1 Pitiru 4 - Ngudradreadrekadhane Ka Sisiu 魯凱語聖經

Akabalrithi ku tapanianianiakane

¹ Ku Kirisitu kiapakwalringa ikai ki kinawmasaneini, kunumi laka miyaiya ikai ki takidremedremane numi ngirarukudru, asi lwiyane ku yakai ki beate kwalri ku umawmase maka kitukudhanga ki pasalrivane.

² Twalainga kaikameane, kudra tedranenga ku taikaiyane numi kawmasane ku vai ki ruthuka ki kidremedreme ki Twaumase, madha kiruthukunga ki urikaiyane ki kinawmasane.

³ Kunadruma pasawlra numi ku vai, pia ku kadalame pia ki maelane ku takisuswane ka laumawmase, sikace ikai ki malrithavulu ki ngwakai ki sawvalai si ababai, pasalaladha ku urikai ki kinawmasane, kabusuku si kalilisi, ngiakanekaneane kapeaperau, paramuru ungulu, si matiagirimucu ka wasukusukubu ki samiamiange.

⁴ Kikainga kai numi twapapalranga liniane ikai ki ngilralraingane ki kinawmasane, kai maka ngiararuthuku kudra tapanianianiakane, kwi lalasu lu kidremedreme anika miyaiya amia, si la tusinalreme liniane.

⁵ Ai, kwi lalasu lri tara ukiame ki Twaumase ka amani ku lri saibange ki panianianiake si wapacainga ka umawmase.

⁶ Ngwalai kikai taiyane, kai hukuingi mialri ka napadarurunga baai ki wapacai ka umawmase, baai ki ladrumane ka umawmase ka thadaalrane ikai ki beate kisaibange ka umawmase, ku abake lini lani mia ki Twaumase panianiake.

Malrigili arakai ku migemi ki Twaumase kipuawngane

⁷ Ku apalikaiyane sanaka maneemanenga lri kelaanga, kunumi kipapawlringava ngiraruthuku, si kasimeameace inulri.

⁸ Ku makuciacingalrenga yai tukapatengatengane makilibalibake, asi lwiyane kai sakialibake wadulru ulrau ki lapasalrivane.

⁹ Tukapatengatengana mapasudalrudalru madha kalisilisi.

¹⁰ Kudra sanaka aneeane amaninga ku malrigili arakai ku migemi ki Twaumase kipuawngane, tara singikaiya kudra baai ki Twaumase ka makaelaela ka lrigilane, si la mapasikaikai.

¹¹ Luka aneane ku peaelaela kawriva, lri malra ku apelaelane kawriva ku vaga ki Twaumase, luka aneane ku pasiakai kaungu, lri malra ku baai ki Twaumase ku puku si pasikai kaungu, sanaka maneemane ku lrika angukaiyane ki Yesu Kirisitu si papia ki Twaumase ku lrigu. Ku lrigu si lrekeme ani papia iniane patuelre, pakela palralrawthu! Amingi.

Kiaadili ki akwalriane

¹² Kathalraili ka latalragilragi, lu kipadradresenge numi ku mia ki apwi ku sakilrialringavane, madha ngituluku, mia kudra lu kipadradresengane ku kiasumali.

¹³ Lu mavalavala numi ku akwalriane ki Kirisitu anika taingeane ka matiakiragai ka awngane, kudra luka tawtaluvaivadhanenga ku lriguini ani malra ku kiatulrepenge ku sakiaragai.

¹⁴ Alaiyasi ngwalai ku tatupapalrane numi ki Kirisitu si kitusinalreme, yakai ku akaesadhane, sapathingalane ku lrigu ki Siri, ka amani ku Ri ki Twaumase, yakai ki kinawmasane numi.

¹⁵ Ai, ikai numiane lani kai ikai ku ngwalai ki papacai ki umawmase, ku wakupa, ku pasalriu, ku waraeratenge si kipakwalri.

¹⁶ Alaiyasi ku takwalriane ka ngwalai ku taa Kirisiteaneini, madha ngwalalai kalrumale, ngwaladha ku tasiebelane ku nagane ki Kirisitu si lrigu ki Twaumase.

¹⁷ Wakelaanga ku asaibangane, ku lalalake ki Twaumase lri aswala kisaibange. Alaiyasi ku asaibangane ka lri twalai mitane pathagili, lu mia kwini, ku kai masalru ku hukuingi ki Twaumase lrika ngitwatumane ku angimiane lini?

¹⁸ Mararaamau ku taiyane ki Sisiu: Ku madringelrese ku umawmase lu kipalribulu kaika madwai, lai ka ngitwatumane ku kai mwasakene ka pasalrisalriu ka umawmase?

¹⁹ Lakamani, kudra ngwalai ku kidremedreme ki Twaumase si kipakwalri ku umawmase, naikai telrai ku arakaiyane ku tharirane ku tangivelevelane paathingalane ka kiatulrepenge singipathagili patulrepenge ku tasatalwane kwidra patengatengane ka wabekace ka Twaumase.