigami baai numiane. Lri pasapukwana ku numiane, si pelaela numiane kikai yai patengatengane ka migemi ki Twaumase. Ikaiya kikai ki migemi belenge acegecege kapapedrenge.

¹³ Kwidra thadaalrane numi kipilri kipacegecege ka swa Babilunia kiwkai kiavagavaga lu udringadringai numi, kai lalakeli ka Maruku la mialri kivagavaga lu udringadringai numi!

¹⁴ Arakaiya ku sakialibake ki kidremedreme matubarengerengerane. Kunumi makanaelre ka yakai ki Kirisitu ka umawmase anu tarumara ku sulivatane!