1 Pitiru 3 - Ngudradreadrekadhane Ka Sisiu 魯凱語聖經

Taelrelre ka Sawvalai si Ababai

¹ Thadaalrane, ku taelrelre ka ababai, mialria pasalaladha ki taelrelre numi ka sawvalai, ku kaina tarwamara ku patengane ka vaga lani ngwalai ku tharirane ku kakwakudhane numi si akabalrithi, madha akulragi ku vaga numi turamuru,

² asi lwiyane li drele kwini bulane si papedrengane ki kakwakudhane numi.

³ Madha satalu ku sangikakimane si arakai ngipapangiragelane, madha kidremedreme ku atungitwatumanane ku kingi ka isiu, ku asimanemanane ku sangiragelanane ku silu, ku asilaimadhane ku manemane.

⁴ Pikaiya adringi ku tharirane numi, arakaiya kwidra kai lri kaela ka sulrapelane tusangiragelanane, kikai amani ku sanianiangenga lu drele ku Twaumase.

⁵ Asi lwiyane, kunadruma kudra la mwakalavalava ki Twaumase ka mabula ka labaibai arakai ku pasalaladhane ki lataelrelre lini ngipapangiragelane.

⁶ Ku Sara miyaiya kikai, pasalaladha ki Aberahame, twatawki iniane. Lu ikai ku tharirane ku tangivelevelane numi, kadrwa ku aukuludrane ku manemane, lai ka lalalakenga numi ki Sara makanaelre.

⁷ Ku taelrelre ka sawvalai, lu taelre numi ki taelrelre numi ka ababai cekecekele, tara pangimia kakalithi liniane ikai ki takaababadhane yai turawramuru. Tukucingalra usakene liniane, asi lwiyane mia numiane ka lri tarumara ku baai ki Twaumase ku bavane ka niake. Lu dulru numi pia kai, ku inulri numi kai lri atelengane.

Pasiakai ki dringelresane kwalri

⁸ Lu elrelreanenga kawriva: Maramaramava kwi kidremedreme numi, si makakalikalithi, makilibalibake mia ki mabetabetake, arakaiya ku tharirane ku kidremedreme si ngitatwalebea masiraparapale.

⁹ Madha arakaikai ku ngialisiane bilri ki ngialisiane, ku tusinalremeane bilri ki tusinalremeane, ngibalrealringa arakai ku sasubulrubulrwane bilri, asi lwiyane ku dawlu numiane ki Twaumase ku pacugane lri subulrubulru numiane.

¹⁰ Mararaamau ku taiyane ki Sisiu; Aneane ku nau kisupilri ku akiragadhane ku takawmawmasane, ku mwarikai ku akatharirane ku angilribatane ku vai, lri paisadra ku akawrivane ku ngialisiane ki lridame, si atavuvulrucane ki ngudui.

¹¹ Kwi lasu lri kidaili ki ngialisiane si pia ku mathariri, savaeva ku kidremedreme kisilape ki rathudane.

¹² Asi lwiyane ku Tamatama siarapale ki madringelrese ka umawmase, si kilalra ku inulri lini; ai papia ki mangangaanga ka umawmase lri akabalrithi ku lringauini.

¹³ Alaiyasi kisamula numi pia ku mathariri, aneane ku lri kabebetethe numiane?

¹⁴ Alaiyasi pasikai ki dringelresane kwalri, lri kaesai turamuru! Madha mukuludru ku takukuludrane ki umawmase, la madha kathathiburu.

¹⁵ Pikaiya ku sawsaesakene ukuludru ki Kirisitu ku kidremedreme, tu Tamatama iniane. Lu ikai ku umawmase ku kiatubi numiane ku apalalrwadhane pelaela ku sidramadrama ki kidremedreme, tapadulrwane madu ku atubalreane,

¹⁶ ai arakaiya ku ngitatwalebeane si sulrapelane tubalre. Pikaiya ku bulane ku takidremedremane, kudra la twasinalreme numiane, si kudra ngwalai ku taa Kirisiteane numi si kathariri ku kakwakudhane numi la vutha tulilisi numiane ku umawmase, ani ngikakainu.

¹⁷ Lwiyasi ka kidremedreme ki Twaumase lu pia ku mathariri si kipakwalri, kikai sanianiange turaamuru kudra ki paiya ku malisi si kipakwalri.

¹⁸ Asi lwiyane ku Kirisitu nakingivaalenga pasikai ki pasalrivane pacai, ka amani ku madringelrese ka atalingikaiyane ki kaika madringelrese, pakai ku ailukane numiane mucucubungu ki Twaumase, ku kinawmasaneini kiapapacaynga, ai ku Rini panianianiake.

¹⁹ Naarakai kikai abakeini mwa ki kiaemenge ka laabake dindu.

²⁰ Ki kikai laabake kai masalru ki Twaumase, amani kwidra sa tuvarukurukuru ku Nua yai kiadili ki Twaumase mukalava ka abake. Sakamani kwidra ku mwadaane ki varukuru ku umawmase kai takalra, tavawvalru, kai lalasu twalai ki acilai kipalribulu,

²¹ kikai acilai sapathingalane ka sapabanavane. Kikai sapabanavane palribulunga numiane kikai, kaika wasinau ki kudrulru ki kinawmasane numi, pakabula ki kidremedreme ku apapiane ki Twaumase kiketekete, kikai sapabanavane ngwakai ki tasielane ki Yesu Kirisitu si palribulunga numiane.

²² Ku Yesu Kirisitu wamwanga belenge, kikai la ikai vanale ki Twaumase, kaamani ka warathudu patuelre ki sasiakawlu belenge si maerece ki ngwababelenge.